Man kadi sardári o mitáp o kilag, bór o lashkar lóthetag
Man kadi morwáred o tangah, hazinah, mál o gawhar lóthetag
Yakk napassend o dayársóchén lewáré atk drahbátá mani
Man wati jenday tanaksáhén tagerdén koll o kápar lóthetag
Rombetag porkénag o kastén pa man yakk gongodámén lashkaré
Man cha zórákán é rájay zehtagén gáláni daptar lóthetag
Zendagén táwán bolóthán ham nadant torsá ke pa man sut bant
Pa natahirén delay per dáragá man ás o angar lóthetag
Wazhdelián zendmániay maná nést ent gelag duri kanet
Marg ham bahtá hazéntag nayayt, man róché do sad bar lóthetag
Man mayárig án o radwár án tai, pahelon bekan bánok ke man
Nábezánti wáhagay béásarén káráni ásar lóthetag
Chó dósháhén tirá mán atkag delá tránag tai, Hánol mani
Byá Sayad man ranj o andóháni angargwárén jambar lóthetag
Sayad Háshomi
Gray Makenziay Kárjáh, Bahren
12:30 adár némróch, 18-Aktubar-1956