EpEsSiay domi sálay kémiáay kelás at. Sajjahén bachakk bé trekk o tawáriá lekcharay gósh dáragá delgósh atant.
Harwahdá kukkár o jaggá kanókén shaytánén bachakkáni choshén bétawári o gón lekchará delgóshiay yakk sawabé esh at ke lekcharár ketábay anchén daré wánénagá at ke chakkásá áyagay Omédy hastat bale masterén sawab lekcharáray trondi at. Wánénagay wahdá áiá gapp yá jaggá sagget nakot. Gappá bell áiay kelásá cheshag, kollag o gehásag ham band at. Agan kaséá béenáni pa gehásagá dap pach kot, bezán ke wájahay dastay chák áiay dapá potert. Chákay janagá áiay neshánag yakk o thekk at. Agan kaséá say barán gésh cheshet yá kollet godhá bezán cha kelásá dary kot o hecch ozry gósh nadásht. Harkasá kollag o passhánká gept godhá lekcharáray dastá pashal bayagay sáhárá é kelásá nayatk.
Chónáyá lekcharár sakk trond at bale wánéngá konth at. Áiá hasht máh pésar cha Balóchestán Dáneshgáh Shálkóthá wati wánag sarjam kotagat o mazanén tach o tákéá rand Dhegri Kálej Torbatá laggetagat. Wánénagá nezór at o wati hamé nezóriay chér dayagay wastá watá trondy kotagat.
“Sayad! Taw gappéá sahi ay?” Delpollá Sayaday góshá halwat kot.
“Ennán, che gappé?” Sayad kammé hayrán but.
“Gapp esh ent ke…”
Delpoll pa gappay goshag o Sayad pa gósh dáragá gég but ke lekcharárá á ditant.
“Adhay oo! Gapp makanet.”
Doén bétawár bitant o lekcharárá padá wánénag bongéj kot. Sayaday delá dam pa saht hamé gapp pád atk ke bárén Delpollá che gappé gón bale lekcharáray torsá hecchy nagosht. Pésará angat á cha lekchará labzé labzé póh bayagá at bale ni áiay delgósh chath dir atk. Delay tahá dán sahtoké kasshánchillá rand áiá padá Delpollay némagá cháret o halwat kot. “Delpoll! Bogosh bárén che gappé?”
“Anni bell yár! Randá goshán gón.” Delpollá halwati gosht.
“Na yár! Anni bogosh gón.” Sayadá gerr bast.
“Adhay, wájah zahr gipt,” Delpollá gosht o wájhay némagá cháret. Wájahay chamm pésará hamingor sakk atant.
“Shomá padá gappá et?”
Doén tokk o nokk but o neshtant. Sayad sarzáhará lekchará gósh dáragá at bale delay tahá pa Delpollay némtawámén gappay eshkonagá bétáhir at o wahdé lekcharár bawdhay sará chizzé nebeshtah kanagá lagget, Sayadá goshádiá cha Delpollá jost kot: “Hán bárén, bogosh gapp ché ent?”
“Gapp esh ent ke Thápu shotag Karáchiá.” Delpollá cha zyádahén jostán rakkagay wástá gapp gosht gón.
“Hawww?” Sayaday hayránén o chó borzén tawár dráhén kelásá sheng but. Drostén bachakkán chakk jat o cháret o lekcharáray kurrátagén chákay thokkor tachká Sayaday hayránén dapá potert. Bachakkán dap dásht o kandagá laggetant.
“Shomay doénáni dap naóshtit. Shábásh, dar áet, dar áet.”
“Wájah má…” Delpollá dap pach kot bale wájahá gapp gósh nadásht.
“Na, na, chekkety. Na wat wánet na degerán kellet. Shábásh, kasshet wati bucchá!”
Delpoll o Sayad pashal pashalá cha kelásá dar atkant.
“Taw yár! Lekcharay sahtá parchá Thápuay gapp shoru kot?” Sayad Delpollay sará norondhagá at.
“Sóch lekchará, dán “nakl ján” zendag ent chiá chort janay? Borén kanthiná tará Thápuay hálán dián.” Delpollá Sayaday dastá gept o doén dém pa kanthiná shotant.
Kálejay kanthinay do kóthi atant. Kasterén kóthiá chahgrád Nai Bakshá cháh grást o édege masterén kóthiá bachakkán nesht o cháh wárt. Bachakkáni báziay sawabá áiá kasánén kóthiá ham chizzé korshi jatagat. Ás rók bayagay sawabá kasterén kóthiá garmágá béke Nai Bakshá dege kass nesht nabut bale zemestáná báp o wassh at.
Marchi górichá mósom sakk sárt kotagat. Á Nai Bakshay bápén kóthiá potertant bale ódá jágah néstat. Korshi dráh porr atant. Á masterén kóthiá shot o neshtant ke hórk at bale sárt at.
“Nai Baksh! Do cháh,” Delpollá chamedá kukkár kot chiá ke doén kóthi dhokketagatant.
“Sharr ent, sharr ent,” Nai Bakshá chamódá kukkár kot. “Shomá pis waret gón, ján?” Áiá kékárá “pis” o bachakkáná “ján” goshag hél kotagat.
“Haw, haw,” Sayadá passaw dát o dém gón Delpollá tarrént. “Ni bogosh bárén. Thápu chiá Karáchiá shotag?”
“Petá bortag, wánénagá.”
“Wánénagá? Á wa hamedá wánagá at.”
“Pety goshit edá nawánit.” Delpollá gosht o Sayadá kandet.
“Beshtény. Má wat wánéntag o mollá kotagat, há há há. Kadi bortagy?
“Payri.”
Kanthinay bachakká cháh o kék áortant. Delpollá cháhá gotthé gept o goshay hayáléá kapt o Sayaday chamm darigay bandén kánchán dhann kálejay drachkán sakk atant ke górich áyáni gwarsháh o sarsháhán chandhéngá at. Górichay dawá bápi ent o áyáni é báp diók cha dastá shotagat.
“Adhay, shomá edá neshtaget? Man shomárá drostén kálejá patthetag.”
Doén cha wati hayálán dar atkant. Oméd kandáná pédág at. Oméd, Sayad o Delpoll yakkén pádhaway nendók atant o nazzikén sangat atant. Á modám hamráh atant. Eskólay zamánagá sayén hamsabakk atant bale Oméd dahá bésób but o ni cha doénán sálé pasht at.
“Mazanén chortéá kaptaget shomá, goshay lánch boddhetagant shomay.” Áiá korshié kasshet o nesht.
“Haw, anchén gappé o tai lánch ham sar nayatkag,” Delpollá gosht o padá drostén gappy jat o dátant. Oméd ham cha Thápuay rawgay hálá kammé paréshán but.
“Ni nókéné dar géjag lóthit,” Sayadá jawadhet.
“Gránén káré,” Delpollá darráént.
“Padá ham… tach o ták bekanay rasit. É Torbat ent.” Oméd náoméd naat. Padá doénáni némagá cháráná josty kot, “Shomá bárén kass chammáni chérá nakotag?”
Delpollá yakk baré sar pa ennán sorént bale padá damáná goshty: “Adhay, yakké hast. Sakkén dhawldáréné. Awali sálá ent.”
“É man ham ditag bale nazánán kay ent o chónéné.” Sayadá ham á bachakk yád atk. “Oméd, tawy nazánay? Mani hayálá tai kelásá ent.”
“Zánány, sharry zánán! Námy Pollán ent, hásthalá ent o…” Omédá gapp dapá at ke bachakkéá sarokk kot o áiá gapp band kot. Delpoll o Sayaday murk ham mojetant. Charáiay áyagá áyáni majles haráb bitagat. Áókén bachakká ke námy Shér Mahmad at, esháná “che hálé” jat o darwázagay némagá cháret.
“Byá adhay! Jágah hast.”
Yakk sharrangén bachakké ke do say ketáb o kápiy dastá at, potert. Sayén pa hobb o wáhagé áiay démá pád atkant. Shekár páde wat atkagat!
Jódhiá rand Omédá kanthinay bachakk tawár kot. Á atk. Omédá Pollánay némagá cháráná cháh o kékay ádhar dát.
“Na yár! Cháh bass ent. Kék mayár.” Pollánay hamrah Shér Mahmadá damáná gosht o padá cha Polláná josty kot: “Taw kék waray gón?”
“Na, del nayayt. Cháh bass ent,” Polláná gosht o sayén goshay damánéá Pollánay wasshén tawáray sehrá gár bitant. Áyán bázén sharrangén bachakké ditagat bale Pollán cha drostán démáter at. Anchó rang o dánag, anchó gotth.
É diwán damánéá mant. Gapp o rapp but. Kandag o maskará but. Wahdé ganthiá tawár kot, Pollán o Shér Mahmad pád atkant. Á wánókén bachakk atant o har kelásesh gón pábandi gept.
Gón Polláná é gwandhén nyádá sayénán tokshet ke watá adabdár, mardomdóst o sharkerd pésh bedárant. Polláná agan gappé jat, áyán pa hobb o wáhagé gósh dásht o áiay maskaráyáni sará anchó kandagay badalá lápléthi wárt. Á shekáray repk o honerán zabr atant. O wahdé diwán halás but, Pollán hakk o del áyáni sangat jódh bitagat.
Do say haptag gwast o é dargatá Pollán gón áyán sakk nazzik but. Cha wati hambán Shér Mahmadá ham gésh.
“Pollán! Gappé bogoshán delá nayáray?” yakk róché Shér Mahmadá darráént.
“Na, nah bogosh.” Pollán ke wánagá at, gón áiá delgósh but.
“Taw é bachakkáni inchok hamráh mabi.”
“Kai? Omédzaiay?”
“Haw, man eshkotag ke é sharrén bachakk naant.”
“Bale gón man sakk sharr ant. Taw wat ditag ke chónén mardomdóst ant. Wánagá béchárag nezór ant wa dege gappé bale dege har wadhá sharr ant. Báwar kan man harwahdá esháni hamráh bán, maná kaldáré ham harch kanagá naylant o pa man chó brátá ant.” Polláná áyáni bárawá Shér Mahmaday gapp dóst nabitagat.
“Chónáyá wa man ham sarzáherá áyáni tahá harábi nagendán bale…”
“Agan harábié mánesh záher bit.” Polláná áiay gappay tahá dawr kot.
“Chó sharr ent bale man eshkotag ke é sharrén bachakk naant. Neshah meshah kananat. Baré baré ke kangalá bant, dozzi dáziá ham chakk o pad nabant. Pameshká man cháret tará hál bedián ke taw mani sangaté ay o choshén gappán cha taw chér dayag badwáhié bit.”
“É bárawá man ham eshkotag. Yakk róché man cha áyán jost ham kot. Áyán gosht má BiEsO (BSO) Kahuray mardom én o é dróg BiEsO Yásinay bachakkán sheng kotagant.”
Cha Pollánay é gappá Shér Mahmad kammé béwár but, chiá ke á BiEsO Yásinay báské at.
Polláná áiay béwári máret o gón narmi gosht: “Shér Mahmad! Man tai sangati o dózwáhiay kadrá kanán bale mani hayálá á ham tai paymá mani sangat o dózwáh ant,” Polláná gosht o gapp chamedá kotthet.
Yakk sohbé ke padá górichá sar kotagat, Sayad o Delpoll o Oméd kanthinay masterén kóthiay konjéá zokkortag o cháh waragá atant.
“Yár! Eshiá márá zarrá chath kot,” Delpoll goshagá at.
“Pollán é harchán karzit,” Sayadá bechkandet.
“Pa morgay mozhdawár kanagá móchkén chandhag lóthit,” Omédá hozzhárén shekáriay wadhá darráént.
“Chó haw bale man goshagá án ke móchkénay chandhag kadi band bit o …”
“Haw yár!” Sayadá Delpollay gapp gept gón. “Ni má lebzay gurchénagá dam bortag.”
“Sharr ent, godhá marchi wadhé kanén bárén,” Omédá gosht.
Hamé wahdá saymi piradhay ganthiá tawár kot.
“Marchi may é piradh hálig ent. Man rawán Polláná kárán. Shomá ché goshet?” Doénán mannet. Oméd goshádiá shot o dér nagwast gón Polláná atk. Áyán paráiá cháh o kék lótháént. Kammé dege gapp o rappá rand Omédá darráént, “Pollán, yár! Má pa taw dáwaté thahéntag.”
“Dáwat?” Pollán hayrán but. “Parchá?”
“Ni gósh dáret, é goshit parchá, taw yár may sharrén sangaté ay. Má tará yakk róché náné ham wárént nakanén?”
Omédá anchó gosht ke Pollán ryáband but.
Dáwat passhambehay shapá thahénag but. Ádénagay chotthi démá at. Bégáhá áyán pelemé cháragay prógrám kotagat. Passhambehay bégáhá Omédá Pollán cha hásthalá parpathá doposhtag kot o wati mehmánjáhá áort. Sayad o Delpoll pésará wadárig atant. Áp o támá rand WiSiÁr o thiwi gón darzené rillá árag bitant.
“Taw chónén pelem cháray Pollán?” Omédá jost kot. “Mani kerrá har wadhén hast. Matlab kwahnén, nókén, árth, kamarshal…”
“Maná árth dóster bit.”
Omédá dege lahté rill Pollánay démá mocch kot. Polláná yakké gechén kot o hamé per kanag but. Bápén báná nendag o pelem chárag o gapp o rapay tahá samá nakapt ke kadi shap atk. Áyán hamá wahdi samá but wahdé Oméday kasterén brát atk o waragay jádhi bayagay hály dát.
Dér nabut ke pelem ham hallet. Warag árag bitant. Hamá warag ke del bogoshit, tahr tahray warag parzónagay sará ér at. Pollán wati chó ezzat diagá sakk wassh but. Warag o charagá rand wahdé drost pa gég o gwam neshtant, Polláná rawagay ejázat lóthet.
“Anni raway?” Delpoll hayrán but. “Tará hásthal dege delé wassh bit.”
“Na yár! Wasshiay gapp naent. Maná kammé wánagi ent.”
“Wánag bándá bit kant. Chotthi ent. Sharr bwán,” Sayadá bechkandáná gosht bale cha Pollánay rawgay gappá nagég at. Omédá Sayadárá amtohti chammoké jat o Sayad dhanná dar atk.
“Taw wat goshay ke Shér Mahmad lógá shotag. Ódá éoká tará wassh bit?” Delpollá jost kot.
“Haw, maná éoká nendag o wánag washter bit.” Pollán angat rawgay hayálá at.
“Taw yár kamál kanay, benend gappé janén. Pelemé chárén. Taw yakk shapé ham gón má gwázént nakanay?” Omédá gón kammé gelag gosht. Oméday gappá Pollán gept. Sangatán á haminchok ezzat dátagat ke áyáni gappy ennán kot nakot.
Sayad ke Oméday chammokay sará dhanná shotagat, padá atk o járy jat: “Parpath panchar ent.” O padá démy gón Polláná kot o goshty: “Pollán! Ni taw é górichá ganter shot nakanay. Marchi mósom o ólák hardo may boná ant.” Sayaday gappay sará drostán kandet.
Pollánay pasonday dege pelemé bongéj but. Pajjiá chahwári but. Omédá anchén wadhéá Pollánay cháháni tahá tósénagi darmán mán gétk ke á hecch sahi nabut. Albat Sayad o Delpollá hayál gwar at.
“Yár! Maná wáb gerán ent.” Kammokéá rand Polláná geháset. Áiay chamm cha wábá homár atant.
“Tai jágah tayár ent.” Omédá mehmánjáhay konjéá jatagén taht o nepádáni némagá dast shahár dát. Pollán bétahmboli pád atk o nepádáni sará tachk but. Sahtokéá rand á gránwáb at. Oméd pád atk o Pollány thóhént bale á sodd o samáyá dhann at.
“Adhay é pelemá dar kan yár, bachakk atkag árth pelem chárit. Byá pa taw pondetagant hamedá,” Delpollá gón zahrnákén bechkandé gosht o Sayadá pelem dar kot.
“Chéé per kanán?”
“Górich ent, bápéné per kan.” Omédá saláh dát o Sayadá bápéné per kot. Padá diwáná sharábi bótalé ham mekk but.
Dhanná górichá shikk shikké chér at o bápén bán gón wati bápén chizzán sakk wassh at.
Nágomán