1989á, wahdé man Dhegri Kálej Torbatá dákelah zort godhá Makkoránay bachakkán abayd Mashkehi bachakké Din Mahmad ham mani hamjomáet at. Din Mahmad ke má sangatán Dinján gosht, modám do bachakkay hamráh at. Yakké pathakk at, domi borz at. Yakk róché man jost kot ke é pathakkén o borzén kay ant ke taw modám esháni hamráh ay?
Dinjáná bechkandet o gosht, “É doén may damagi mardom ant. Pathakkénay nám Mannán ent, borzénay Alláh Nezar.”
Man o Dinján Ep.Es.Si. (FSc)ay awali sálá atén o Alláh Nezar o Mannán cha má séniar atant bale má dráh Bi.Es.O. (BSO) Yásiná atén, pameshká zittán hór o tór bitén. Á wahdán Bi.En.Wái.Em. (BNYM) yá Bi.En.Em. (BNM) ham jódh bitagat ke áiay sarók Dáktar Hai at.
Gón Mannánay gendagá man modám Dr. Haiay tránagá kaptán. Yakk róché man jost kot ke Dr. Hai tai ché ent?
Goshty, “Hecch naent. Chiá záná?”
Man gosht, “Tará man gendán, Dr. Haiay tránagá kapán.”
Áiá kandet o gosht, “Chón?”
Man gosht, “Rang o dánagá taw áiay chahragá janay. Hamáiay wadhá pathakk ay o hamáiay rangá diwánán goshtánk dayagá shoru bay, bassi nazánay.”
Mannáná thahk dát. Á wahdán Dr. Hai may drostáni delwáhén rahshón at. Á Bi.Es.O.ay awali sarkamásh bitagat. Bi.Es.O.ay awali rahshón at ke Pákestánay kawmi asambaliá sar bitagat bale 1973ay áiny daznám najatagat. Balócháni olosi syásatdán at, bezán sardáré naat o ni Bi.En.Em.ay rangén rájdóstén galéay master at. Pameshká Dr. Haiay námay bandagá Mannán gal but.
Ep.Es.Si. kanagá rand wahdé man Bólán Médhikal Kálejá sith gept, godhá Dinján, Mannán o Alláh Nezar ham gón atant. Man gón Mannáná gosht, “Ni taw sharter Dr. Hai bitay.”
Kandet o josty kot, “Chón dhay?”
Man gosht, “Shomá pésará hamrang et, pathakk et o pittár et. Ni dáktar et ham.”
Áiá kandet o gosht, “Nun godhá man nazzik kortag.”
Á dawr gwast. Wahd matth but o wahdá wati pajjiá bázén chizzé matth kot. Dr. Haiá Balóchay johday saróki yalah dát o Pákestánay randgiri bená kot. Dr. Alláh Nezar, Dr. Mannán o Dr. Din Mahmadá bargashtagén Dr. Haiay randgiri wayl kot o Balóchay johday saróki zort.
Marchi ke Dr. Mannán pa Balóchay ájuiá shahid bitag o Dr. Hai Pákestánay golámiá zendagá mordár ent, man hayál kanán ke wahd géchené. Á ham dawré at ke Dr. Haiay nám pa Dr. Mannáná sharapé at o ni ham wahdé ke Dr. Haiay nám pa áiá záhé.
Nágomán