Bángwáhay nódgónagén gitaluá har némagá mán shántagat. Man cha bázárá dir mittápén dhann o dhegárán tarrán o sayl kanán atán. Band o shép, kandh o béth, jahlag o borzagáni sará baré gám o baré tacháná man sakk gal atán. Nagoshay zeminay sará gitaluay tahá tarragá atán, goshay ázmánay démá kisshén kókeráni tahá bal atán.
Gitaluay wahdá bázárá dhann o cha mardomán dir, bébramshén jangal o gyábánán tarrag maná sakk wassh bit o anni ham man hamé wástá bángwáhá cha lógá dar atkagatán.
Haptagé pésar hawrá gwartagat. Man ápá porrén, némánén yá bortagén dhegárán sayl kanán o rawán atán o sakk gal atán. Man chó hamá morgá atán ke dán gappadhé wahdá chádhpróshén dhabbá band bayagá rand yalah bebit.
Áp o dhegáráni nedáragán maná kasániay tránagán perrént. Maná yát ent ke har wahdá ke jambarán mán shánt, man gón wati hamgangalián dast mán dast but o gerd gerdá chakarretán yá wati chapp o chágerdá torr wárt o “Hawru! Hawru! Ér day, ballokay chokkán chér day”ay laybi sawt jat. O agan hawrá ér dát ham, má wati drekk o dawr o layb nadáshtant.
Hawrá rand ju o shépáni kerrá óshtag o jogg o kapén háray chárag, waddhagán dhegárok bandag, gón gelá thóptráki kanag, kandhán ján shódag o ápi layb kanag. Droh maná gir atkant. O esháni pajjigá maná shahdáday hayál atk ke cha darkasáni mani sharterén sangat at o hamé wadhén zébá o yátgárén sáhatáni hamráh at.
Shahdáday hayálay áyagá man áiay mát truá Shali o pet náku Shahmiray tránagá kaptán ke manárá chó chokká dóstesh dásht. Maná say sál porrén at ke á nadistagatant. Man delá gosht ke ni ke man cha lógá dar atkagán, yappárigé rawán, Shahdádéntán chárán. Man dém pa Shimáziá rah geptán.
Chónáyá mani lóg Shamdará at o Shahdáday Shimáziá bale doén métag nazzik atant. Man o Shahdádá Shimáziay eskólá dán panchá hórá wantagat. Panchá rand wánagay jágah shahr at o má hardo tangdastén mardom atén pameshká may wánag yalah but.
Man ke master bitán godhá Dabiá puriágeri kanókén syádéay barkatá maná bági káréay wizáé raset o man dém pa Dabiá shotán.
Say sál ódá gwázénagá rand man hamesh ent payri sabáhá atkag o wati métagá rasetagatán.
Sangat o pajjárók o nazzik o gwaray bázáráni mardom mani wasshatk o jódhiá o Dabiá shotagén wati kas o mardománi hálay porsagá atkant bale é doén róchán Shahdád yá náku Shahmir yá truá Shali, chareshán yakké ham mani cháragá nayatk. Man paré gappá hayrán atán chiá ke Shimáziay bázén mardomé mani wasshatká atkagat. Yakk o do randá man tránag kot ke Shahdádéntáni jostá kanán bale mardománi rawwá o ádháwádhiay tahá man pahk shamoshtán o anni é gitaluá ke maná áyáni hayál atk, man dém pa Shimáziá rah geptán.
Ni maná sabr bayagá naat. Delá lóthet ke hamé damáná áyáni kerrá berasán bale master pád atant, del naat.
Gón mani gendagá á chetawr gal bant, hayrán bant! Shahdád drájén “ikoku”é jant o maná goláésh kant. Náku Shahmir o truá Shali maná gappadhé nékdoá kanant. Padá shircháh bit o pajjigá gapp o rapp o kandag o maskará bit. É gitaluá shircháh chetawr wassh ent!
Man gám trondter kotant bale gón é hayálay áyagá padá konth bitant ke man hoshkén dastán áyáni kerrá rawagá án. Chónáyá man paráyán cha Dabiá sharrén thiki o sawgát áortagat gón bale lógá ér atant o ni wátarr kanag o áyáni árag maná tahmbol nabut.
Agan anni maná á sawgát gón bitén ant, paráyán Shahdádá dege “ikoku”é jatagat o truá o nákuá “mani chokk! Watárá chiá kyámat kotag? Nalóthit inchok”, chó goshtagat o dege gappadhé nékdoá kotagat.
Gitalu ámáchén bale washzédén jáh o dayárán cháráná man zittán Shimáziá sar bitán. Shahdádéntáni lóg bázárá kammé passend ródaratki némagá at. Man tachká hamódá shotán. Lóg kobl at. Choljáhén koddhokay gezdapig ham gón sádá mohr thathátag o bastagat. Kass ódá naat. Man ingor o ángor cháret. Gitaluá kash o gwaray lóg ham alkápá maym nabitant o nanke mardomé záher at ke jost bokotén. Man hayrán atán ke bárén Shahdádént kojá shotagant. Lóg ke kobl ent balkén laddhetagesh o dege jáhé shotagant yá pa eláj o saparéá shotagant. Padá maná hayál atk ke bit kant molkay saray lógá ant. Bale anni choshén zyádahén molki kár nést ke bázáresh yalah dátag o ódá shotagant. Háméná say máh ent ke éraht bitag o dege keshár o dahlé nést ke pánegi lóthi. Albat laday janag, dhegáray bortagén jáháni bandag o dege hamé paymén kár o cholópag hast bale é ham choshén kár na ant ke mardom laddh o lóg molkay sará borawt.
Daningah man hamé hayálán atán ke say chár gwandhu cha démay lógáni némagá dará but. Traddán o layb kanáná mani kerrá gwastant godhá man charáyán naku Shahmiray jost kot. Á goshay kammé hayrán bitant. Awali randá maná sharriay sará cháretesh. Yakk bathérokén zahgéá gón chacchén zobáná passaw dát, “Nátu wa moltay shalá ent.”
“Molkay sará ent? Parchá?”
“Man nazhánán wat. Wat shotag.” Áiá passaw dát.
“Kadi shotag?”
“Dél ent.” Zahgá passaw dát o man pegrá kaptán ke anni molkay sará che wástá shotagant.
Gwandhu layb kanáná démá shotant. Man nazzikay lógay mardomán ke mani syád atant, ham jost nakot o dém pa náku Shahmiray dhegárá rahádag bitán chiá ke man zánt ke syád yakk o doá maná rawagá naylant. Salám o alek drájkassh bit o cháhwári bit o diwán bit o man yakk kalákéá allamá rollán. Mordani ent hamé syádán Dabiay rawagá pésar maná dapi josté ham nakot bale ni ke maná omét mánt at, droh pa man tonnig atant.
Man zittán náku Shahmiray dhegárá rasetán. Dhegáry ápá porr at o hákichakén ápay tahá mekkén borz o pathakkén macch sakk brahdár atant. Man gerán bitán o patanén banday sará bastagén kápar o karginay némagá shotán. Káparay chérá kass nést at. Yakk mazanjónén kutthén babbarién bozé káparay dárá bastag o káh waragá at o do jádhén shenekk áiay kerrá tachag o traddok janagá atant. Karginay gezdapig pach at o chedhekkáé ham hast at.
Man daningah hamedá óshtátagatán ke cha lógay poshtá tayárén narázé chángáná dar atk o mani nazziká atk o óshtát o wakkag o gorragá lagget. Paráiay torsénag o gallénagá man wati nazziká kaptagén sarchópén sengay chest kanagá jahl bitán ke cha karginá náku Shahmirá sarok kot o gón mani gendagá hayárán but. Kochekky hakkal kot.
“Mani chokk, Shiru! Taw ay?” Náku nazziká atk o maná goláéshy kot o gréwagá lagget. Mani chamm ham ars bitant.
Wasshatk o jódhiá rand man o á karginá shot o neshtén. Nákuá cháh grástagat o chollay kashá eshkeráni sará pa halagá éry kotagatant. Lóg cha dittá porr at chiá ke dár namb atant, rók wa bitant bale sakk dittesh kot. Mani chamm ars bitant o man kollagá laggetán. Náku pád atk. Cháháni karaw o kópy zortant. Cha drangá parzónagy ér kot o darráénty, “Borén dhanná, Shérján! Edá ditt ent.”
Má dhanná dar atk o káparay chérá tahtay sará neshtén. Náku gón shircháh o shapay sar atkagén naganán haraz bandagá lagget. Man éoká shircháh waragá atán.
“Nagan bwar gón, mani chokk.” Nákuá maná saláh jat.
“Nawarán, náku. Anni wártag, pédág án.” Man drógé bast chiá ke é gitaluá éokén shircháh washter at.
Man hayrán atán ke náku molkay sará chiá neshtag o Shahdád o truá Shali koj ant. Wahdé nákuá maná hayál kanagá dist, josty kot, “Shérján! Taw kadi atkagay?
“Man payri sabáhá atkagán. Taw mani cháragá ham nayatkagay.” Man gelag kot.
“Mani chokk, marchán man hamedá án. Bázárá sakk sakká narawán pameshká donyáay hálá hecch sahig na án. Man tai áyagá sahig biténán, chetawr nayatkán?” Man sar sorént. Náku goshagá at.
“Bázárá baré baré man rawán. Waragi chizzé, dege sámáné gerán o kárán o haptagáni haptag hamedá án. Edá washter bit maná. Wati wadhá án.” Man hayál kot ke é kamásh hakk o del, wassh o delsáchén zendé gwázénagá ent.
Hamé wahdá shenekkué traddáná atk o gwarbáskay sará érén mani dastay chonki lankoky dapá kot o gón wati bédantánén árikán jáyagáy lagget. Maná keli but bale é keliay tahá ajabén lezzaté mán at.
Gitaluén sabáhéá cha bázárá dir, garmén shircháhay gotth gerag o dhegáray hákichakén ápay tahá óshtátagén macchán chárag chónén wasshén chizzé bale é hamokay bahtá nabit. É pa bázá éoká wasshén hayálé bale pa man zendagén gwáchené at o é porchádhén nedárag o mósomay wasshi o lezzat hordokén koluá gésh kotagat ke mani chonki lankoká gón wati bézór o bédantánén árikán wati mannán jáyagá at.
Man pa sahtoké kollén jahán goshay shamosht. Lezzatay chawlé mani jánay band bandá sheng but o jánay pothy punzharéntant bale domi kattrahá maná Shahdáday hayál atk ke man daningah nadistagat. Wasshiay jáwar érmósh but o man padá hakkigén donyáyá atkán o cha nákuá jost kot.
“Náku, Shahdád koj ent? Nagendány, mani cháragá ham nayatkag.”
Shahdáday námay eshkonagá áiay dast drahagá laggetant. Kópy tahtay patansarén pádagay sará ér kot ke cháh marechant. Gón arsigén chammé goshty,
“Shahdád é donyáyá naent.”
Shircháhay wasshén tám mani dapá jawr but. Man gón nábáwarén chammán nákuá cháragá atán o áiay sar jahl at. Shahdád é donyáyá naent? Maná gillótagán gept.
“Náku, chón bitag Shahdádá?”
Nákuá gosht, “Mani chokk, do sál bit á gappá. Á róchi may pasé gár at. Shahdád shot ke pasá shóház kanán. Áyagá déry kot. Bégáhá shotagat o ni sarshap at. Shaliá peri peri kot godhá má hamé shapá bázár pa bázár, lóg pa lóg tarret o jost kot bale kassá nadistagat.
Endege sabáhá pas wat atk o Shahdáday bárawá hamé hál atk ke zi magrab tahárá pawjiáni kaympay poshtá, hamé kawrá rawagá bitag ke balkén pas hamángor ent godhá pawjián geptag ke taw sarmacháré ay o jatagesh. Náhakká kosht zálemán. Shahdád may piriay hasá at, may yakkén chokk at, kosht rastarán, o bécháragén Shali ham Shahdáday jagarsendén gamán gón wat bort gón. Mát at, saggety nakot. Máhé kappéá rand áiá ham cha donyáyá sapar kot.”
…………
Á gitaluén sabáhá ke man gón shátkámén delé cha lógá dar atkagatán, gón grán o gamigén delé wátarr bitán. Ni gitalu chó dittá mani ginná gerán at.
Nágomán