Kárest:
Nágomán: (Bólán médhikal kálej Shálá wánagá ent)
Maggol, Golátun, Hátun: (Nágománay tri ant ke neshtagén jenekkesh nést)
Jamilah: (Nágománay gohár o Maggolay neshár)
Shahrbánu: (Nágománay mát)
Golján: (Maggolay jenekk o Nágománay brát Sálehay zál)
…………..
(Bégáhay wahd ent. Kollay tahá diwán ent.)
Maggol: Damáná raway? Daningah tará dah róch nabit.
Nágomán: Aiday chotthi haminchok atant. Ni rawag lóthit.
Shahrbánu: Padá kadi káay, mani pet?
Nágomán: Zemestáná.
Maggol: (Bránz gipt) Ennán, O Nágomán, tai del ni ché goshit?
Nágomán: Chiá zánán truá?
Maggol: É zemestáná rawagáay o démay zemestáná káay. Taw ni hanchó béhájat ay?
Nágomán: Wánag ent. Áyag nabit
Maggol: Chetaw áyag nabit. Latip Gósh Kwaythahá pésari máhá shotagat. Bist róch nagwast, drekk at o atk.
Nágomán: Truá, á dege jáhé wánagá ant. Áyán dáwá kot. Kálejesh band but.
Maggol: Inchok námah o nimón nalóthit. Boraw bale do máhá rand may cháragá mayáay, tai shalwárá nakasshán bezán bay ent!
Hátun: Yá…. Maggol! Nágomán Jáná chosh goshay?
Maggol: Haw…. goshány. Chiá goshit ke démay zemistáná káyán.
Nágomán: Bale moptá chiá wánagá yalah bedayán, byáyán?
Maggol: Yá… ni sharr ent. Tai lógay mardom hamedá ant. Syád o sangat hamedá ant. Angat nayáay? Ódá tai mazanpang neshtag?
Jamilah: Truá! Nágomán kayt bale pa wahd o mósom. Wánagá kappi chondhi bekant godhá sharr ent?
Maggol: Káráni haráb kanók hamé Jamilah ent. Beh áyagá naylit Nágománá.
Shahrbánu: Sharr ent mani chokk, tai wánag chinchok sálayg ent?
Nágomán: Shash sálay.
Maggol: Paw! Shash sálay? Ache tai brátá sálé kappéá tawám kot o dáktar lagget. Tará Kwaythah dege delé wassh bit.
Golján: Ammán! Sáleh kasterén dáktaré. Nágomán mazanén dáktari wánagá ent.
Maggol: Sar per bit na gadhillag! Sáleh masterén brát ent o kastrén dáktaré. Nágomán ke Daningah wati nék o badá nazánt, masterén dáktaré?
Hátun: Yá…. Maggol! Nágomán Jáná chosh goshay?!
Maggol: Haw… Goshtag o goshány! Agan wati nék o bady bezántén, márá déri batthy wáréntagat.
Jamilah: Daningah wa é siri naent.
Maggol: Taw mazanén sháhókáré ay! É sakk kasán ent. Eshiay hamsaruán chár chár chokk hast. (démá gón Shahrbánuá kant) Jenekk Shahrok! Taw wati ládhén bacchá chiá sir naknay. Dér ent, na
chápé jatag na názénké.
Shahrbánu: Master wat ent. Wati nék o badá sharrter zánt.
Maggol: Taw sharrén máté ay! Sáleh wati master wat ent, turi chár chár jan begipt. Nágomán master wat ent, turi hecch magipt. Shábásh ent tai mátiá. Harkas goshit man chokkáni morádán begendán o taw…
Golátun: (Lógá poteráná) Marchi Maggolá ják kotag. Hayr ent? Salámálay
Drost: Alek o salám ji!
Hátun: Dapy kechag dant. Ni Nágománá zabrrag o kakarragá ent.
Golátun: Yá… Nágománá? Nágomán wa námhodái chokké. Maggol, taw mayárig ay.
Maggol: Man nagept dozz, dozzá maná gept. Batth márá Nágomán nawárénit o mayárig án man?
Golátun: Pa batthá tai del band ent? Byá man tará wárénán. Kurk waray, máshbatth?
Maggol: Náz pa korósá o korós báng nadant. Nágománá goshay bángé beday o é lawwá wadh wadhén námah o nimón kant. Dér ent na chápé jatag na názénké. Márá dege gwát o nimóné magipt sharr ent.
Golátun: Shomay del pa cháp o názénká band ent, godhá Lyákatay sir bit, sharr bejanet. Nágománá bellet ke wánit balkén róché ásidagén nagané rasity.
Maggol: Bass ent ni. Inchok wánag! Chinchok sál ent wánagá ent!
Nágomán: Chárdah sál.
Maggol: Chárdah bass naent godhá? Édege drostén bachakkán dah o dah wantag, káré chizzé shóház kotag, jan o jópág ant, neshtagant. Taw ay ke londhá londhay, chakarray.
Hátun: Yá… Maggol! Nágomán Jáná chosh goshay?
Maggol: Haw, goshány. Chiá goshit sir nakanán.
Nágomán: Man wa chó nagosht. Man gosht kammé ranterá.
Maggol: Ranterá? Hamá wahdi ke tai mát merit? Tai baheshtigén petá tará chinchok randá gosht bale taw yaddhakké ay, wati brátay wadhén.
Shahrbánu: (gón Goljáná) Mani mát! Lachay bucchokán pasáni démá day. Hamá ápáni lóhigá kenzén gón. Bechár hamá tahtay sará kokkodhé neshtag, gallény gón.
Maggol: Edá bechár!… Chinchok kár ant. Nágomán! Shehm o rahdárén chokkay wadhá boraw jáhé watá adhén. Shahrok o Goljánay kópag ham sobakter bit.
Jamilah: Nágománay jan maná pa choshén kárán del nabit.
Maggol: Chón bekant, peléndh!…. Á belly bánok bit o nendit o mani jenekk kárá chér bebit? Nágomán bekant sir…. Agan domi róchá man bánóray pangá nagept o kár nabast bezán man Maggol naán!
Golátun: (gón Nágománá) mani chokk! Mani gappá geray, may ambrisshén rechi pechié mager. Jan hast o janok hast. Taw anchéné beger, agan cha taw chamá dém nabit, cha taw padáter ham mabit!
Maggol: É siri shéré! Chinchok sál ent, máy thóhénagá én ke ni sir kan bale soddé pery nést. Baré námahé kant. Man wa goshán bachakk “baróbar” naent!
Nágomán, Jamilah, Golján: (thahk dayant)
Hátun, Golátun, Shahrbánu: (Yappárigé) Yá…. Maggol! Tai baht ni sharr kaptag. Nágomán Jáná chosh goshay?
Maggol: (Halwat kant) Shomá bellet… Man chosh goshán, belly del kant o sir kant.
Nágomán: Mani del kanag o nakanag dard nawárt. Man wati siray master mardomé kotag. Á harchi goshit, man hamá wadh kanán.
Maggol: Kay ent?
Nágomán: Jamilah.
Maggol: Jamilahay ráhá árag choshén gappé naent… Shábásh…. Jamilah boraw jenekké dar géj.
Jamilah: Yá, é ni wadhé, truá! Nágomán zánán may sará bár ent ke eshtáp eshtápá jáhé mény bekanén? Belly wati wánagá…
Maggol: Mameret méshán… É goshit angat shash sál hast!
Nágomán: Shash sálay wánag ent. Do shotag, chár hast.
Maggol: Sharr ent godhá chár sál kammok ent?
Nágomán: Bale maná wassh bit wánag…
Jamilah: Truá! Wánagy wassh bit ke esháni kálejá bachakk o jenekk hór wánagá ant.
Golján: Mani gappá geray Nágomán, hamángor yakké dar géj!
Shahrbánu: Ennán mani chokk, ángor ennán… Bárén chónéné bit.
Maggol: Má darkawm nazirén turi yammotthén dheskué bebit.
Hátun: Má dardin nazirén turi bádsháhi jenekké bebit.
Golátun: Má darzát nazirén turi huré bebit.
Nágomán: (yakk baré murkán mojénit, padá kandit) Ache godhá bwaret batthá!
Nágomán