“Ay! Hecch nagoshay taw?”
“Ché bogoshán?”
“Hecch magosh.”
“Zánay man chiá hecch nagoshán?”
“Ennán.”
“Man kessahé nebeshtah kanagá bitagán bale ni yakk jáhé gatthetagán.”
“Godhá man chón kanán?”
“Taw… Taw mani kessahá gósh dár, balkén ráhé dar byayt.”
“Hmmm, sharr ent, byár kessahá.”
“Es Em Esay sará kessah árag nabit. Man tará pawn kanán.”
“Kammok sabr kan. Dazgoháré neshtag. Rawt godhá tará hál dayán.”
………………
“Halaw. Dazgohár shot?”
“Haw. Man drógé bast o gallént. Háháhá.”
“Taw drógay bandagá kassi haddá naay. Máshallá!”
“Yes boss.”
“Arrr! Taw maná dónt wa. Maná drógbandáni master kot.”
“Haw. Tará kellán. Mani dróg taw bandáént.”
“Sád báragén jágahá sedit. Sharr, godhá kessahá gósh dár.”
“Haw bogosh.”
“Kessah chosh ent ke bachakkéá jenekké dóst bit. Métagay dód o rabédagay redá bachakk wati lógay mardomán jenekkay petay kerrá ráh dant. Jenekkay pet áiá zámát kant. Chizzé moddatá rand sir bit. Sálónk lóthit ke gón bánórá retk o réch bebán bale bánór watá dir dir dárit. Sálónk goshit balkén nók ent, lajjy kant. Kamm kammá sharr bit…”
“Balkén mardy dóst nabit?”
“Taw tahá dawr makan. Yakk baré sarjamiá góshy dár.”
“Gósh nadárán!”
“Parchá?”
“Taw mardomá dap janay.”
“Háháhá. Sharr ent bábá! Dap najanán, dast janán.”
“Háháhá. Shaytán!”
“Sharr godhá ni démá gósh dár.”
“Hal kessah.”
“Siray do say haptagá rand yakk shapé ke bánór wáb ent o sálónk angat ágah ent, bánóray gréwag o hiskáragay tawár kayt. Gréwagay tahá á bachakkéay námá gipt. Sálónk chárit dán bánór wáb ent. Á zánt ke wábé distagy bale hamé gappá paréshán bit ke bánórá é bachakkay nám chiá gept. Sálónk bachakká pajjáh kárit. Hamé bachakk bánóray syádé. Endege róchá sálónk bánóray kerrá nám gipt ke taw dóshi wábay tahá grétag o pelán bachakkay nám geptag. Bánór é gappay eshkonagá paréshán bit bale hecch nagoshit. Wahdé sálónk báz chondhity godhá bánór hamé antá paddar kant ke maná hamé bachakk dóst bitag bale petá maná gón taw sir dát…”
“Oh. É kessah rásté, drógé?”
“É ázmánké. Eshiay tahá dróg o rást doén hawár.”
“Háháhá. Báz zánay taw.”
“Chinchok zánán?”
“Man ché zánán?”
“Háháhá. Nazánay godhá démá gósh dár… Sálónk é gappay eshkonagá gamig bit bale mazandelé bit. Áiá bánóray sará bazzag kant. Goshity agan taw hamá bachakká gerag lóthay, man tai yalah dayagá tayár án. Bale bánór goshit á bachakk zahrá dege jágahé zámát bitag o do róchá rand sir enty. Sálónk nazánt ke chón bekanán. Bánórá jost kant. Ni shawr ché ent? Bánór hecch nagoshit. Bass grét…”
“Béchárgén bánór.”
“Chón, tará bánóray sará bazzag kant? Sálónkay sará nakant?”
“Sálónk bachakké. Ázátter ent. Ráhé dar géjit. Pa bazzagén bánórá dráhén ráh o dar band ant.”
“Yakk ráhé wa pach ent.”
“Kojám?”
“Mardá dóst bedárit.”
“Hmmm. Dósti zór nabit.”
“Hayr. Sharr, ni démá gósh dár. É mard o jan nádelánkasshi yakk o domigay hamráhiá chizzé sál gwázénant. Áyán chokké ham bit. Yakk róché mard gón dege jenekkéá dhikk dant. Chizzé róchay tahá áyáni pajjáróki mehray tahá badal bit. Bachakká anchó samá bit ke mani zenday hakkén hamsapar hamesh ent. Á jenekká goshit taw maná dóst bay bale é gappá jat nakant ke maná jan o chokk hast. Áiá torsit ke chó mabit hapógiay torsá jenekk cha dastá borawt. Ni kessah hamedá atkag o óshtátag.”
“Godhá?”
“Godhá ché? Man nazánán ke é dráhén gappáni zánagá rand jenekk gón é mardá sir bekant yá makant. Nazánán kojám wadhá kessah sharter bit. Man hamedá gatthetagán … Taw ché goshay?”
“Hmmmmm.”
Nágomán