Kénagiá wati oshteray báray kolónth pa hashtád kaldárá bahá kot, kaldár dazmálay lambá bastant o lánká mán jatant, oshteray kóndh bastant o bázáray tanká borzád but. Áiá chizé sámán geragi at. Áiay métagay sawdágeray dokkáná choshén alkápén sámán nést at. Asorkazáay wahdá áiá cha bázárá wátarr kot. Harch sámán o tóshagé ke áiá geptagat, drost mán lachán kotant, oshterá raht per kot, kóndh bótkant, tang sharr mohr bast o dém pa wati métagá rahádag but. Cha bázárá dar atk, oshtery jóként o jammáz but. É wahdi magrabay taháriá mán shántagat. Oshter wati delay maylá bárag o chapp o chóthén ráhá goláth borrán at o rawagá at.
Mardom ke éok bit, áiá bázén hayálé kayt. Kénagi ham hayáláni rongráhán borzád but o shot o hamá gwastagén rócháni wasshén sáhatán raset! Hamé hayálán áiárá gwandhén sáhaté yakk jannatéá bort o rasént bale é hayáláni jannat chand sáhat at o damánéá rand á padá hamá oshterá jammáz at o yakk syáhén waddhéá éoká rawán at. Ni áiá wati delgósh shapay estáráni némagá tarrént, lagget estáráni cháragá. Delá hayály kot ke é tahárén shapá é estár chón trepagá ant! Erán, kaséá esháni pédág bayag ham yát nabit? É estárán bázén habaré yát ent. É pir ham nabant! É chó trepnák ant chiá? Haminchoká shayréay tawáré áiay góshán kapt. Kammé dirá galagé dém pa hamé ráhá pédák at. Galagay sárbán yakk pordardén o sóznákén shayré janagá at. Áiay shayray sarhál esh at:
Byá ke zahir maná naylant ent
Romb rombá jenekk káyant ápá
Chó sabáhay sártén gwátá
Maná kass nadant tai shóndátá
Byá ke zahir maná naylant ent
Shayr dán hamedá rasetagat ke cha hamáyán yakk zendagdeléá kukár kot o gosht: “Bogosh, adhay bogosh sotkadel ke é dirsarén ráh o syáhén shap pa bétawári nagwazant.”
Kénagiay hayálá cha estáráni tappásagá béraw kot o hamé shór o kukáray némagá shot. Kaséá goshay záná áiay hayálay tár dast jatant. Áiárá chengá naesht. Gotthy sakk boland o wassh at. Hamé washgotthiá áiárá mazanén dardé delá dátagat. Áiá sárbánay shayray passaw gón é gálán bená kot:
Bágáni kapót washáwázén
Bétawárá wati róchán gwázén
Emrózá wapá nést ent bázén
Byá ke zahir maná naylant ent
Cha Kénagiay dardmandén delá dar atkgén é chárén gál shapay syáhi o taháriá derrán but o shot o hamá galagay sárbánáni góshán ér kaptant. Hardoén némagán yakk bétawáriéá mán shánt, dánke galag ham atk o raset.
Yakkéá darráént: “Adhay wájah! Taw cha kai mardomán ay?”
“Kawdá Shahsawáray,” Kénagiá jawáb tarrént.
“Taw cha bandená pédák ay?”
Kénagiá gosht: “Haw.”
“Kolónthay che nehád ent bárén?”
“Hashtád kaldár,” Kénagiá gosht.
“Tará máhig gón? Márá chár dánag beday.”
Kénagiá chizé máhig áyáná dát o áyán chizé kolónth. Harkasá wati ráh gept o shot bale Kénagiay wati goshtagén shayrá áiay del kodént.
Á wati gwastagén rócháni yakk wasshén sáhatéay delsóchén tránagéá kapt. É tránag Máhán at, áiay kasániay hambal. Bale áiay sir do sál pésar gón yakk máldáréá bitagat. Máhán áiay kasániay dóst at. Á yakkén métagá rostag o mazan bitagatant bale sirá rand Máhánay mardá áiárá wati métagá bortagat. Máhánay métag Kénagiay ráhay sará at. Yakk baré áiay delá báz merr kotagat ke Máhánay jágahá mán tarr bale áiá wati delay habar hecch kemár nakotagat.
Ni áiay del záná cha áiay jendá gésh at o á yaddhawlá Máhánay bárawá hayál kanagá at ke bárén Máhán chón ent? Bárén che hálá ent? Máhánay delá angat mani wáhag hast? É yakk sawálé at ke áiá gón watá kot bale cha bázén dard o gamán thapp wártagén delá hecch passaw nadát. Padá wat jawáby tarrént ke Máhán kadi maná béhál kot nakant. Man Máhánay cháragá allamá rawán.
Hamá shapay bángwáhay wahdá áiay oshter Máhánay métagay némagá rawagá at.
Máháná ham pa Kénagiá sakkén dóstié hast at bale donyáay é dód ent ke yappaymá naóshtit. Marchi do sálá rand Kénagi pa áiay métagá rawagá at. Náháriay wahdá Kénagi, Máhánay métagá shot o raset. Cha yakk mardoméá josty kot. Áiá sój dát, “Á dhalay démay gedáná genday? Hamá Máhánay lóg ent.”
Kénagi hamá marday sójay padá Máhánay lógá shot o raset. Oshtery mashkay dárá bast. É wahdi Máhán shiray mantagá at. Áiá ke Kénagi dit, hinzaky yalah dát, tagerdy gerrán kot o gedánay pézhgáhá pach kot. Kénagi nesht. Máháná cha dirá wasshatk kot, pád atk, sódagé náhá porry kot, kaddahé shiry cha hinzaká ér rétk, áort o Kénagiay démá éry kotant o wat yakkerrá shot o nesht. Kénagiá yakk dapáré náh cha sódagá zort o dapá kot, cha kaddahay shirán goláthé gept, chamm chest kotant o Máháná cháragá lagget.
Doén chammy Máhánay démá sakk dátagatant, goshay záná Máhánay démá á chizéay shóházá at. Máháná sar chest kot. Doénáni chamm dochár kaptant. Kénagiá wati hósh barjáh kot o gosht, “Taw maná pajjáh káray?”
Máhán goshay cha wábá paddrahet. Hardo yakk degeréárá anchó cháragá atant goshay záná yakdegerá pajjáh áragay johdá ant. Sharrén sáhaté pa bétawári gwast. Máháná jawáb dát: “Ennán.”
É “ennán” pa Kénagiá jawábé naat. Goshay záná kaséá shelsarén kárché áiay delá jat. Áiá náh mán dapá jawr bitant, dast sódagay tahá hoshk tarret. Mazanén moshkoléá dasty cha sódagay tahá dar kot o gón cháderay lambá pahky kot, pád atk, sawásy pádá kotant, oshtery cha mashkay dárá bótk.
Máháná darráént, “Taw bárén náhári nakot? Sáhaté bejall, náhári bekan. Mani lógwájah cha ramagá kayt, garmá sárt kan, godhá boraw.”
Kénagiá pa parretagén gotthé jawáb tarrént, “Taw ke maná pajjáh nayáray, pa man é sártén sáheg garm ent. Cha darámaday sártén sáhegá watigay róchay sar sharter ent. Tai sáheg pa man ni sárt naent.”
Kénagiá wati oshter mahár kot o rahádag but bale ni áiárá pádán jawáb dátagat. Áiay jend ráhá rawán at bale áiay ruh chó berrén áhugá hamé dhalay démá pa wati jetá bitagén hambalay shóházá peryát kanán o serr bandáná rawagá at.
Morád Sáher