“Chizzé róch ent Payzbokká gendag nabitagay?”
“Haw. Dazgoháréay sir bitag. Gatth bitagán.”
“Sargwap bitagay zánán?”
“Háháhá. Ennán, man kár kotag gón.”
“Che kár?”
“Anchén kár. Sir wa hoshkén kár o cholópagé.”
“Siray washterén kár wa nách ent. Taw kotag gón?”
“Háháhá. Ennán, man nách nazánán.”
“Chó chón bit? Marchán wa jenekk zabr ant.”
“Haw bale man nazánán.”
“Chiá?”
“Shawk nést.”
“Chéay shawk hast godhá?”
“Hecchay.”
“Taw hamá bádsháhay jenekkay kessah eshkotag ke hecchay shawky nést at?”
Jenekk hecch nagoshit.
“Hán. Taw hecch nagoshay?”
Angat jawáb nést.
“Dazgatth ay? Sharr, godhá yakk baré wassh ent.”
“Bósht. Anni ke man gón taw gapp o rappá atán shátolé atk o mani lapthápay sará nesht.”
“Taw zánán dróg mabanday tará wassh nabit?”
“Tará báwar nakant?”
“Ennán. É ni báwari gappé? Lapthápé naent, Kéchay chenál ent ache!”
“Man zánt taw bawar nakanay pameshká mobáelay sará shátolay aks gept. Anni tai sará démy dayán?”
“Sharr. Démy day bárén. Cha nethá zortagéné naent na?”
“Ennán. Esh ent becháry. Eshiay tahá mani tai annigén gapp o rappay boks ham záher ent.”
“Haw, é laybukké naent na?”
“Pokkaw! Choshén bébáwar…”
“Agan é hakk o delén shátolé godhá eshiá kamál ent.”
“Shátolá kamál ent yá maná?”
“Tará chiá?”
“É náyábén aksay gerag kamálé naent?”
“Sharr, godhá tará ham kamál ent.”
“Mani bárigá nákámén delé goshit: Godhá tará ham…”
“Háháhá. Taw bogosh, shátol chón atk o nesht?”
“Wat atk.”
“Wat chón kayt? Taw lapthápay sará dán rétkag zánán?”
“Háháhá. Ennán.”
“Godhá chón atk?”
“Nazánán. Har róch kayt. Anchó ke man lapthápá démá kanán, kayt o nendit.”
“Naréné balkén?”
“Stupid!”
“Godhá Payzbokkay cháragá kayt?”
“Háháhá. Balkén.”
“Monir Mómená goshtag kapót déwánagén morgé bale tai shátol padáter naent.”
“Balkén áiay kampyutaray sará kapóté neshtag.”
“Háháhá. Haw, chó bit. É shátol sakk rámag ent gón taw. Taw dáshtag balkén?”
“Haw. Man kammok dáshtag.”
“Kammok? Chón bezán?”
“É paym ke dhabby mani kóthiá dratkag bale áp o támy mani kasterén brát kant.”
“Hán. Godhá dáshtagéné. Rámag ent. Eshiá déwánagi nagoshant, mehr goshant.”
“Mehr ham déwánagié.”
“Hmmm. Godhá éoká shátol naent. Dege bázéné ham hamé námay hakdár ent.”
“Dege kay?”
“Wat bezán.”
“Man ché zánán. Donyá déwánagá porr ent.”
“Man donyáay na, tai déwánagáni gappá án.”
“Pa man kass déwánag naent.”
“Agan kasé bebit godhá?”
“Hmmm. Godhá dhabbáy kanán, lógay démáy dranján!”
“Háháhá. Wati lapthápay sará nendagáy kellay?”
“Stupid!”
Nágomán