Baré nabutagén kárán pa man rawá taw kanay
Baré é ázagén thappán delay dawá taw kanay
Boraw ke sháhay mayar ay taw, ay delay kásed
Nazánán kocchal o májiná chón razá taw kanay
Pa dast o dróhiá pédák ay wasshatk ay bale
Man zánán bésarén kárán wati padá taw kanay
Pa hayr marchi chó bánórá sambahéntag watá
Chiá garibéay hóná wati sará taw kanay
Nachent gol, mani opparágán cha pólengé
Damáné pa maná démá agán dará taw kanay
Mani napas! Mani arwáh! Sáh mani yakké
Bogosh ke pa watá kawligy chont bará taw kanay
Nazánay ke mani bannámi pa tai namá ent
Ke béwasiay mani gappá harkasá taw kanay
É dastbandi o peryát drost békár ant
Ke harché pant bedant del tará hamá taw kanay
Mabastén drégatén man pahr pa tai kawlán
“Nazántag man ke gón man choshén dagá taw kanay”
Edá wa drost tai gonahkár én má, balé é bogosh
Ke jostay róchá mayárig kay kayá taw kanay
Pa golpariá mani gwandhén dastras hamésh ent
Ni démter pa man harché kanay hodá taw kanay
Moridi gálán bedár dorbayán bah mantant
Sayad wasé wati Hániay háterá taw kanay
Sayad Háshomi
12 Aktubar 1952, Karáchi