Sájed maná pahel kan!
Mani dánsarén zend hoshkén pahelié. Man anchó pa taw bazhnig án ke anni chó pa Kachkólá (ke é wahd áiay gón wati hamsaruán wánag o wazhnódiay wahd ent, bale man sarjamén kahólay bójá baddhá dátag). Bale do haminchok bazhnig o kohtig án ke wahdé taw gón wati dirshánén didánk o budnákiá pa Balóchiay syáhagá tómé chandhagá atay, tará dirén dayáréá pancheké rasetagat.
Óhe Hasá bát gón wati chátay pogoliá!
Armán ke man bezántén bale shwánagá kojá kanay? Poll! Bass, gón wati chéray cháderá bandókén bandawé. Hahahahaha!
Sájed! Man zánán ke taw wati Balóchiá allam pésh dáray o goshay:
“Bell Hasá wati kochráiá. Inchok ke shwánag róch, máh, sál, gwát o mósomán zánt, dege kass nazánt.” O dege bárén ché ché goshay pa shwánagay dánáiá.
Sájed! Mardom mán magishát, hardén ke mán gishet, godhá á Hasá bit.
Démay mardom Sájed ent. Hasá neshtag ke mani wizá o Séth o beger o bedár.
Taw Diwálá tekah atay, Séth Haliray saykonji kuthiay keblahi darigay boná neshtagetay. Taw narm narmá gón wati gránén tawárá gosht: “Háji o Samirá gapp bejan gón, tará thahénant.”
Mani hayálá taw cha Aprikahá atkagatay. Padá man sahi bitán ke Séth Haliray dokkán dozzán jatag o tai páspóth o sapari kágadesh ham bortagant yá dege jahé gár ant, bale anchén jédhahé hast at. Taw pa hameshán takánsar atay o pa ésháni dar géjagá tach o tág kanagá atay. Padá cha Séthay nékén rahmatán man tará nadist.
Báz wahdá rand gón taw Wadhzapá dochár kaptán ke taw cha mani wadhén nábudéá pa Balóchestán Tháemzá nebshtánké lóthet Shahid Golám Mahmaday bábatá. Man tará báz gosht ke Wájahay sháná mane Hasá ché nebeshtah kot kanán, bale taw atay ke Hasáay nám ham wati mazanshánén táká pasht getk.
Mani delá á róchi man tará gosht ke awali bará man o taw kojá dhikk wártag. Karáchiá yakk lógéá ke mádhiéay saymi yá cháromi tabakká at. Lógay say kóthi atant o yakk hálé at. Maná yád nakant ke kay mani hamrah at. Yakk tankokén saykonji háloké. Sayén kóthiáni dap hamé hálokay sayén konján ant o cháreká choll ent. O hamedá garmay wahdá gón yakkéay áyagá ádege sayén chárén námán yakké gésh but, á Sájed at.
Man wati ditagén wábay kessah ham kotant. Taw sakk kandet o gosht:
“Hasá! Nezórén mardománi wáb o hayál hardok sakk nezór bant. Taw báyad ent é wáb madistén. Degerá nazánán pa wat wa hecch wadhá parchá ke watkoshi sakkén bozdelén káré. Taw o watkoshi?! Mardomé ke molká nesht makant, á watkoshi ham kot nakant.”
Bale Sájed! Man bé watkoshiá sakrátá án, bé sáday gotthá kanagá mawtáni án. Zi man tará o Syáhuárá wantagat, marchi wat hamá ásyábá kaptagán. Áprin bát shomay ópárá.
Sájed! Man ham wati chokkáni wadárá neshtagán. Mani kár angat nabitagant. Bass pa chars róchán télánk dayagá án. Rást goshi, Syáhu atkagat Ásepay sirá. Pa taw maná sakk zahir but. Géshter shomay kessah gir atkant. Man tai jost kot, goshty:
“Sakkén bétahmbolé. Démé ke rawt, padá áyag nazánt, bale márá sabr ent. Róché allam dastá kapit, drostén bérány gerén!!”
Nazán tará Bibi Mehlab yá Táj Balóchá hál datag yá nán ke Balócháni nók jatagén “mandhi”á ke námá ketábáni ent, bázénéá Karáchiay damkáni rédhi wálawáni wadhá wati gotthay tal bortag. Bale Pakestánay é drógén ketábdóstiá o jahánay répénagá ke Balóch nadkár yá wati sarkári cholópakár kár geptagant, tán edá é paydágiráni mandhiá ketábé ke shotag, á tawe Sájeday ketáb “Molk Molké Nán Darmolk” bitag. Taw Balócháni domi Karim Dashti ay, gón wati kamnebeshtahi o abadmániá.
Sájed! Taw ke Balóchi zobánay syáhagay sará kárá atay, man tai helápá Payzbokká pósthé dát. Séthá máná jost kot: “Hasá hayr ent?”
Man ke wati shashén kyás dhaletant, godhá Séth sarpad but ke é gón wat ent. É wahdá bázéné é bábatá chest o ér kanagá at. Sethá pameshká maná hál kot ke balkén Hasá hamáyáni redá ent.
Pahel kan Balóch!
Maná é paheli, hamá wahdá lóthagi at ke tai sará Lommah Jánay nebeshtánk sheng bitagat. Gón áiay wánagá man cha wat pashal bitán o delá atk ke cha mádará paheli belóthán bale cha wati pashaliá hecch gosht nakot.
Á nebeshtánkay tahá mani wadhén bázén nábudé dhóbárag bitagat o man watá hamáyáni tahá shomár kanán, ke Lommah Jáná pa tai káráni démá bésarén gapp wadi kanag o wassarén báwast kanok goshtagetant.
Man wassará pa Arabi syáhagay Sayad rahbandá tará dhóbáragá atán ke waty ham nazánagá atán o róche marchi ham nazánány, bale Hasá at wassará wat do macch o do kahir at. Á wahdá sangatán “Johdkáráni Pattár”ay námá Wadhzapi diwáné hast at. Man názákén Káriná Jahániay gálewárá Balóchiá gapp kot o Payzbokká pósthé dát ke Sájed Isáiáni gawrá bahá bitag, pa chandé kaldárá Balóchiá zawál kangá ent, syáhagá ganter mán gishénagá ent, beger bedár….
Sohbá wábá pád atkán dán Hasá cha Wadhzapay diwáná kasshag bitag o Galá ham máthu kotag. Mordeni ent maná Kiyáay sará sakk bad atk. Man hamé pahmet ke é drost Kiyáay kár ant.
Sájed! É taw atay poll! Ke yakké bonjol o domi nyádiay bestárá pa yakk zobánéay démrawi dayagá sharr pahmagá atay. Pameshká do kár yajjáh kanagá atay, yakké Opsálá o domi BNM. Hardokán pa Balóchi zobánay syáhagay gehteriá kár geragá atay, tawjilé sázagá atay. Chérmayn dáktar Nasim Ján, Kiyá Balóch, Ali Ján Dádá, hamráh3 Táj Balóchá. Domi némagá tai helápá Kázi Dád Mamad Rayháná gón Sayad Rahbanday gahédhén mannógerán Payzbokk badhá at o Zyá Balóch marchigén wadhá tóku at o gón wati path o póli goshádá yakk o yakk elmi nebshtánké ham dawr dayagá at. Anchó ke anni pa Rómaná gapp jant, dap o del ent.
Sájed! Man saddak án, taw agán eshtáp makotén, marchi pa Rómaná edárahé bitagat. Taw allam tawjilé sázagá atay, kárá atay, gón Galási o Charsiá jáká atay, kessah sázagá atay, pa Balóch, Balóchi o Balóchestáná kárá atay, o may wadhén shwánag…. adhay bebaksh, cháti pogol tará dhóbáragá atant.
Godhsará tará josté kanán. Poll, agan tará é kár dayag bitén ke anni Opsáláyá tai sangatáná dátag, taw chetawr kotagat? Taw ham wati é zandhén gotth bárag kot kotagat???
Háwanday mayár ay. Jáh tai wassh bát
Tai gonahgár,
Hasá Bejjár
19-2-2025
Cha panahgiráni bonjoléá