Kasániá man har shap cha ballok Hátuná kessah gósh dáshtag. Bé kessahá wáb nakaptagán o padá har shap nókéné lóthetag. Mátay lápshód o ládhok bitagán pameshká galnázi kotag, eshkotagén kessah dobar gósh nadáshtag.
Ballok Hátuná báz kessah yát at. Dán sálé kappéá man tamáshah kot. Padá yakk shapé áiay kessah kotthetant. Wahdé áortagéné bongéjy kot, godhá man kukkár kot ke é man eshkotag. Ballok Hátuná gosht, “taw kessah halléntagant, nókén cha kojá byárán?”
Bale man gerr bast. Á sahtoké bétawár but. Goshay wati delá kessahé sáchagá at o padá goshty:
“Hast at nomásagé. Hast at balloké. Nomásagá har shap ballokay kerrá kessah gósh dásht. Bé kessahá nawapt. Tai wadhá har shap nókéné lóthety. Haw, haw, yakk shapé ballokay kessah kotthetant.
Téwagén shapá nomásag wáb nakapt. Balloká tawret. Dir dege métagéá balloká kwahnén dazgoháré hast at ke báz kessahy yát at. Balloká gosht rawán yappárigé dazgohárá chárán o pa nomásagá lahté kessah ham kárán gón. Endege róchá ballok sarcháder but. Métag dir at. Ballok shap kapt. Sarshapá métagay nazziká raset bale taháriá bazzagá maym nakot o kórchátéá kapt o mort.”
Ballok Hátuná kessah hallént.
“Godhá ballok mort?”
“Haw mani chokk, ballok mort.”
May métagay nazziká ham kóracháté hast at. Man jost kot, “Á kórchát may métagay kórchátay wadhéné bitag?”
“Haw, o ballok ham mani wadhéné bitag.”
Man delá gosht balkén démterá hamé goshit ke nomásag ham tai wadhéné bitag bale áiá chó nagosht o latthá jekk dayáná shot o wati nepádáni sará wapt.
Man dán dérán wáb nakaptán. Á shapi man dege wadhén wáb dist. Kórchát atant, tahá ballok kaptagatant o dhanná nomásag neshtag o gréwagá atant.
Man dán moddatéá gosht zánán kórchátay kessah watgadhéné bale master bitán godhá zánt ke á shapi ballok Hátuná wati dazgoháray kessah áortagat!
Nágomán