Zemestáni ápbandén shapé at. Téwagén métag ensertagat bale chizzé mill passend molkáni sará bastagén á báná angat bramsh o chedhekká hast at. Baré baré chó borzén thahké yá cha galá dar atkagén krishtagé ham rost ke agan mán é béwánkén átrápá métagay mardoméá beshkotén, yakk baré wa góshy mekk bitagatant bale padá bechkandáná gón wat goshtagaty, “É hamé shaytán bant!”
Amin, Jámol, Azhrap, Wáhed, Salim, Piral o Mahmud métagay mawáli atant. Enshapi haptén sangatán padá mán é báná sharábi majlesé thahéntagat. Thaypá Barkatay sawté per at. Pajjigá gapp o rapp at, kandag o krishtag at. Haptagé yakk randé áyán é wadhén delwasshén majles jamént o jágahesh Jámoléntáni dhegáray sará bastgén hamé bán at.
Jámolá modám gosht ke é wadhén majles bázár o lógi chizz naant. Garmági shapán mardom washkawshén getánán benendit o bonóshit o zemestáná dhegáráni sará bastagén bápén bánáni tahá.
Diwán garm geptagat. Á chingor nóshagá atant o chángor kanwará atant. Aminá gosht, “Yár! Zi maná Náku Pashambehá gránén josté kot.”
Drost delgósh bitant.
“Nákuá jost kot moshók sharter ent, sharáb?”
“Godhá taw ché gosht?” Mahmud nazzikterá kenzet. Áiá sharáb o moshók doén kot bale é bárawá hejbar hayál nakotagat ke kojám sharter ent.
“Man gosht moshók Patháni neshahé, sharáb Engrézi neshahé.”
“Háháhá… Godhá Nákuá ché gosht?” Azhrapá cha lóhigay boná thahk dát.
“Nákuá kandet o hecch nagosht. Padá man jost kot ke Náku taw moshók parchá kanay? Nákuá hamé jost mani némagá shápt ke taw sharáb parchá waray? Háháhá… Man gosht Náku man sharáb nawarán. Baré baré biari dhabboké warán, péshápay wástá sharr ent. Nákuá gosht, gitté naent kakkáé!”
Drostán kandet. Aminá padá gosht, “É jost mani delá beh nayatkag. Shomaygá atkag?”
“Kojám jost?” Piral bárén che hayálán at.
“Hamé ke moshók sharter ent yá sharáb?”
“Adhay dhubbá! É ni josté, moshóká káray sharábay matth kanay?” Jámolá balgáh kot.
“É norr hamesh ent. Golátun chó ápi márá ent. Anga kaptag syáhundhagén Goluay randá.” Mahmudá chá némagá kukkár kot.
Kandag o kukkár rostant.
Aminá dap pallagósht. “Gapp moshók o sharábayg ent. Shomá zór Golu o Golátunay némagá bort.”
“Gapp yakkén ent. Golu moshók ent, Golátun sharáb ent…” Azhrapá Amin mán tarrént. Amin saray kechénagá lagget.
Salimá Aminay sará chánpathé jat o gosht, “Pamé gappá náché bebit.”
Drost pád atkant o shoru bitant náchá. Amin gónzalichandhá át.
Hamé wahdá yakkéá darwázag thokket. Áyán goshád goshádá thayp band kot. Bótal o bolór chér dátant. Watárá gég o gwar kot. Padá Amin shot o darwázagy pach kot. Gón darwázgay pach kanagá áiá cha hayrániá setth kot. Jenekké gwahray sará óshtátag o drahénagá at.
“Adhay! É wa Moluk ent!” Aminay dapá dar atk. É métagay gong o ganókuén jenekké Moluk at. Amin o Mahmudá yakk o domigay némagá cháret o chammui chamm shawré kot.
“Byá tahá,” Aminá gosht o Moluk tahá potert.
“Shumm! Taw é shapay nehengámá ingor ché lóthay?” Aminá darwázag tahá bast o Molukay dastá gept o wati némagá zhappet. Moluká gón hazetagén chammán á cháret o zór jat pa rawagá. Pardagé cha áiay dastá belagoshit ke Salimá ham ropt. Moluká kukkár kot.
“Soray meray!” Mahmudá cha lánká trepenákén kárché kasshet o Molukay gotthá per mosht. Á béchárag neggotth but.
“Haráb naent!” Piralá Molukay némagá hirt hirtá cháret.
“O pa wahd atkag,” Aminá bechkandet o dasty pa Molukay ánjagá bort.
“Belly shumm! Eshiay sará ham nakapay!” Azhrapá kandet o Aminárá panché dát.
“Godhá dege che kárá kayt, é?” Salimá Aminay bon dásht.
“Náchy parmáén. Man beh mojrá nacháretag. Ché goshay ostád?” Jámolá Piralay némagá cháret bale Piral dodelag at.
“Taw ham gwáh kanay Jámol! Moluk o mojrá? Belly angat má wati kóloká pachén.” Aminá watá jahlá kechént.
Mazanén kukkár o jaggáéá rand hamé paysalah but ke awalsará nách bebit, randi randigé. Thayp padá chálu but. Kaddah padá kayl bitant. Kárchay torsá Moluk ham soragá lagget. Bachakkán bolór dastá kotant o ér kaptant náchá. Náchay tahá áyán baré Moluk dast jat o baré goláésh kot. Á anchó gal atant goshay gazhdálén Moluk naent, Katriná Kaypesh dastá kaptag.
Dán sharrén sáhatéá nacchag o traddagá rand bachkkán dam bort o neshtant. Bécháragén Moluk angat náchá at.
Chandhény, chandhény!
Yalah day sréná, zálem!
Drahény shank án!
Bachkkáni kukkárán bán jaksagá at. Molukay chamm rombodhagá atant. Nách náchá anágahá á dém pa darwázagá shot o ched o pésh ke bachakk pád byáyant, áiá darwázag bótk o tiraygá dar shot. Salim o Amin tattaráná dombáy kaptant bale á chó áská traddáná chammán andém but.
“Shot, mátkos!” Mahmudá cha zahrá záhé dát.
“Záhy maday, bogosh:
Bágay bolbol mani shot
gón maná zahr ent.”
Piralá gón wazhgotthi gosht.
“Démy chosh at. Mani hayálá Sórekay némagá shot.” Amin angat hamángor cháragá at.
“Hayr, sóchy.” Salim padá atk o wati jáhá nesht.
“Amin benend ni. Bazzagá may shap wassh kot.” Wáhedá Aminay dastá gept o zhappet.
“Ennán, mardomá kopté kasshetén godhá bay at.” Amin bazhnig at. Édege kandagá atant. Kandáná Azhrapá porrén bótalé dastá kot o dáktar Málekay gálewárá gosht, “Che! Porréné, taga!”
“Pachy kan yár! Chópény,” Jámolá gosht.
“Na yár! Haddá magwazet. Eshiá bándá warén.” Piralá delá naat. “Shomá hamé sój naeshkotag ke sharábá bwar bale sharábá mayl ke tará bwárt.”
“Má eshkotag yár! Bale taw hamé batal naeshkotag ke marchigén kárá pa bándátá ér makan?” Jámolá bótal zort o gelásán thallát.
Áyán nóshag halléntagat o shámá kasshagá atant ke padá yakkéá darwázag jat.
“Piral! Tai bágay bolbol ent,” Wáhedá halwat kot.
Amin padá shot o darwázagy pach kot. Dhanná do shálpóshén mard óshtátagat. Aminá á drost kotant. Yakké Molukay brát at o domi áyáni hamsáheg. Gón darwázagay pach bayagá Molukay brátá jost kot, “Adhay! Shomá Moluk ingor nadistag?”
“Byáet tahá, dhnná gwahr ent.” Aminá á saláh jatant. Molukay brát ke Molukay wadhá aglá tanakk at pa poteragá delmánag but bale hamráh nasoret. Goshty, “Má eshtápig én… Nanendén. Má Molukay shóházá tarrán én. Shomá nadistag?”
“Ennán má nadistag.” Aminá drógé shápt o padá jost kot, “É shapá chetawr dar atkag cha lógá?”
Molukay brátá gosht, “Shummá waragay sará zahr kotag. Goshit máshbatth nawarán, morpolaw lóthán. Sháhá próshtag bárén koj ent. Rastaré maderrity sharr ent.”
Molukay brát norondháná rah gept o hamráhy randá but. Aminá darwázag bast o atk o nesht. Dán kammokéá kassá hecch nagosht. Padá Azhrapá bétawári prósht.
“Amin! Máshbatth washter ent, morpolaw?”
O drostáni kukkár o krishtagán bébramshén shap jaksént. Gón kandagáni eshkonagá Molukay brátá ke taháriá traboz warán at, gón hamráhá gosht:
“Shogr ent, é sharábiáni dastá nakaptag.”
Nágomán