Marchán Golám peknekán gón naent.
Chó beh nabitag ke sangat pekneká borawant o Golám gón mabit. Á waragay grádagá zabr at o may peknekáni kanwari at. Man chónáyá peknek thóliay mokimi báské naatán chiá ke man shahrá wánagá atán. Bass baré baré ke chotthián atkán godhá gón kaptán.
Yakk shapé hawrá gwart. Endege sohbá bachakk mocch bitant. Mósom wassh at. Peknekay shawr thahet. Má warag o charag chamedá zort gón ke balkén dár tarr bebant.
Zittán má peknekay jágahá sar bitén. Rasagá Mollá Morádá cha kissagá pattáay jódhié dar kot o gón Lál Baksh Ázát, Mahmad Jagar o Supi Nezará wánkiá shoru but.
Har wahdá ke má pekneká shotén godhá man yakk baré kammoké tarret o sayl kot o randá sangatáni diwáná atk o neshtán. Choshén wahdán mani hamráh Lál Baksh Ázát at. Man dém gón Ázátá kot. “Nayáay gón?”
Áiá pattáiay yalah dayag delá naat. Goshty, “Mani pád chawatthá jatag.”
Man gosht, “Kojám pád?” Áiá kandet. Zánty ke doén pádán goshagá naent.
Man éoká shépéá borzád bitán. Cha poshtá Golámá tawár jat. “Marchi Ázátay jágahá Golám tai hamráh bebit, chón ent?”
Man kandet o passaw dát, “Sar o chammán, wájah! Bale taw kanwar nakanay?”
Passawy dát, “Béhál ay? Warag gón. Marchi kanwar nalóthit.”
Man o Golám hamráh bitén.
Yakkén shapay hawrá drachk o dár rozhnáter kotagatant. Má tarráná nazziká kóhéá sar kapt o tholláy neshtén. Mósom sáp at. Hawrá zemin o ázmán shoshtag o sapá kotagatant. Charé kóhay thollá Gwahrag dán Kánig, téwagén Negwar dará at. Man gón Golámá gosht, “Maná é nedárag sakk wassh bant.”
Golámá bechkandet bale hecch nagosht. Man ham bétawárá mósomay saylá delgósh bitán.
“Yár! Maná gón taw gappé hast.” Kammokéá rand Golámá darráént.
“Bogosh.”
“Maná baláhén paréshániéá gwar jatag. Man édegeráni kerrá nám nageptag. Taw hamé pedhá dáktari wánagá ay. Balkén maná elájé yá sar o sójé bekanay.”
Man sar sorént. Golám goshagá at, “Taw anni wasshén mósom o nedáragáni gappá atay. Man pésará tai wadhá bitagán. Choshén nedáragán maná wasshié dátag bale marchán man chó naán. Pésará wahdé man wati damagay kóh o kawr, dhegár o machkedag, dasht o gyábánán tarretagán, del chó kóhá rostag, táhiré rasetag delá bale marchán chó naent…. Marchán wahdé man saylá dar káyán, dhéhay zéd o nedáragán gendán, del gimorit, takánsar bán. Dam pa saht hamé hayál kayt ke mani dhéh, é nedárag cha mani dastá rawán ant. Anchén wahdé kayt ke man esháni wáhond nabán… Hamá ent ke Bogthi o Bálách janag bitagant man anchosh án.”
Golám kammé bétawár but, padá josty kot.
“Tai hayálá man eláj lóthán?”
Man gosht, “Dhéhay dósti nádráhié naent.”
Golámá drájén ginsárté kasshet o padá wati gapp bená kot, “Bale man hecch paymá táhir gept nakanán. Mani shapáni wáb o rócháni árám shotag. Hecch kárá del per naent. Na sangatáni kerrá nesht o wasshén gappé jat kanán, na syád o wáreséay gendoká shot kanán. Dhéhay jáwarán gendán, del sochit. Róché do say warná bégwáh bit, róché do say lásh kayt. Mani kénag chó Bólánay kóhá rostag. Lóndhué gendán, del goshit saráy send. Taw balkén andázah jat makanay bale man angarán léthán án.”
Man á tasallá dát o gosht ke taw góli o darmán nalóthay, bass wati hayál kanagay wadh o paymán gehter kan. Har hayálé dáray bedár bale áiá chó bémahár makan ke tará táwán bedant. Har chizzá ráh o rahband hast. Zahr o kénagá ham.
Má dán dérán neshtén o gapp o rap jat o padá ér atk o bachakkáni némagá shotén.
Haptagé kappéá rand man padá shahrá atkán o wati wánagá dazgatth bitán.
Chizzé máhá pad man métagá shotán. Cha basay darigá nedáragán chárán atán. Kóh, kawr, tayáb o waddhag áyán o rawán atant. Hamé wahdá man Golámay tránagá kaptán o áiay hamá gapp mani góshán jaksagá laggetant… É nedárag cha mani dastá rawán ant. Anchén wahdé kayt ke man esháni wáhond nabán…
Shapá ke lógá rasetán, wapsagay wahdá ham Golámay habar mani góshán jaksán atant. Man delá gosht bándá Golámá hál dayán ke taw wati nádráhi maná shaksátag. Á kandit o gal bit ke éok naán, hamráhé rasetag.
Endege róchá sanatán pekneké kot, bale é randi Golám gón naat.
Man cha Lál Bakshá jost kot Golám? Áiá Sáhijiay kóhay némagá eshárah kot. O man sarpad bitán.
Golámá wati nádráhiay eláj dar gétkagat!
Nágomán