Gódi!
Nazánán chiá hamé ke Balóchay ákebatay rakkénagay gapp kayt godhá maná Shahid Kámraydh Kaiyum ján gir kayt ke áiá goshtagat:
“Dán Balóchestánay possag shahidáni chokk o nomásag mabant, Balóchestán áju nabit.”
É lágar o tawángrén bámarday goshtagén hamé dánk róch pa róch wati gwáhiá dayán ent.
“Sochit hamá dár ke ásá ent,
zendagén drachká ché samá
kawsh bebit ke zerbáray hawá
shikit hamok gwátay tabá.”
Balóch ráji jonzay washbahti ent ke ostád Kámraydh Wáhed Kambar o tai áripén Wájah Shahid Gappár Lángaway johdáni barwardá azhnók bená bitagén mán Balóch ráji jonzá Lommah ján o tai kerd Balóchay daptará nagwáhit. Balóchay deléri o jang kanag áiay sareshtá mán ant. Á delér zálbulé bit ke narinagé ennán! Allam é nókén Balóch Zálbul cha shomay lékah o didánká wadi bitagén zálbul ant. Zikén zálbulá zahm zortag o aps sanj o zén kotag pa wati brátá yakk tahná pád atkag. Agan jangéá gón bitag pa wati kahól o thakká, bale hamé thakk o bólak o kothomán yakk rájé kanagá zálbulá ke yakk mocchánki pegré dayag o áiá cha choll o lógay pézhgáhá kasshag o dhanná árag, áiay hamé haddá hél dayag o budnák kanag ke á cha zánt o zánagá sarréchén wánók o senchién zálbulé jódh bit o Balóch Ráji jonzá yakk mohr o mohkamén jonzé kanagá wati kerdá pilaw kanagá ent. Jang bebit yá syásat, hardo takán yakk anchén kerdé pilaw kanagá ent ke á Balóchay gwastánká é dábá nést ent.
Shomay johdáni barward ent ke sanjáni yakk anchén háré botkag ke áiay wadi bayagá darday jambará hón do dasti gwartag. É hár ke gón sórén arsáni zerá hawár kapán ant ched o master bayán ant.
Nazánán shomárá morádbáti bedián yá gambárén jahánéay chó hastén wahday zóráká pa wati pasht kapagá nimmóné besázán o “Balóch Yakjahti Kamithi”ay wadhén pák o palgárén galéay lóth ke Balóchay ákebatay gappá kant áiá byárán sarigéay boshá bebandán o nang o námay nám zár bejanán.
Má chetawr hamé nang o námusay námá gept kanagá én? Yakké shomárá “baythi” o “bacchi” goshagá ent dege yakké nang o námusay námá kanagá ent. Nán shomá másum “baythi” o “bacchi” et o nán shomay hamá baláhén mól o morád pa nang o námus yá pa “sáhel” o “wasáel”ay wadhén watgadhén gálbandán chér tarret kant. Cha taw pad tai drostén sangat o hamkár gerag bitagant. Kódekén Golzádiay hecch hál o bud nést. É tai o Lommah jáná hawár kollén Shahid o bégwaháni johdáni barkat ent ke marchi Balóchay tawár mán jaháná proshtag o Balóch ke wati pág o padhakkahay pahrá gorunák bitag á pág o padhakkahi drost pashal ant pa wati pashaliay chér dayagá wadh wadhén nimón sázagay johdá ant.
Gódi ján!
Taw byá! Tará pa wati azhnók jódh kotagén rájá angat báz kár kanagi ent. É ráj angat báleg naent. Nóki gámán kaptagat ke tará bortesh. Balóchay kárahbanday nezóri goshay yá zórákay wák? Róche hamá róchá ke Balóchá sodd kotag ke márá yakk send o sédén dhéhé hast. má sheng o sháng én. Esháni hawári allami ent. Tán kojám saré ke chest bitag á sar janag bitag. Pedá Ahmad bebit ke Wájah Golám Mahmad, Lommah ján bit ke Mannán ján, sar ke shotagant mahluk ham namantag. Shahid Pedá Ahmaday rawagá rand dán chont wahdá bétawári mantag. “Baythi” o “bacchi”, nang o námusián gón wati wájahá Balóchárá Balóch bayagá naeshtag, jatag, choptag o shirag o móm kasshetagant o Pákestáni thóháré jódh kotag pa Balóchestánay dóshagá démá dátag dán Shahid Wájah Golám Mahmad atkag cha áiá pad pa adáré Shahid Mannán jáná dáshtagat déry nakot dáktar ján ham Shahid kanag but o Balóch rájay tahá wadh wadhén thóhár jódh byán bitant. Maydáná sarzáherá kass nést at. Pákestáná yakk anchén ajabén thóháré áort ke kassá nazántagat, drosty per retkant. É barigén bétawári haminchok syáh o tahár at ke chamm pa chammá maym nabut. Bale wahdé ke máhekáni but dán á paddar but.
Oo Balóchay tahármáhén shapáni máh o Mahrang! Byá ke bégwah o Shahidáni wáres tai rahchár ant. Byá ke thóhár róché rangéá rajénag bayag o démá árag bayagá ant pa mátén sardhegáray dóshagá. Gón wati thóhárán Balóchá répénagá bádhá ant. Byá ke má angat géshe wati aná o wati mannárénag o yakké cha domiá sawai bayagay ger o chekká én. É bari káay, yakk dege karámáté byár gón. Man hamé ke wapsagá bán kalamaway badal bass yakk dwáé, armán ke chó tará pa Balóchén nadkárán kadi choshén kandilé ke Saba at, padá balit o rók bit. Chó Mobáreká shág dant o Anwará chamit o é waptagén pilá thóhénit ke Wájah! Tará ham yakk zemmadárié é golámén rájay tahá hast. Balóch nadkár chó zikén zálbulá wati hórkén andaray chollá pishkóndhagá ent bakawle Kandil ján cha watá bégánag ent. Béde hamé say o chárén áripén kamáshán Wájah Manzur Balóch, Sháh Mahmad Mari Anwar Sájedi o sayén chárénán. Maná omét ent taw ke káay é taká allam jédhay.
Tai mán zendánay kuthiá nebeshtagén kágad pa wati yakkén Brát Náser ján o pa gohárán wahdé rasándará dist ta tai pa mátá nebeshtagén kágaday tránagá kaptán ke man gón wati proshtagén Balóchián rajánk kotagat. Taw ke mesenjará mani mennat gept, háteron wassh but. Man é kágad ham rajánk kotag. Gódi ján! Kadi dar káay o wányay o mani mennatá geray o mani delá wassh kanay? Tai é gapp ke “shomá bezánet ke shomay gohár nezór naent” lonthán pahri bechkandé shenget o man shomay pa hazárnázén watanbánórén Lommah jánay sar kanagay kárawánay tránagá kaptán wahdé Golnesáyá sapar jatagat o atkagat. Man ke hál geptant godhá goshty: “Hasá é Lommahay jend ent. Nur páky hecch makant, é Bánokay jágahá gipt. Hamáiay dhawlén malangé.”
Man kandet o gosht, “haw dánké malang o ganóké mabay pádán dásht nabay lále. Hamé pa watan ganók o áshekén washrangán Balóch ráji jonz sambahéntag pa watanay bánóriá.”
Sohbi tai josty kot, man gosht ke pa Gódiá kágadé nebeshtah kanagá án. Goshty baddhé báré salámy kan.
Zit áju bátay.
Tai nábudén rajánkár
Hasá Bejjár
Cha darén dyáréay panágirén Bonjoléá.
15/04/2025