Sahkandanay champáchi o béwánkiá hast ent zobán
Chammé bebit pa gendagá
Góshé bebit pa eshkonag
Embrózay gránbáhandén áshób ákebat óbádagán pa sáhat ent
Sahkandanay
Gendant o bérók ant chamm
Karr ant bale gósh eshkonant
Sáh ent o bégwáh ent zend
Gend kahr o mehray ádami gestáiá
Arwáhay chihánthán sará zortag jahán
Karr ant tai gósh o mani gong ent zobán
Taw chó badalzortén zobánay mennatá bébáwar ay
Man chó zeminjombáni kahrén niyatá pédáwar án
Taw pa sagárán geptagén kóth o kalátán gal ay
Man pa peti mirás o máti golzeminá talwasán
Man Ádamay óbádag án
Mehráni hakkén wáres án
Rásté ke tai sóbá maná margi kotag
Sháté ke tai zórákiá zenday yalén bacché jatag
Bacch ájui
Bacch émeni
Bacch golzeminay didag o zerday morád
Bacch gamjatén baniádamay rakkénagay johday morád
Bacch dérmánén shádehay shóházagay mozday morád
Bacch zenday mehray mojjati armán
Mestági azábay ásaray
Taw pa saráni goddhagá zenday hayáláná koshay?!
Pa sendagá dásht kanay pollán cha bótálániá!!
Marká mani lóthay, ta arwáhá bokosh
Kóshá mani bádhá ay, mehray wáhagán páhó beday
Bégwáhiá zahr ay, bekan rozhná manigá érjig
Zántá bekan tiray neshán
Hárá majall, hawrá bedár
Jóná magend, hóná bechár
Man pa merag gár nabán
Mehr án ke áwár nabán
Dán ákebat hast ent mani gámáni rand
Dán zend bit rók ent mani hónáni lik
Mark o wadigay dard yakk
Hastay mesál ent nésti
Bit ó nabit ent wáhagay nápilahi
Tánke bániádam zarit
Pa rozhn o zántay émeni
Pa ágahi
Pa ájui
Zórákiay ásá sochit
Bandigiay zahrá chashit
Tirshániay ámách bit
Mán páhóán gothgir bit
Man mortagán, taw ham meray
Taw zendag ay, man zendag án
Beshkon mani gongén zobánay zémelá
Byá ákebatá gón mani chammán begend
Dur mán tahárókén shapay johlén zerá
Rók ant chó áchárá cherág
Mán kandiay hoshkáwagá
Zórákiay zortag talám
Mehray yalén paygambarán
Zolmay sagár ant sarshakun
Rozhnay gerók ent shahmagá
Kahr ant chó karsén bójiá
Áshóbay shartag émen ent
Dur mán hodókay menzelá
Mehráni gwarbámay golábdranzén samin
Zenday awalróshay golén mestági ent
Atá Shád