“Wati truá begend.”
Mani nákuá yakk zébáén jenekéay némagá wati dast shahár dát.
“Eshiá?” Man hayrániá jost kort.
“Haw, haw. É tai tru Dorgol ent.”
Dorgolay námay eshkonagá mani démá dah sálay yátáni wasshén nedárag gardagá laggetant. Áiay zébái, sekkah, rang o dánag, áski didag, káthárén pónz, kamánén borwán, márpéchén malgór har warnáén delá cha bandókán sendit. Bale maná áiay pollén démay sohrén lontháni wasshén bechkandag sakk dóst ant. Paméshá man nákuay é gappá ke tai tru Dorgol ent, báz hayrán mantán parchá ke á cha kasániá mani wáb o hayáláni mahdarwarén dottok at. Bale nun ke mani kamáshén nákuá wati lógbánok kortagat, pa man cha pegr o hayálán abayd dege hecch pasht nakaptagat. Pamé sawabá cha mani chammán arsáni ragám shaletant o cha delay bonbandá oppárán báhand kot, bale pa nákuay kóhén háterá man wati bétáhiri yakdam sahrá nakot. Bale chónáiá é gamáni bár pa mani nezórén bálád o saggá gésh at. Paméshá man pa dhannay rawagá wati gámáná pa gég o andám chest kot, gwashay ke dráhén zeminay bár mani chakká at.
“Assalám alaykom.” Man nákuárá salám dát o goshád goshádá pa wati báná dar shotán.
“Wálaykom salám. Boraw, taw Hodáay mayár ay.”
Man wati báná tahtay sará shakundém bután o pegr o andóháni tuppáná maná ropt. Man hayál kort ke may rawáján chinkas bédhawl o badrangén kárán wati dámonárá póleng kortag. Mani dhawlén chinkas warná pa wati hakkén armán o wáhagán talwasagá ent, bale á zálemén rawájay démá béwas ant. Maná hashtád sálién nákuay gón kasánsálén Dorgolá sur kanag sakk tawret bale chón kanán? Kamásháná pant o sój kanag mazanén béadabié. Pamé sawabá pa man náométiay áh o oppárán abayd dege hecch pad namant o man cha pahkén lácháriá gón Hodáyá jost o jawáb kort.
“Oo wájah Hodá! Mani gonáh o mayár chi ent? Chósh parchá but? Tai ham wáhag hamesh at ke Dorgol yakkéay anámat at, á dege kaséay lógay zéb o bráh bebit? É yakk wábé wa naent? Bale na. É wáb yakk allamén ehwáléay but. Mani didagáni ars náhudagá retkant. Mani donyá wayrán… o mani nákuay donyá ábád but.”
Donyáay chárén kondhán tabáhiá mán shántagat. Hamé tahármáhén shapá ázmánay estár drapshagá atant, bale mani tahárén shapay hamá drapshókén estál ke báz dérán rand dhalag butagat nun mermeránku but… o mani ométáni donyá har némagá syáh o tahár at, na ráhé pad, na dém. Cha wati delay haláhóshá zyárat o piráná tawáron per kot… Wati gránén gamáni sobakter kanagá dém pa masitá shotán o gón Hodáyá wá o zárion kort.
“Wájah Hodá! Bárén chósh but? Ach maróchiá dah sálá pésh man o Dorgolá tai pákén lóg (masit)á zenday sakki o sóriáni tahá hamráh o hamkópag bayagay sawgend wárt bale maróchi, dah sálá pad man ché gendagá án? Ke mani zendagániay rozhnáén máh degeréay lógá shahm kanagá ent. Rasté ke donyá sakk bérahm ent bale taw záná bérahm naay? Tawbah, taw ham kassárá hecch gosht nakort ke Dorgol yakkéay anámat ent?”
Yakk róché man wati yakk sangatéay dochár kapagá rawagá atán ke man Dorgol domi némagá áyagá dist. Man óshtátán bale á gón wati dazgohárán gapp janán cha man shegwast o man hoshk o hayrán bután ke á parchá chósh mawáz ent.
Róch shap o shap róch bayáná gwastant o man molur molur bután o har wahdá pegr jat ke Dorgol mani gwará parchá chó bé bramsh o tawárá gwazit, gwashay ke maná pajjáh nayárit. Man wati delá niyat kort ke man Dorgolá á róchay mowáziay sawabá zalur jost kanán. Paméshá man pa áiay lógá rahádag bután. Bale wahdé ke darwázagá sar kasshet ta diston ke á drájén ádénkay démá neshtag, wati mud o malgórán randag o wati jenday sambahénagá at ke yakk ródarátki janénéá chósh nabráhit, o cha áiay é hálatá man sakk padard bután. Man áiay bánay tahá potertán o darwázag band kot. Man sakk bétáhir atán. Bale áiá gón mazanén pahréá darráént: “Bogosh, che gappé?”
“Man… man…”
“Haw ji… ji… bogosh taw chiá torsay?”
“Man… man… taw nawassh nabay?”
“Ennán… taw bogosh na.”
“Dorgol…”
“Ji…”
“Dorgol! Má zendagániá yakk domiay hamráh o hamkópag bayagay sawgend wártagat bale mani rawagá rand parchá chósh but? Man wati delá chinkas wáhesh o armán dáshtag, pa lógá atkagatán bale mani dorsén wáhesh o armán gón hák o porán hawár butant. Maróchi man tará hamé jostá kanán ke é dors cha tai wáhagá butagant, agan na?”
“Haw… cha mani wáhagá.” Áiá wati chammáná jahl kotant o yakk nezórén tawáréá passaw dát.
“Taw godhá hamá sawgendáná zutt shamósht ke má pákén masitá wártant?”
“Enná… bale…”
“Bale… ché?”
“Bale nun zamánag báz démá shotag o é démá raókén zamánagay wástá mál lóthit…”
“…sohr o zarr lóthit.” Man áiay gappárá tawám kot.
“Taw nazánay, Karim! Maná gón tai nákuá hecch wáhag nést. Bale man gón áiay mál o dawlatá hobb dárán o tai náku marchi na bándát ent charé donyáyá rawt. Dege parchá cha áiay dawlatá páedag bekasshant.”
“Bass kan wati puttáriá. Man tai dhawlén makrbázén janéná zendagá pasht nagéján. Annun tai hamá hál bit, anchó ke yakk mazanén gonahkáréay, tánke taw cha wati locchén wáhagá dege kassá barbád makanay.”
Man yakdam Dorgol gothgir kort anchó ke yakk sháhiné jenjeshkay sará hizh bekant bale mani dast larzetant o yakk tawáré mani góshán kapt.
“Parchá wati nákuay armán o wáhagáni donyáyá wayrán kanay? Hamá náku ke tará harch o darchy dát… wánénty… tai har thahl o názy pojjet. Bale maróchi taw áiay wáhagáni donyáyá tabáh kanagá ay.”
Man shot o masitá tagerday sará dém pa chér kaptán. Bégáh, shap o shap, némshap but. Sáhat dráj but o wahd wati jáhá jekk óshtát. Mani arsay gawhar zeminay máti dámoná kaptant. Man pád atk o dhanná dar atkán. Man del porr at. Gam, wapá, dósti, béwapái, zend, Dorgol, náku, dard, del, ranj, zahrbár, dóst, nádósti, béwapá, donyá, mál, zarr, dósti, Dorgol, béwapá, mark, zend, koll áht o mani démá óshti atant.
Kojá…? Kojá…? Man ach wati delá porset. Mani sar jahl at o gón wati gamán jédhagá atán. Zend chéé? Wapá ché ent? Dósti kojámiay nám ent? Mani ráh kojám ent?
Delá padá dardé pád áht.
É kárch ent. Náku wáb ent, wati warnáén janay bagalá ent. Mani chammán dist ke Dorgol nákuay bagalá ent. Áiay bádámén chamm band ant o lonthy pach ant. Mani del ach zahrá porr but, hón mán ragán téz but, lonth gatth chetant, dast pa lánkay kárchá shot, gám téz kortant o pa nákuay lógá rahádag bután.
Anágahá kochekkéá wakket o man ach wati wábá ágah bután. Man wati chammáná chest kot, borzá cháret. Zemestáni shapay bisti máh ér rawagi at o chó sáli nádráhá mani némagá gendagá at. Zemin o ázmán máhay nuray cháderá wáb atant. Ázmán sáp at o estár jadhashkagá atant. Drachkáni kaptagén ták mani pádáni chérá chó proshtagén delá tawárá atant. Man wati chamm máhá sakk dátant o óshtátán. Máhay nurá mani del ach nurá porr kort. Opp, opp, zend. Delay taháriay tahá gerókéá jat. Dóstiay yakk lahdhé pád aht. É rozhnáén zardrangén máh, é kaptagén ták, é mortagén pollán mani dard, mani zahr, mani gam bahr kotant. Mani chammán ars áhtant, del chó ázmáná práh but, estár delá rók butant.
É thuhén práhén golzeminá béwapáén Dorgolá jágah hast. É zend pa nákuá ham wassh ent. É máh o estáli donyá, é sabzén zer, polláni donyá náku o Dorgolá nasib bát.
Man ach wati nákuay lógay ráhá padá gasht o dege ráhé gept. Mani gám téz butant. Mani zobáná wassh wasshá é labz dar atkant: “Náku! Dorgol! Maná pahell kanet!!!”
Nasim Dashti