Mani o tai sohbáni nyámá sakk báz tapáwat hast, Kamál.
Marchi belly ke taw hamé métagá neshtagay ke dah sál sári man neshtag butagán. Marchi belly ke taw hamá barándhahay démá wapsay ke dah sál sári man waptagán. Man zánán tai mát hamá chollá nán pachit ke mani mátá dah sál sári patkag. Bale angat tai sohb o mani wahday sohbáni nyámá mazanén tapáwate hast. Maná sohbá é bágay saray jengol o koliáni tawár o pasáni peléngagán pád kotag. Man hardén ke pád atkagán, sártén gwátéá ginn kasshetag. O mani dém pa dém kapódar cha wati dhabbá dar áyagá butagant. Man kapódar ke “á á á” kotagant, dán hamé damáná tinnay sará patkagén awali nánay bu tálán butag.
Bale Kamál! Tará sohbá tir o bambáni tawár pád kanant. Tiráni pashang tai kapódar ant. Taw ke pád káay o sellén gwátéá ginn kasshy. Tai átrápá nánay ennán, thóp o bambáni bu kayt. É mazanén tapawaté, sakkén mazanén tapáwaté.
Salám Eláhi