Jost: Kámraydh tai hayálá syásat chié?
Kámraydh: Ebádatay kesmé. Báz ebádat ruhá pák kant. Báz zehná o syásat chágerdá. Man syásatá ebádaté sarpad bán. Syásatá dáemi amalé sarpad bán.
Jost: Kámraydh tai delá syásatá kojám chizz géshter noks o táwán dát kant?
Kámraydh: Hámóshi, béhesi, látáloki. Tai déma zolmé buagá ent, taw hámósh bay. Tai déma nájáez buagá ent, taw látálok bay. Tai démá mardomé janag buagá ent. Mahluk koshag buagá ent, taw béhes bay. Sarpad bay ke merók, janag buók yá zolmay ámách, taw naay, tai hándán naent, tará che kár. Bale kammo bejédh tai bázáray mardomé, tai molká neshtag. Adhay! Balóché, ensáné. Kojám kojám syádián chammán band kanay? Tará jágahé na jágahé kóndhié gipt. Syásat tará sarpad kant ke áwaz chest kanagi ent. Zolmay démá óshtagi ent. Áshób ke dáemi arzeshté, pa áiá ráh o dar dáem pach kanagi ent. Bale é ham zánagi ent ke bázár o métagá áshób áragá o sári, tará wati andará áshób wasshatk kanagi ent. Badali sadaliá modám cha wati zátá bendát bekan. Godhá taw domiá gosht kanay. É kárá makan, é rad ent. Zolm makan. Ráji estehsál makan. Syásat tará pahmá dant. Man gwashán golámén o pasht kaptagén rájay harch pardá sarpad buag lóthit ke béde syásat, béde chest o ér o béde zolmay démá óshtagá dege hecch ráh pash nakaptag. Agan zálem tawánger o magrur ent, gapp janay ke janag bay, najanay ham janag bay. Godhá gappá bejan o janag bu. Delá koht mabit ke man hecch nakot.
Hanip Sharip
Pelem: Karim (2014)