Maraw Hanni

Maraw hanni, benend sahté
Benend sahté, man nadrig án
Benend ke nókjawán ent shap
Bayán ant paddar nók estál
Dar atkag nóki máh nókén
Bechár ke nóki mahkán ent
Patátag cháderé syáhén
Kóh o tall o shépán nók
Sobakkén gwátá nók bótkag
Zeminay kágadén jigband

Maraw hanni, benend sahté
Benend sahté, man nadrig án
Benend ke par taw tonnig án
Benend man par taw kawlig án
Benend o gapp bejan wasshén
Dege sahté o dege pásé
Benend dán shap bebit warná
Bewaspit máhekán sártén
Bewaspant halkay mardom drah
Bewaspant jangalay shántol
Benend ke hecch nagoshtag man
Benend ke hecch nagoshtag taw
Benend démá tai chárán
Kanán gwázi gón zolpán tai
Tará chokkán delá darán
Delá darán o wázárán
Benend o bahr bekan gón man
Wati pollén taw esárán
Benend ke béde taw delbar
Pa man donyá é badrang ent
Benend o hecch mators mahrang
Cha dód o bésarén rasmán
Benend dánke bebit ent sohb
Begendant márá mardom drah
Bebit tálán drahén halká
Habar may mehr o dóstiay

Maraw hanni, benend sahté
Benend sahté, man kawlig án
Benend ke chér bén tán kad
Cha torsá molk o mahlukay
Watá tákad kanén andém
Cha bimá róche rahmánay
Taháriá nazánay taw
É chér o andarén donyá
Baláhén wat gonáh ché kant
Watá ke é goshant pársá
Watá lékant malang o pir
Namannant o goshant belly
Bozerg én má, má darwésh én
Sepédpósh o wali én má
Pakir én má hodátorsén
Hatákár o gonahgár ant
É jimár ant, é syahmár ant

Maraw hanni, benend sahté
Benend sahté, man nadrig án
Benend ke sohb bit belly
Begendit sajjahén álam
May jend o may mehrá
May pahkén mohbatay shahmá
May hajgén wáhagay pollá
Benend haw ke bándátá
(Cha) shapay kotthá hawasnákén
Sabáhá má dayén mestág
Wati mehrá má názénén
Doén róchán é zendaygán
Wati hóriá gwázénén
Benend sahté, maraw hanni
Maraw hanni, man kawlig án

Golám Hosayn Shóház