Byá oo Morid, byá oo Morid, byá oo Morid déwánagén
Byá byá ke diwáné kanon, mawlánag o mastánagén
Sótkag tará eshkay zaráb, márá gamán kortag kabáb
Taw Hánolay dardán zaray, má pa watan jánánag én
Chákar tai dóstá pollet, chammá dege dhongán watan
Taw sar pa shaydái shotay, má pihanán zendánag én
Taw Hánolá esht o shotay, mádhiá mirén Chákaray
Má Hánolay molká nadaon, jawrén badán delmánagén
Eshtay watan pa Makkahá, luchén malangán gón shotay
May Makkah o más ent watan, naylon watan sháhánagén
Pardés taw mán Makkahá, shayrán zahirnálén jatay
Má kaptag zendánay tahá, shayrán janon rendánagén
Hejray cha dard o durián, band band wati dág dátagay
May band o bandán sóhtgant, jawrén badán mastánagén
Taw zortag kachkól o hasá, kudhén jahán dátag yalah
Dar kaptagon sarbáziá, má pa pedhá mardánagén
Park hecch naent mayg o tai, dardá o zerday ácheshá
Taw Hánolay eshká ganók, má pa watan déwánag én
Mán shayr o eshkay daptarán, dánke jahán hast ent taw ay
Má ham jaháná yát bon, mán majlesán parwánagén
Pollén Morid, pollén Morid, byá gón pakiri bátená
Gósh dár shayrán shakkalén, gwashtag Nasir dirzánagén
Gol Hán Nasir