Á mazanén chortéá kaptagat. Kesás ném kalák aty ke Sandhéman Séwal Espetálá médhikal esthudhantháni kanthiná neshtagat o hayál kanán at. Gapp dege hecch naat. Bass yakk narséá ráh rawáji wati anchén jáhé kechént ke á yakk baré wa óshtát. Bale wahdé nars gón bédelgóshi kechénáná démá shot, á ham kanthinay némagá rah gept. Cháhé lótháénty. Ketáby pach kot o chizzé wánagá lagget bale damáná hayály thagalet o narsay némagá shot.
Narsá wati hamá jáh kechént!
Bell kechénty. Kechag harkasá gipt. Taw bárén watá kechénay? Deger ke kechénant taw wadh wadhén gapp delá káray?
Bale áiá wati é jáh mani démá chiá kechént?
Kechagá geptagat pameshká.
Na, kechagá nageptagat. Áiá paygámé dayagi at.
Ensáp kan yár! Agan paygámé dayagi bitény godhá áiá tai némagá cháretag o bechkandetagat yá dege eshárahé kotagaty. Áiá hecch nakot. Tai hayálá naat. Wati wadhá at. Taw wassará chest ay ke pa man kechéntagy.
Belly mani hayálá naat bale zánán é kasánsálén narsá mardéni nyádáni talab nést? Nózdah bist sáli jenekké. Rawán saláhé janány. Áiay del allam sorit. Sengé naent, mardomé.
Hódh! Balkén á pákdámonén jenekké. Bad bebárt godhá?
Belly bad bárt. Kabrán kalampóg mán nést.
Mazanén ger o chilléá rand á gón mohkamén erádahé cha kanthiná dar atk o dém pa wárdhán shot. Wárdh pa wárdh tarráná goddhigá áiá hamá nars dar gétk. Á espéshal wárdhay estháprumá nendók at. Áiay gwará dege narsé ham óshtók at ke zittán tapcháré zorty o dar atk. Á pa poteragá jádhi but ke némomray mardé goshádiá kóthiá potert o narsay kerrá shot. Á nádráhéay páneg at o darmánáni bárawá cha narsá jostéay geragá atkagat.
Áiá hemmat kot o potert. Salámé dáty o óshtát. Narsá áiay salám alayk kot o korshiay némagá eshárah kot. Narsá charáiay dastay ketáb o estheteskóp o gwaray espétén kóthá zánt ke médhikal esthudhanthé.
Nars gón hamá mardakárá gappá at o á hayál kanagá at ke narsá chón wati gappá bogoshán, bongéj chón bekanán. Hamé bogoshány ke taw wati hamá jáh chiá kechént?
Na, na. É wa jost kanagay wadhé naent. Hamé goshány ke Shálay zemestán tará éokiá wassh bant?
É ni josté? Wassh bant, nabant, tai chontomi!
Á mardá gón narsá gapp halás kot o dar atk o narsá warnáén dáktaray némagá cháret.
Yá Hodá! Man ché bogoshán o chón bogoshán?
Narsá thébalay sará chizzé kágad sar o chér kot o padá áiay némagá cháret. Áiá sar jahl kot. Mán é zemestáná ham áiay pónzay sar héd at.
Man tachká goshány ke maná wati mardom bekan. Wahdé narsá dit ke warná hámóshá neshtag, hecch nagoshit godhá wat josty kot: “Hán dáktar sáheb! Káré, tarragé?”
Áiá dap porr o hálig kot bale hecch… Hédéá sar kotagat o ni drahagy ham bená kotagat. Áiay hál chó hamá gayratdárén bale majburén mardomá at ke awali randá kaséay démá pa pendhagá dastá thál bekant.
Áiá narsay némagá cháret. Anágahá áiá samá but goshay é nars áiá marchigá pésar ham ditag. O padá áiá yád atk ke máhé kappé pésar á róshomi tapán tahtay báhóth kotagat o hamedá espéshal wárdhá dákel bitagat o é nars róché say chár bará áiay tapay chárag o dawá o darmánay diagá atkagat.
Ni á ganter gadh o monj but bale padá gón é hayálá áiay del kammé dhaddh but ke bit kant hamé kwahnén pajjáróki mani ráhá sáp bekant. Narsá wahdé áiay héd o drahag ditant kammé paréshán but.
“Tará chón ent dáktar?”
“Maná… maná hecch naent. Bass man tai cháragá atkagán. Maná zánay?” Wárié hamé gapp cha áiay dapá dar atkant.
Narsá á sharriá cháret o gosht: “Na, maná hósh nakant.”
“Man máhé kappé pésh hamedá dákel bitagán. Maná róshami tapán geptagat.”
“Hán, hán. Ni maná yád atk.” Narsá tránag kot o padá sharriá cháráná josty kot: “Ni taw wassh ay, na?”
Áiay delá atk bogoshán ke man cha á nádráhiá wassh bitagán bale degeréá gwar jatag o eshiay eláj taw wat ay. Dawá o darmáni káré naent… Bale dapá goshty: “Haw, ni wassh án.”
“Taw anchó héd atay o drahagá atay ke man paréshán bitán,” narsá kandáná gosht o á kammé pashal but. Narsá paráiá cháhé lótháént bale áiay sar jahl at o bétawár at. Narsá áiay némagá cháráná jost kot: “Dáktar! Tai nám kay ent?”
“Nám… Nágomán ent.” Áiá anchó passaw dát goshay ámidgesá káziay démá óshtátag.
“Maná bráté hast. Tai omrayg bit. Hamángor Paysalábádá ent. Námy Nawmán ent. Námy tai wadhéné o wadh o paymy ham taig ant. Tai wadhén lajjué. Lógá ham chó mehmáná ent. É dawrá wa jenekk choshén lajju nabant,” narsá kandet.
Áiá hecch nagosht. Bass bechkandety.
Ni bezán eshiá maná wati brát kot?
Na, na, pa dapay goshagá hecch syádi nathahit.
Chó haw bale é ke maná brátay hesábá cháragá ent, eshiay kerrá man kojám dap o ápá choshén gappé bejanán?
“Dáktar! Tai cháh sárt bit,” narsá gosht o á goshay godhet. Eshtáp eshtápá cháhy chest kot. Dasty anchó larzagá atant ke kammé cháh áiay espétén kóthay dámoná ham retk. Áiá sártén cháh do golombá goláthet. Á padá hédá sar kotagat o larzgá at.
“Taw wassh ay, dáktar?” Nars kammé paréshán but. Cha wati jáhá pád atk o áiay gwará atk. Rástén dast áiay péshánigá éry kot. Á chó botá neshtagat. Na sor o poré, na gappé.
Anágahá áiay dast soretant o domi sahtá narsay dast áiay dastán at. Áiá narsay dastay poshtá wati taptagén lonth ér kotant. Bósagé gepty o goshádiá ketáb o estheti zortant o zhappagá cha kóthiá dar atk.
Nars bah o bakkadh óshtátagat. Dán sahtoké á anchó hayrán hayráná óshtát o dastay poshtá cháráná é ajabén bachakkay bárawá hayály kot o padá áiay lontháni sará bechkandé atk. “Námánay jend ent,” áiá bechkandáná gón wat gosht. O padá watá kechénáná dém pa wárdhá shot.
Nágomán