Pésará Balóchiay “majbur thóli” yakké at bale marchán do ant. Yakké syásatayg ent o degeré zobánayg ent.
Syásatay majbur thóli goshit ke anni má pelán pelán sawabá Orduá o Pársiá nebeshtah kanén. Wahdé Balóchestán ázát bit godhá má Balóchi o Bráhuiá zirén.
Zobánay majbur thóli goshit ke anni pelán pelán sawabá má Arabi syáhag zortag, wahdé má ázát bén godhá Látini syáhagá zirén.
Asal gapp zánay ché ent? Asal gapp esh ent ke hawrá ke gwáragi nabit, námah górichay kant. Márá Ordu zobán o Arabi syáhag yalah dayagi naant, pameshká má neshtag o wadh wadhén námah o nimmón tráshén.
Rástén gapp esh ent ke má wati zobánay bárawá imándár naén. Má bass wati syási o labzánki thokk thokká kanag lóthén. Márá gón zobán o zobánay syáhag o labzáni wánákiá kár nést.
May syási mardomán bechár. Wati zobánesh pádáni chérá kotag o kabzagiray zobán Orduesh zortag o saray táj kotag o hecch soddesh per nést. Zobándozhmeni hamesh ent. Zobándozhmeniá dege kánth per nabit. Ni bechár, kojám kawmay ázátipasondán wati zobán yalah dátag o wájahay zobán zortag? Chareshiá zánag bit ke má dapá belly ázátiay gappá janén bale may sassá angat golám ent.
Hamé paymá may kalamkáráni dotal o dopóstiá bechár. Dapá goshant ke pa Balóchiá Látini syáhag sharter ent bale wahdé Arabi syáhagay yalah dayag o Látiniay ziragay bárig kayt godhá wadh wadhén ozr pésh kanant.
Ozráni é cháderá beléthénay godhá rástén gapp záher bit. O á gapp esh ent ke má Ordu zobán o Arabi syáhagá héldár én pameshká esháni yalah dayagá tayár naén.
Bale héldári jawázé naent. Agan kasé héruná héldár ent godhá eshiay máná é naent ke hérun sharr ent. Agan má Ordu zobáná o Arabi syáhagá nebeshtah kanagá héldár én, ehsiay máná é naent ke Ordu zobán o Arabi syáhag pa má sharr ant.
Ni jost esh ent ke may syásatdán dán kadéná Ordu o Pársiá wati syási darshánay zobánay darjahá dayant o Balóchi o Bráhuá dhálchár kanant? O may kalamkár dán kadéná Arabi syáhagay tachk kanagay shawká wati zobánay labzán mán gisshénant? Hamá mardom ke Ordu zobán o Arabi syáhagay yalah dayagá marchig o bándát kanagá ant, á do jostay jawábá bedayant.
Awali jost esh ent ke Pákestán wassh bit ke taw Ordu zobáná yalah bedayay?
Domi jost esh ent ke Pákestán wassh bit ke taw Arabi syáhagá yalah bedayay?
Agan tai jawáb esh ent ke Pákestán wassh nabit godhá eshiay máná zánay ché ent? Eshiay máná esh ent ke taw gón Ordu zobán o Arabi syáhagay ziragá hamá kárá kanagá ay ke Pákestán lóthit.
Nágomán