Man talké án. Maná kesás sálé bit ke edá borzén kahiréay thollá drang án. Rócháni garmi o shapáni sártiá, namb o droshkán, gwát o hawrán, tabd o lewárán maná sakk nezór tarréntag. Mani labbadh sadhetag o sestagant, nyámdár warókán wártag o nál zangán geptag.
Man parchá edá bégwami drang án? Maná paré hálá kayá kot? É drájén kessahé.
Á párigén garmágay yakk wassh o sáhélén sohbé at. Badalá maná o mani édege doén hamráháná cha lachokká dar kot o dém pa wati petay dhegárá rahádag but. Á márá pa chér kanagá baragá at.
Mani o mani doén hamráháni shapá wapsagay jágah hamé lachokk at. Badalá shapá márá chér nakot, chiá ke shapá márá pogol o moshk o kadhokkán srapént yá mór o solórán dán bortant. Pameshká róchá má molká morg gept o shapá hamé lachokkay tahá árám kot o wati sargwast o kessah áortant.
Say róch at ke Badalá maná addh kotagat o chér kanagá baragá at bale man daningah hecch morg gept nakotagat, pameshká wati hamráháni kerrá kammé pashal atán ke áyán báz shekár geptagat.
Man shekár gept nakotagat parchá ke awali róchá man anchó dhakk atán ke mani dán morgán bort bale man nasraptán, o domi róchá anchó sonn atán ke wassará wat sraptán o neshtagén morgán bál kot. Morg padá jóháná neshtant bale mani nazziká nayatkant.
Hayr, nókániá chosh bit bale báyad ent talk chó dhakk ham mabit ke morg áiay koblokay dáná bwarant o angat masrapit o chó sonn ham mabit ke kawshay kasshagá besrapit.
Á sohbi Badalá márá zort o tachká sohruay jóháná atk ke dhegáray gwará práhén sirkagéay sará kót at. É jóháná bázén morgé atk. Kapót o shátolán abayd baré baré pintól o jengol ham atkant.
Anni jóháná lahté shátol neshtag o dánay chenag o waragá at. Wahdé Badal nazziká raset, áyán bál kot o kammé passend, sóléay sará neshtant. Badalá doén talk boná ér kotant o maná chér kanagá lagget. Kandhoké jaty o maná hameshiay tahá éry kot o wár wárá báry dát. Padá koblokay sará gón sosorrá per lecchéntagén sohruén dány hopp jat o dará kot. Mani poshti némagá lahté kadhabbi kándhély ér kot ke morg maná poshtokái majanant, chiá ke má cha poshti némagá áókén morgán sakk sakká gept nakanén.
Badalá ádege doén talk ham chér kotant. Chér kanagá rand may kash o gwará wati pady gón cháderay lambá gár kotant ke morg mamárant. Padá jóháná gestá kaléréay poshtá nesht o chammy gón jóháná kotant.
Mósom sakk wassh at. Jambar sáhél atant o sártén kawshé ham kasshagá at. Jóhánay kash o gwaray kalér o kahiráni sará neshtagén morg cha mósomay wasshiá mast atant o gón wati wasshén tawárá mósomá názénagá atant.
Hamé wahdá do kapót bál kanáná atk o hamé borzén kahiray thollá ke anni man drang án, nesht. Mani del wassh but ke morg báz bayán ant. Esháni tahá man yakké allamá gerán. Bale man pésará wa hecch morg nageptag. Bárén chón bán?
Man delá jédhagá atán o wadárá atán ke kadi morg jóháná nendant. Badal kaléray poshtá neshtagat o cha má yakkéay srapagay wadárá at. May drostáni wadáray damán waddán atant bale hecch morg boná naneshtagat. Dráh kash o gwaray kalér o kahiráni sará neshtag o zébáén mósomá názénagá atant.
Néth, may wadáráni drájkasshén damán kotthetant. Yakk shátoléá cha kahiray sará bál kot o atk o jóháná nesht. Áiay poshtá dege do say shátol domb pa dombá atk o nesht. Lahté shátol ádege talkáni nazziká at o yakké wár wárá mani némagá áyán at. Mani delay drikkag trond bitant o mani hayálá kaléray poshtá neshtagén Badalay ham.
Shátol dán chenán o waráná mani démá atk o óshtát o pa dánay chomb janagá gég at ke hamé wahdá doén kapótán goshádiá cha kahiray thollá bál kot o jóhánay kerrá atk o neshtant. Shátol godhetant o bálesh kot o hamá kaléray sará shot o neshtant ke áiay poshtá Badal thappetagat. Gón Badalay gendagá áyán padá bál kot o dege sóléay sará shot o neshtant.
Maná kapótáni sará sakk zahr atk chiá ke eshán mani dastay shekár baráéntagat. Agan é mayatkénant, allamá man wati zenday awali shekár geptagat. Yakk baré mani delá holl kot ke watá srapénán, belly kapót godhant o chedá bál kanant o rawant. Agan áyán mani dastay shekár baráéntag, man ham edá áyán chénkay chenagá naylán. Bale padá man cháret ke eshán choshén ásánén shezáé nadián. Agan edá manesh bál bedián, á dege jóháné yá molkéay sará rawant o lápá porr kanant. Sharterén shezá hamesh ent ke man chareshán yakké shekár bekanán.
Doén kapót kash mán kash loddháná jóhánay kerrá gardagá atant. Hamé wahdá kapótáni bál dátagén shátol ham padá atk o neshtant. Mani del wassh but o kapótáni sará zahr ér atkant. Awali randá man á sharriá cháretant. Á warná o binkasén kapót atant. Yakk naréné at o yakk mádagéné. Kash mán kash loddháná doén sakk brahdár atant. É chón gal o shádán ant. Béchárag nazánant ke malkamit har damán áyáni srápá ent.
Yakk baré maná kammé bazzag but bale padá chareshán yakkéay geragay wáhagá, zenday awali shekáray gerag o hamráháni o Badalay démá wazhnám bayagay wáhagá mani del dhaddh kot.
Narén kapót mani némagá áyán at o mádagén áiay poshtá gón at. Mani delay drikkag padá trond bitant. Esháni tahá yakké mani shekár bayagi at. Ni mani o Badalay wadár kotthagi at. Naréná mani sohruén dán ke dit, gámy pa man trond kotant o atk o mani dány chomb jat. Mani kérok cha kobloká dar atk o man damáná kapótay gotthá gept.
Gón mani srapagá jóháná neshtagén morgán bál kot bale geptagén kapótay matth mani sará chakarroki waragá lagget. Gón mani srapagá Badalá ham drekk zortant. Wahdé kapótay matthá Badal áyagá dit, nazziká kaléréay sará shot o nesht.
Badalá kapót cha mani dapá dar kot ke mártósag at. Kapóty cháret o bechkandety. “Mozhdawár ay taw, bwar sohruán!” Badalá bébazzagén gálewáréá gosht o cha galá krishtagé jat.
Maná bazzag but. Chónén wasshén zendé at esháni. Yakkén damáná chó kokkoliáni kalátá karotk. Ni chón béwas ant, deltrakk ant béchárag. Drégatén man é mageptén. Man gón pashómáni kapótay némagá cháret ke Badalá mohr dáshtagat. Ni Badal eshiá koshit o eshiay matth gamán merit. É doénáni náwahdén margay zemmawár man án. Man esháni wasshén zend barbád kot.
Man watá malámat kanagá atán bale ni áp cha sará per gwastagat. Badalá cha lánká dás kasshet o dém keblahá kot o pa morgay helár kanagá gég but. Kaléray sará neshtagén kapót nálagá at.
Man sakk pashómán atán ke é hóne náhakk parchá wati sará kot. Ni man chón eshiá cha malkamitay sahgerén panjagán rakként kanán. Bale randay “hettheray” che dardá wárt. Kár wa haráb bitagatant.
Badalá kapótay pád wati rástén páday chérá o bánzol chappén páday chérá kotant. Chappén dastá gotth o sary dáshtant o dásá kapótay gotthá per mosháná “Bessmelláh, Alláho akbar” wánagá lagget. Cha margay torsá kapótá wati chamm nazz kotant o mádagén kapót Badalay sará chakarroki waragá lagget. Dás kapótay gotthá ér kapt o hónán pinzhár bast. Kapótá parparroki jat dánke sárt but.
Badalá cha kapótay zagrén hónán say chár petth mani nyámdáray sará per mosht ke man sharter o géshter morg gept bekanán bale man… man pashómániay zhamburén ásá sochán atán.
Chamá róchá rand man hecch morg nagept. Harwahdá ke morg mani nazziká atkant, man watá srapént o chareshiá mani nazziká o jóháná chérén édege talkáni kerrá neshtagén morgán bál kot. Wati kotagén gonáhay gránén báray sobakter kanagay bass hamé yakkén ráh pasht kaptagat.
Badalá dán haptagé kappéá ópár kot bale dán kadéná? Cha mani náwahdén srapagán yakk róché sakk zahr gept o maná zórán kurráty. Man charáiay dastá lagoshtán o é borzén kahiray thollá jamkéá mán atkán o chamá róchá beger dán róche marchi hamedá drang án.
Ni róchá o hawrán mani nyámdáray sará laggetagén hónáni póleng shoshtagant bale pashómániay zimsarén kátháráni thapp angat tázag o ázag ant o harwahdé ke kapótéay zahirnálén kukuán eshkonán, delá dardé chest bit o dráhén jahán abétk bit.
Nágomán