“Halaw.”
“Hán. Halaw.”
“Ketáb raset?”
“Haw. Marchi.”
“Chón áorty? Jágahy zánt?”
“Haw. Pawny kot. Goshty hamé dokkáná ke ketáb ér kanagi ent, é band ent. Man gosht bósht yakké dém dayán.”
“Taw mát dém nadát na?”
“Ennááán. Mát tai ketábá begendit mani jendá koshit. Tai sará gonjá zahr ent.”
“Chiá?”
“Goshit jenekkay deshtáry baráéntag.”
“Hááán? Deshtár wa taw wat yalah dát.”
“Haw bale man mátay kerrá tai námá kotag.”
“Taw zabr ay. Kárá wat kanay, námá mani kanay?”
“Chón kanán. Mát thahénagi ent.”
“Taw choshén thahénóké ay godhá márá ham thahén gón.”
“Mátay dastá dayán, tará wat thahénit.”
“Maná hayr ent. Bechár kásedá mátay dastá nadayay ke domi pádáy mapróshit.”
“Langé zánán?”
“Haw.”
“Allay. Man nazántag. Man bazzagárá dán ném kaláká hamódá óshtáréntag.”
“Parwáh nést, watigé. Agan zahm jant shayré bandit.”
“U bábi. Sháeré zánán?”
“Haw. Baláhén. Taw Karim Káseday nám naeshkotag?”
“Eshkotag. É hamé Karim Kásed ent? Man goshtag zánán anchonáén kásedé.”
“Na bábá. É asli kásedé.”
“Karim Kásed Tompá naneshtag?”
“Neshtag Tompá bale marchán tai shahrá ent. Sabz Bát Thiwiá kárá ent.”
“Godhá gendag nabit?”
“Kásedé na. Chérokái kár kant… Háháhá. Poshtá neshtag, rajánk kant.”
“Ché kant?”
“Rajánk. Translation. Taw Balóchi nazánay?”
“Zánán wati kacchá. Taw gránén Balóchi kanay, man sarpad nabán. Bale sharr ent. Bekan. Man sekkán. Taw maná róché labzé bogosh gón.”
“Maná inchok sardardi tahmbol nakant. Wat besekk. Kásedá zánay chón kotag?”
“Hán.”
“Thiwiay jenekkéá mani ketábé dátagy. Goshtagy eshiá bwán tai Balóchi sharr bit. Man Kásedárá gosht. Daut! Taw mani ketábáni sará ásheki kanagá ay? Chestá darráénty taw bárén Monir Momenay shayráni sará ásheki kanay.”
“Háháhá. Rást goshit.”
“Rást goshit?”
“Haw, taw gón man anchó kanagá ay.”
“Man baré baré jóshá bán Moniray shayré dapgál kanán bale gón taw ásheki kanagá naán.”
“Hááán. Godhá ché kanagá ent, wájah?”
“Eshk.”
“Máná yakk ent.”
“Yakk naent. Ásheki sobakkén chizé, eshk gránén chizé.”
“Háháhá. Báz zánay taw. Tai eshk ant o degeráni ásheki, haw?”
“Haw. Ásheki gón harkasá bit, eshk gón yakkéá bit.”
“Sharr ent. Sharr ent. Godhá hamá jenekkay Balóchi sharter bitag?”
“Ennán. Eshiay Balóchi beh sharr nabit.”
“Taw chón zánay? Balkén taw ham wati johdán kanagá ay?”
“Háháhá. Ennán. Kásed maná kojá wár dant.”
“Paw! É lang ham dárag nabit. Chetaw lang bitag? Balkén hamé áshekiáni sará?”
“Háháhá. Ennán. Kasániá tapéá geptag padá lang bitag.”
“Eláj nabit?”
“Ennán. Pakkáén eláj nést.”
“Mani ballok ham lang ent. Dáktar goshant nabit.”
“Darkasáni lang ent?”
“Ennán. Anni chizé sál ent. Kóndhy nabant. Dáktar goshant pahréz lóthit. Kóndhán dotal makan. Sarsolónthoki manend. Bonay badalá tahsará benend.”
“Shast o shekast.”
“Ché?”
“Shast o shekast. Balóchi batalé. Bezán mardom shast sálay ombrá rasit padá shekast o ájez bit.”
“Ennán. Anchén pirén hast sadá sar ant, angat traddagá ant.”
“Kammoké kamtery nakanay?”
“Rásti. Genezbokká mán ent sad sáli ballokéá Olempek gwázián pirénáni tách katthetag.”
“Eshiá sharr nakotag.”
“Chón?”
“Báyad ent balloká shast o shekastay hayál bedáshtén.”
“Háháhá. Taw ke shastá rasay shast o shekastay hayálá bedár. Balloká bell ke tachit.”
“Tachag piréni laybé naent.”
“Kasé tatk kant, belly tachit.”
“Moptá chiá kamáshán prósháénay? Piránasriá dege layb ham bit kant.”
“Ché? Pattái?”
“Ennán. Dege.”
“Dege kojám?”
“Wadh wadhén.”
“Kojám wadhén?”
“Hamá wadhén. Háháhá.”
“Stupid!”
“Rást goshán. Lahté layb piránsariá sharrter bant. Kasániay gappé. Márá hamsáhegé hast at.”
“Shot kessah!”
“Háháhá. Haw. Bé kessahá taw sarpad nabay. É marday jend pir at bale jany kasán at. Domi jan aty. Anchó ke sarshap but zálay kethi kethiáni tawár atk. Métagay lóg kargin o koddhu atant. Diwál o kampán nést at. Pameshká har yakkéá wati hamsáhegáni bramsh o chedhekká eshkotant. Man modám hayrán bitagán anchó ke sarshap bit é zál chiá kandit? Róchá gendány, beh nakandit.”
“Á wati kandagán shapá kotthénit na!”
“Háháhá. Haw. Mazan bitán godhá sahig bitán ke pirmardá keli kotag o áiá kandetag”
“Yááá! Keli kotagy? Chiá?”
“Anchó. Layb labái. Piriay layb hamesh ant. Mardom dege hecch kot nakant, nendit, dhéká keli kant.”
“Yááá!”
“Man pir bán anchó kanán.”
“Stupid!”
“Dege ché. Piránsariá mardom chónáyá dege kár kot nakant.”
“Kot kant.”
“Ché kot kant?”
“Taw nazánay?”
“Ennán.”
“Nóróz o Akbará ché kot? Hayr Baksh o Mámá Kadir ché kanagá ant?”
Drájkasshén béwánki…
Nágomán