Taw mani kocchalán manóshátay
Taw mani sakkián magendátay
Taw wati rájay wat bebay master
Cha watá masteré taw maylátay
Gwandhén teblé bebátay kandókén
Taw yakimi pa chamm magendátay
Taw bebay mát o gohár hakkién
Gorr mardini hecch masaggátay
Pet taw hamkár bátay chokkáni
Taw watá masteré malékátay
Har wadhén sánkalán bopróshay taw
Makkén warnáé ájuén bátay
Dhanná harkas ke kayt o rájá jant
Cha wati golzeminá kasshátay
Hecch tepáwat mabit tai rájá
Zarray o málay, zóray o zátay
Taw bebay marg jangbázáni
Gón watá émeni benendátay
Zór o zarrá bedáray káray golám
Rasm o wahmay hayálán chotthátay
Molk darmolkay zálem o dozzán
Yakk yakká taw kall kanán bátay
Wájah o master o kamásháni
Nám o bonmál pasht magéjátay
Rók dánáiay cherág bebit
Zántay shóházá har jáh gón bátay
Taw wati nék o pákén lóthán gón
Molk o darmolká nám byárátay
Cha watá masteré mamannátay
Pa kassá dast taw mabandátay
Taw wati kóh o patth o gyábán o
Kuchagay master éoká bátay
Marchigén mardománi janjálán
Mardomé dar byayt bándátay
Hán Sáber
(Janwari 1978 / Shál)