(Wádh nambar 6, Passeni)
Proshtagén óstáni dhanné sirkagén
Pipokéá seng mán
Badtawárén dódéá dastá kotag
O layb dárit métagá
Angarén chammán gón chárit métagá
Taw ke bár dátag
Mani chédag wati arwáhay gongén máneshá
Man tai chahrag wati chammáni lonjén gobbahá ógáretag
Taw magosh ke man kay án?
O man nadhassán hecch tará
Taw nazánay taw wati
Maiyat shamoshtag mán kojám chánthay dapá
Damk chó apsá shedán ant o gwazant
Pádmál ent Ádamay óbádagay
Bé chamm o pónzén ákebat
Thithalén wábáni sakrátá chó danzá jalletag
Man wati dóstigén chamméay tahá sar kasshetag
Dán mahsharay wábá godhet
Chó tazbiay yakk ámagén ótágéá
Sestag zamánag…
É damán o róch o máh o sál
Shengáná gesar butant cha yakké domiá
Chó mohragá
Kay bezánt ke taw kojá ay…?
Man kojá…?
Kass wati jáhá naent
Bass thithalén wábáni sakrátá chó danzá jalletag
Monir Mómen
(Yakk Bechilé Ázmán)
