Gádhi daggay sará shatór gerán at. Morwáred bázáray mardomán, mádhián, gádhián o drachkán gón hórkén didagán chárán at. Hecch chizz wassh naat. Daggay rásti kashá kabrestáná kamáshé yakk kabréay sará poll ér kanagá at. O Morwáredá hayál kot ke zend yakk kabrestáné, pollén wáhagáni.
“Taw shodig naay?” Áiay mard Zar Háná áiay némagá cháret. Morwáredá thémb cháret.
Némróchay do o ném at.
“Balay,” áiá gón némdeli gosht.
“Godhá sobáreg kojá kanén?”
“Lógá.”
“Lógá?” Zar Háná thahké jat. “Marchigén róch may zenday washterén róchán yakké. Lógá kay nendit o kónáit?”
Morwáredá hecch nagosht. Paráiá marchán dráhén róch yakk atant!
“Godhá Washtám restórán chón ent?” Zar Háná gádhiay ádénkay tahá á cháret.
“Dege jágahé narawén?” Morwáreday tawár larzagá at.
“Dege kojá? Cha Washtámá sharterén waragjáh hast?” Zar Háná yakk baré padá gón béparwáhi thahk dát o gádhi dege némagé táb dát. Démay chawká thraypek chó sartarrén purrá chakarroki warán at o gádhiáni danz o dittán har nedárag kórdém kotagat. Morwáredá anchó samá but goshay é ditt o danzén bázár áiay zend ent, áiay jend ent. Delay chawk… gamay thraypek… ranjay danz o ditt… Áiá pa béárámi dastáni lankok yakké domigá adhéntant.
Marchi áyáni siray awali sálgasht at. Anni á shahray kash o gwaray sarsabzén jáháni tarr o tábá bitag o pédág atant. Jangal o gyábán sakk wassh atant. Drachkáni tholláni sará neshtagén morgáni delárámén tawár har némagá sheng at. Kóhestáni taksh o kawrjuáni tahá nograhlápén máhigán ingor o ángor cherri jat. Mastén kawshá baztákén drachk loddhán atant. Á pádániá jangalá gashtant. Gádhiay sará dhawldárén jágahán tarretant.
Wasshén jágah o wasshén sáhat atant bale pa Morwáredá bélezzat atant. Á, dam pa saht Dósténay tránagá kapt. Haptagé pésh áiá Dósténay kágadé rasetagat. Á cha pésará bon at o kágadá thélay kár kot o ni á shap o róch wati awali o goddhi mehr Dósténay hayálán at.
Áiay mát o petay wáhag at ke á siray wástá pa Zar Háná haw bekant. Zar Hán mazanén séthi chokké at. Doén kahól shahray károbár o édege chest o érán yakké domigay nazzik atant. Hardo némagay kamásháni wáhag at ke á ched o géshter nazzik bebant bale Morwáredá Zar Hán bucché dóst naat. Áiay wábáni sálónk cha kasániá áiay hamsáhgén bachakk Dóstén at ke Morwáreday mardomán hecch mán nayatk.
“Taw goshay gón Dósténá sir kanán?” Áiay mátá yakk róché á mánband kot. “Taw chón nesht kanay é ádháláni tahá? Dósténay jend kangaláén tákkáré. Pety nézgárén sháeré. Máty Hodái jatthé. Dósténá geray padá pendhay?”
Petá ham bachakk nádóst at.
“Taw may yakkén chokk ay Morwáred! Má nalóthén tai zend barbád bebit. Mani mát! Man é bachakk o áiay mardomán sharr zánán. É charyá tai matth naent. Taw shahray masterén séthay jenekk ay. Wati o mani ezzatay kammé hayálá bekan o padá Zar Hánay lógá tará hecchay kammi nabit. Budnákén bachakké. Man delá jazm án yakk róché á shahray masterén bápári bit.”
Áiay wábáni sálónk Dóstén at bale áiay mardomán marg kot o á gón Zar Háná sir dát. Morwáreday sirá rand Dóstén delprósh but o watá háltákay bonjáhi kárgesá ke dege shahréá at, badaly kanáént o ni hamángor at.
Washtám restóránay dapá gádhiá dásht. Hardo ér atk o tahá potertant. Restórán angat hamá wadhá at. Hecchizz badal nabitagat. Kárendah, korshi, thébal, diwáláni démá jatagén aks, koll hamá atant. Agan badal bitagat áiay hamráh… marchi Dósténay jáhá Zar Hán at.
Morwáreday chamm diwálá jatagén hamá aksá shotant ke áiay tahá bachakké o jenekké yakkén srópá pajjiá gatth chenagá atant. Dósténá harwahdá ke é aks dit, pa maskará goshty: “Eshán sróp kosht o ér kot!”
Morwáreday dast béenáni pandólá shot. Áiay lankokán wár wárá hamá kágad gept ke Dósténá chamángor gón áókén nazzikén sangatéá gón kotagat.
“Mani Moru!” Dósténá nebeshtagat. “Zi may háltákay kárgesá jenekké wati káréá atkagat. Báwar kan tai dárén sar at. Man á delay sérá cháret. Ni ke taw cha mani dastá shotagay báyad ent man tará béhál bekanán bale chón kanán ke máhekánén shap, sáchánén róch, saminén sohb o abétkén bégáh o drostán gésh eday sharrangén jenekk maná tai shamóshagá naylant.”
É wazhgappén Dóstén at. Pa sirá Dósténay kash o gwará jenekkay kammi naat bale áiay del angat paráiá band at.
“Moru ján! Dege taw hál kan. Zendagi chón ent. Gón Zarr Hánay zarrán laybá ay yá Dósténay dóstiá zaragá ay?”
Démterá goshtagaty:
“Mani gapp angat hamá ent. Agan taw zenday chapp o chóthén ráháni mosáperiá dam bort, byá pa man. Man angat tai wadárá neshtagán.”
“Morwáred! Taw wassh ay?” Zar Hánay tawárá á cha Dósténay donyáyá dar kot.
“Haw, bass kammé dam bortag.” Áiá bechkandag lóthet bale lonthán hamráhdári nakot.
“Sharr, godhá ni nagan warén.” Zar Háná wati korshi démá kenzént. “Waragá rand rawén dokkáná. Marchi tará hamá sawgátá dián.”
Kammé dérá rand á shahray tahá saht o zéwaray masterén dokkáná poteragá atant ke marchi géshter rassh at. É sháhi dokkánay wáhond Zar Hánay jend at. Gerákáni mocchiá ráh kanáná hardo dém pa dokkánay kárgesá rawán bitant ke dakalay rásti kashá at o Zar Hán modám hamódá nesht.
Anágahá Morwáredá bachakké dit ke sohray dhawldárén háré dozzagá at. Morwáreday gám konth bitant. Hamé wahdá dozzay chamm ham paráiá kaptant. Dozzay chammáni tahá anchén bazzagén o rahmlóthén dazbandié záher but ke Morwáredá goshádiá dege némagé cháret. Anchó bezán hecchá sahi naent. Goshay á wassh at ke dokkánay har chizz anchó dozzag bebit… Dokkánay wáhond Zar Hán ham.
Morwáredá démá rawagay erádah kot bale Zar Hán óshtátagat. Áiá dozz ditagat.
“Begeret á bachakká, sohray háré dozzetagy.” Zar Hánay borzén tawár jakset. Hálá sádhién dráhén mardomán chakk jat. Dozz tachán but o cha nazzikterén darwázagá dar shot. Dokkánay do say kárendah o dhanná óshtátagén gáth dozzay randá kaptant.
Anágahá dhanná gádhiéay berekkán chiskag jat. Kaséay chihánth chest bitant o mardomán dit ke dozz daggay sará léth gerán at. Gádhi wáláyá ke warná kapagá dit, gádhiy téz kot o hoshke syáh shot.
Morwáredá watá dásht nakot. Á cha dokkáná dar atk. Zadagén warná dém pa chér kaptagat o náragá at. Morwáredá lóthet ke warnáay kerrá borawán o áiay hónréchén sará kóndhá bekanán o bogoshán: “Man dardig án ke taw gerag bitay.”
“É dozzé! Háry gón ent. Patthety.” Zar Háná gón dokkánay kárendahán gosht. Áyán dozz patthet bale háresh nadit. Mardomán soksok o halwat bongéj kot. Zar Hán kammé béwár but o goshty: “Man chamme wat dit. Háry dastá at.”
Thappigén warná dardáni haláhóshá náragá at. Morwáredá á cháret nakot o pa dokkánay rawagá pad tarret bale anágahá óshtát. Warnáay dozzetagén hár áiay démá kaptagat. Morwáredá ingor o ángor cháret. Mardománi delgósh gón thappigén bachakká at. Á jahl but o wati pádáni démá kaptagén háry chet o mocchá kot o pandólá kanagá gég at ke Zar Hán áiay nazziká atk.
“Eshiá espetálá baret.” Zar Háná yakkéárá gosht o Morwáreday dastáy gept o dém pa kárgesá rah gept.
“Mardom goshant balkén dozzé naent, man anchó shakk kotag bale man chamme wat dozziá dit. Kambahtá hár bárén kojá chér dát?” Zar Hán goshagá at. Morwáredá hecch nagosht. Áiay hárién dast angat Zar Hánay panjagá at.
Kárgesay poteragá rand Zar Háná áiay dast yalah dát o dam bortagén mardomay wadhá zhambagá korshiay sará nesht bale padá yakdam chest but o hoshk o hayránén Morwáredá zánt ke parchá. Drapshókén háray lamboké charáiay mocchá lónján at o Zar Háná ditagat.
“É… É cha kojá atk?” Zar Háná hár charáiay dastá chámpet o cháret. Morwáredá trekkag nakot.
“É hamá hár ent ke bachakky dozzagá at? Tai kerrá chón atk?” Zar Hánay gálewár zebr at. Áiá angat hecch nagosht.
“Bogosh na, é hár tai kerrá chón atk? Taw chet?” Zar Hánay ásgwárén chamm áiá sakk atant o á chó botá gong at.
“Bogosh taw parchá chó kot?” Zar Háná gorret. “Mani ezzatá lillám kanag lóthay? Bogosh.” Shot trondén shahamáté o Morwáred tattaráná boná kapt bale zukkagy nakot. Á anchó bétawár at goshay hár bachakká na, áiay jendá dozzetag.
Gón shahamátay janagá Zar Hánay zahr kamm tarretant. Kammé pashal but o Morwáreday kópagány gept o pády kot.
“Morwáred! Taw agan gapp jatén mani dast chest nabitagat. Taw parchá hámósh ay?” Zar Hánay gálewár narm at. Morwáredá hecch nagosht. Áiay chamm ars atant bale arsén chammáni tahá sarkasshiay gerók shahm kanán at o é sarkasshén shahm cha sohray háray drapshá rozhnáter at.
Anágahá Morwáred démá kenzet. Háry cha Zar Hánay dastá chámpet o goshádiá dhanná dar atk. Zar Hán cha hayrániá konth but o chárety.
Hamé bégáhá Morwáred báligorábá sawár dém pa Dósténay shahrá rawán at. Áiá sohray háré ham gwará at. É hár paráiá yádgáré at. É hamá hár at ke áiárá cha sohr o nograhay dege bázén chamnagendén hár o tawkán ázáty kotagat!
Nágomán