Hodá


(Mámá Kadiray ráh o hamráháni námá)

Hodá! Taw Ádamé wadi kotag
Padá chia shamoshtagay
Pa bandagiá drachk o dár bass etant
Chó zendagiá morg o már bass etant
Hodá! Tai Hawá koj ent
Sahi naay?
Hodá-madistén didagáni jost o pors dam barant
Pa lóthagá Hodá rasit?
Bolóth taw, maras Hodá
Pa dastay jahl o borziá maras kassá
Narasetagay, kadi maras
Rawán kant é zendagi
Hodáay námá nyádié
Hodáay námá métagé
Masit bit ke mandaré
Hodáay námá hóthalé
Hodáay námá mádhié
Hodáay námá gádhié
Hodáay námá daptaré
Hodáay námá mardomé
Hodáay námá pattaré
Hodáay námá pendhagé
Maras Hodá, kadi maras
Masitay wájahá maras, sará pa labb jahl kant
Na mandaráni ganthiáni thelingagán
É hóthaláni málekán chó gozhnag ant
É gádhián sawár angah pyádag ant
É daptaráni hasht-sáhti
É nyádiáni kahbagi
É pendhagáni wájahi
É mardománi rastari
É mordagi o módagi
Maras eshán, kadi maras
Hodá! Taw morgán rasetagay
Hodá! Man sohbi neshtagán
Taw gwandhóáni kandagán gón gwastagay
Pa maktabá
Hodá! Taw mátéay del ay
Ke bacchay lásh kaptagy
Hodá! Tará zahir kant pa Ádamá?
Hodá! Tai hawá koj ent
Sahi naay?
Mani Zarinah bandi ent
Hodá! Taw bayrakáni bandi ay
Tai chamm o dast o pád bastagant
Tai tawár bétawará bortagesh pa páhóá
Bale tarárá kay koshit?
É hóthaláni gozhnagi
Chó módagi o mordagi
Pendhagáni wájahi o rastari
É béwati o kahbagi
É hasht-sáhatáni daptari koshit tará?
Hodá! Eshán narasetagay, maras kadi
Hodá! Taw áyán rasetagay
Hodá! Taw á ent gwastagay
Hodá! Á lásh kaptagén
Hodá! Á brát bortagén
Hambalán cha sestag o jetá naent
Hodá! Á gohár neshtagén
Hodá! Taw mátéay del ay
Hodá! Man sohbi neshtagán
Taw gwandhóáni kandagán gón gwastagay
Hodá! Taw morgán rasetagay
Kapóti proshtabánzoléá bastagay

Kambar Mobárek

Leave a Comment