Garmági bégáhé. Man hásthalá wati kóthiá éok án. Ketáb mani démá ent. Wati mannán wánagá án bale hayál saht o damáná thagalit. Do róch bit ke mani sangaté gádhiéá dám kotag, koshtag. Hamá ent ke é sangat mortag man yappaymá hamé hayálá án ke zendagi chéé? Parchá damáná hallit? Zenday menzel modám marg ent parchá?
Man dáktari wánagá án. Em Bi Bi Esay goddhi sálá án. Ensánay zend, áiay zendagén jánay ráh o rahband o áiay nájódhiáni bábatá bázén ketábé wantag, cha ostádán bázén gapp o tráné eshkotag, wat ham hayál kotag bale angat zenday bábatá mani jost bépassaw ant.
É jáwar baré baré maná delprósh kant. Del goshit bell é dáktariá, zendá marg har paym per ent. Moptá wati chammáni hirdagán parchá réchay? Sóch é ketáb o darmáni donyáyá. Boraw jangal o gyábánéá. Mastén kawshá loddhókén drachkáni sáhegá benend o áyáni zhámb zhámbá gósh dár. Bekassh emrózay wasshén kawsh. Máhekánén shapán borzén kóhéay thollá benend o máhá bechár. Begard, sayl kan. Paré jangal o pará kóhestán. Zenday chárén róchán cha donyái gam o garatthián dir delserén abramay hamsáhegiá gwázén.
Mani chamm almáriá jatagén esthikaray némagá rawant. Zardén kágaday sará gón sohrén labzán nebeshtah ent:
Don’t take life too seriously. It isn’t permanent.
Mani kóthiá dege hecch aks, sáldar yá dege chizz najatag. Bass hamé yakkén esthikar ent ke man cha bázárá yakk róché áort o jat. E mani delpasondén goshtenán yakké. Man hamé goshtenay padá zendá gón bépekriá gwázénag lóthán.
Gránén tawáré mani góshán kapán ent. Goshay jambar grandagá ent yá báligorábé gwazagá ent. Man pardahá kenzénán o darigá dhann chárán. Dhanná hawr ent.
Mani kóthi borz borzi tabakká ent. Cha darigá dir diray nedárag gendag bit. Hásthalay nazzikén kawr, kawrá ádastay molk o dhegár, bán o mádhi, dir borzén Kóhe Mordár o padá ázmán. Bale ni é nedárag kappi ent. Hawrá ázmán o kóh andém kotagant.
Hawr trond bayán ent. Á do mardom ant. Hawrá geptagant. Tacháná dém pa práh o bazén drachkéá rawagá ant ke áiay chérá pasé pésará óshtátag. Genday drachk ham pa newán o panáhá betachant godhá layb bit. Bale é natachant. Garm bit yá gwahr, gwát bit yá hawr, górich bit yá lewár, tapar bit yá harrag… é óshtátagant. Merant yá zendag bant bale natachant. Esháni ham zendé. Drégatén man drachké biténán. Kamm cha kamm mani tahá margay démá óshtagay hemmat yá majburi wa bitagat.
Yakké darwázagá pajjárókén wadhéá thokkit. Man goshán byá o á poterit. É kanthinay kamáshén nawkar ent ke áp o cháhay jostá atkag.
“Dáktar sáheb, cháh byárán?” á jost kant.
Man sará pa haw sorénán o á dar kayt. É ham mardomé. Zenday bárawá eshiá ham hayálé hast? Wadh wadhén gapp delá kárit? Nazánán choshén mósomá á mani wadhá zend o margay hayálán ent yá chó drachká choshén chizzán béhájat ent?
Sahtokéá rand á gón cháhá kayt.
“Náku!” man cháhá dast gerán.
“Hán ji.” “Édá korshiay sará benend. Man cha taw josté kanán.”
Á nendit.
“Anni é mósomá ke hawr gwárán ent, gerók chilk warán ent, jambar grandán ent, dráhén dhann o dhegár áp ent, é wadhén wahdán tai delá chónén hayál kayt?”
Mani jostá á hayrán ent. Goshay man anchén gappé jatag ke éoká gwandhuán yá ganókán bráhit. Á mani gappá sarpad bayagay johdá ent o man cha wati jostá pashómán án.
Kammé hayál kanagá rand á goshit:
“Man goshán hawr mabit.”
“Chiá?” Ni man hayrán án.
“Agan hawr bass makant mani hák o gelay lóg kapit.”
Man nákuá chárán o padá mani chamm esthikará rawant bale hecch nagoshán. Dánke cháhá hallénán.
Dér ent ke nákuá cháhay háligén kóp zortag o cha kóthiá dar atkag. Dhanná angat hawr ent. Grand o gerók ent. Drachkay báhóth angat óshtátagant o esthikar…?
Esthikaray dertagén thokkor buchdánay tahá kaptagant!
Nágomán