Mani dóstigén gohárán o yakkolén brát Náser Ján!
Man zánán ke man shomárá chónén sakkiáni démpán kotag o chetawr shomárá drostán é kasánsáliá yakk baré padá janjálán perréntag.
Má cha 2011á é gránén jáwaráni démpán én. Bale maróchi Balócháni har lógá hamé kessah sar ent. Hardén nezór tarretet godhá wati chapp o chágerdá sayl kanet. Man sarpad án ke shomay drostáni dhobbaw modám man wat zortag, pa hamé óstá ke é gránén bár shomay kópagán mabit. Bale Balóchestáná neshtagay é wadh bit kant, balkén ched o ganter ham bit kant, pa eshiá watá deljam kanet. Zendáná may awali gendokiay sáhatá awali bará man watá shomay drostáni tahá dist. Hamá békarári o pegrmandi, padá chizáni hamá dábá áragay bésabri, hameshiá goshant hónay syádi, bale may dast chéá rasit? É ham may bahtá kaptag o hamok Balóchay bahat anchosh ent.
É kágadá man cha jélay kuliá nebeshtah kanagá án parchá ke gendokiay wahdá man hamá dróstén gapp jat nakotant ke maná janagi atant. É zend pa man yakk nókén tajrobahé. Man angat gón wati brát o gohárán mán zendánéá gapp kanagay wadh o paym dar nabortag. Man lóthán shómárá delbaddhi bedayán bale maná labz namarrénagá ant.
Ni man dhadhter bayán án o wahday hamráhiá shomá ham dhaddh bet.
Yát bedáret ke wahdé may pet shahid kanag but, á wahdi ma chetawr hór bitén o watá dhaddh kot.
Mani wáhag at ke chórawi jágahá ham shomay zend cha wasshiá sarréch bebit. Man é omét dáshtagat ke shomá beh polusay chápah o jélay darwázagá magendet. Bale may dastá ché bit?
É ázmáesh gahgiri zenday tahlén rásti ant. Balóchestáná má wati mansháay zendé gwázént nakanén. Démterá ched o gráner bit kant, ásánter nabit.
May petá é paysalah kot o watárá pa Balóchay hakkán nadr kot. O áiá rand, má drostán hamáiay pegr o lékah zortag o gón hamé johdá bandók bitagén. Ni é gránén wahdá shomárá yakké domigay hayál dáragi ent o yakké domigay kópag bayagi ent.
Beh mashamóshet: asalén wák haddh o bandáni naent, delayg ent o lékahayg ent. Watá cha tahá mohr kanet, lékahi bonyádá mohkam bebet. Yakké domigay kópag bet. Beh watá nezór bayagá maylet, o é gappá modám yát bedáret ke shomay gohár nezór naent. Nezóri may béhá mán nést.
É wahd ent mohkam bayagay, zobánay mókagay o wati Balóchén brát o goháráni hamkópagiá óshtagay.
Hodáay myár et. Hodá Balóchestánay negahpán bát. É wahdá ke man é kágadá nebshtah kangá án, nazáná ke aid kadig ent, bale shomárá o wati rájá péshagi aid mobárek goshán.
Gón nékén wáhagán
Mahrang Balóch
(Cha zendánay kuliá nebshtah kotagén, Passhambeh, 27 Márch 2025)
Balóchi rajánk: Hasá Bejjár