Nebeshtahay jend sakkén zemmawárén o imándárén káré. Padá shahidéay sará nebeshtah kanag ched o gránter ent.
Padá pa yakk anchén mardoméá ke cha ramá sestagén némordag o pozhmordagén zendéay nyámá gón koht o bazhnán bárén saht o damánán pa áiá ché phar o ché shán pasht kapit. Albat hast ent wa phari gappé bale pa hamáhán ke hamá háká ant, hamá randpadán ant, hamá menndi o hamá nyádáni sáhegá ant.
Pa yakk gazzórén mardoméá shahidéay bábatá nebeshtah kanag, padá shahid Dáktar Mannán Jánay wadhén delér o budnákén syási rahshónéay bábatá grán naent balkén grániay hamá goddhi hadd ent, ched o dém hecch pasht nakapit.
Man dán nebeshtahay niyat bastag, was kanán béde andaray malámat kanagá dege hecchi nést. Bale hamé damáná ke man hayrán mantagán, ta dróshomé dará bit: lokk o káshén mid, gerd o bazén dém, gwandhborrén barót o gón trokketagén másh o kanagén risshán bechkandáná goshty, “Poll, taw ché jédhagá ay?”
Gón hamé gománá maná gappé gir atk. Ótágéá wahdé Bi.Bi.Si. (BBC)á pad nyád ke but godhá nódarbaréá gosht ke shahid harjáh may hamráh ant, kóh o jabaláni tahá, rongráh o bédehán máesh dhikk dién, may komakká kanant, saynkláni panchrán gerant o márá diant.”
Á damáná sangatán áiay hamá setkay satá kot ke gón shahidán bandók at. Chónáyá é gapp begenday choshén mánáé madárit bale wahdé gapp ke shahidá kayt godhá yakk setké mánit o yakk báwaré wadi kant. Á cha wati kortagénán pa taw mádanén ráhé bójit o tará menzelig kant.
Anni chó hamá sangatay gappá shahid Mannán Ján pa wati bábatá nebeshtah kanagá maná delbaddhi diagá ent. Drost wáb ant bale Dáktar ágah ent o wati ródaptará nebeshtah kanagá ent. Wati syási kárán abayd, Dáktar jágaháni nám o mardománi tab o maylán ham nebeshtah kanagá ent o wati jatagén sapará nebeshtah kanagá pad bándátigén wati kárrahbandá nebeshtah kanagá ent.
Dáktar cha rahshónéá géshter pakiré zánag bit. Áiay nendag o pád áyag, gón sangatán áiay rawesht cha syásatá báláter johdkáréay bitag, áiay mehr gón wati básk o rahshónán hawár gón wati ráj, zemin o zobáná hamincho mohkam bitag ke é drost pa áiá peráki bitagant. Áiay pakiriay tahá yakk bádsháhié pehnyám at! Maná josty kot, “É Zarrénbog ent, Dr. Asad hamed ent? Asad kojá bit? Dary géjet.”
Hamedá yakkéá gosht, “Wáju! Asaday brát janag bitag, Asad moshkol ent dochár bekapit.”
“Mani sangat ent. Man áiay brátay pattará allamá rawán. Sharr ent ke shomá nám gept. Chónáyá ham kasé ke janag bit shomá á kahólay pattará allam borawet.”
Márá zorty o shot Asaday lógá. Asad wat ódá naat. Dr. Mannáná pors jat. Shapá yá endege róchá Asad atk o Wájahy dáwat kot.
“Gesá nendag wassh naent. Mardom dhansari kawshé bwárt dege.”
Góbord, Hósháp, Dasht yá Negwar harkojá ke do say róchá thekánahy kot godhá syási kárán pad géshter kuchagán dar kapt. Kawr o kóh o gréshagáni shaydáié at. Yakk jonuné hast at Wájahay tahá. Harjáh ke man gón bitagán, galay básk yá las mardoméá ke dáwat o káré kotag, ta géshter gréshag o kuchagán dáshtag o warag chargy kotag.
Wájahay tahá dege yakk chizé ke man máretag, á áiay hamá dard o tawresht ke záheri dróshomá sangatáni gesar kapagay bitagant, áháni cher tarrénag o watá táhir diagá, yakké wa esh ke á géshter kárá yá sapará bitag, á wat yakk molmáié, yakk shogolé. Hamá lezzat o cháshnié ke tará cha shahidáni pasht kaptagén káráni kanagá rasit, dege hecch choshén ezmé nést ke incho táhir bedant. Bale wahdé ke gapp o rappi majles bitagant godhá sangatáni tahá yakké allamá áiay maskará o wazhgappiáni neshánag bitag. Gón hamé kandagdróshomén páhárán watáy sahdhéntag.
Beh yakkén jahá béde kárá báz wahdá naneshet, modám sapará at, sapar dar sapar. Áiá wati zend yakk saparé kotagat. Jáhé parpath o saynkal, jáhé har o hoshter o jáhé móthal o gádhi, métag pa métag, halk pa halk. Dáktar ke harkojá awali bará shotag cha áiá pad kojám ham sangat o rahshóné ke hamá hand o damagán shotag ta á handay mahlukay awali jost Dáktaray bitag.
Dáktar Mannán Jáná shahid goshag goshay wassh naent.
Á neshtag, thiwi chálu ent, Káderi o Emrán Hánay darnáyá cháragá ent. Nazánán kayá gosht ke Wáju, taw sóch eshiá, byá pattáié kanén.
Goshty, “Ennán, eshiá masóch. Eshán allam bechár o gósh dár.”
Dege yakkéá gosht, “Taw eshiá goshay? Dáktar Wassh Thiwiá ham chárit. Wasshay ni chárag bitag.
Wassh chálu ent. Aslam Bolaydaiá Bashir yá Zarkán jostá ent. Má yakk gwandhén ótágéá neshtagén. Lógay pézhgáhá diwán ent. Métagay kollén janén, mardén, warná o kamásh, koll neshtagant o Dáktar tráná ent. Gal, johd, zemin, zobán, hambastagi o hamsannatiá gón bandók bayagay pant o sekéná diagá ent. Báskáni jostáni passawán diagá ent.
Gali jédhahé gissh o giwár kanagá ent. Kojá na kojá yakk sor o poré allam kanagá ent. Gón kollén shahidán hawár galay rahshóniá kanagá ent.
Danigata kár sarjam naant. Bázén káré kaptag, bázén jédhahé gishwár kanagi ent. Bale Bacchuá kay jawáb kot kant? Hamé sahtá kayt goshit, “Abbi! Sangatán ólák jádhi kortag pa Mastóngay rawagá!!!”
Hasá Bejjár