“Sabzal!”
“Hán.”
“Borén kóhá.”
“Chiá?”
“Sharábé warén.”
“Parchá?”
“Yakk baré mósomá bechár! Randá bogosh parchá.”
“Am m m… Cháretag. Man nayáyán gón.”
“Sharr ent, bábá! Gamé táchénén.”
“Maná gam per nést.”
“Gam harkasá per. Zyadah mánjái makan, byá.”
Sabzalá kammé hayál kot. Padá gádhiay darwázagy pach kot o Aslamay kashá nesht bale hecchy nagosht. Kammé dérá rand doén shahrá dir kóhéay washkawshén thollá neshtagatant. Paykéay waragá rand Sabzalá Aslamay gapp tránag kot.
“Aslam! Taw ché gosht, gamé táchénén?”
“Haw.”
“Cha sharábay waragá gam natachant, má wat tachén.”
“Chón?”
“Anchó.”
“Bale taw bogosh chón?”
“Bechár, wahdé gádhi tachit sawáriáni chammán nazzikay kóh, drachk o lóg dráh gón zrábá rawán ant bale chó naent. É sharáb ham gádhiay wadhá mardománi delá wassh kant. Warókay hayálá gam tachán ant bale asalá áiay jend tachán ent.”
“Hum m m.” Aslamá cha wati payká gotthé gept o sar sorént.
“Tai gapp rást ent bale mardom gádhiá chiá sawár bant?”
“Gádhiá chiá sawár bant? Jágahé rawagay wástá.”
“Bezán sapar áyáni majburié.”
“Haw… Taw gosht kanay,” Sabzalá hayál kanáná gosht.
“Anchó ke gádhi tará cha yakk jáhéá domi jáhá bárt, hamé paym sharáb tará cha yakk wahdéá domi wahdá bárt.”
Aslamay gappá goshay Sabzal chortéá dawr dát… Man cha yakk wahdéá domi wahdá sar bayagay wástá sharábay gádhiá parchá sawár án? Mani gam ché ent? Áiá delay potenk patthetant bale hecch choshén gamy dast nakapt ke sharábay warag beparmáit. Á dráhjánén warnáé at, rang o dánagá sharr at, wánagá at o paráiay bándátay sambahéngá sharrén sharrén kár o nawkari ér atant. Wagarna áiá nawkari o káray ham hájat naat. É dráhén wasshi o ásráti wati jágahá bale padá ham goshay áiá gamé hastat. Yakk bénámén gamé, yakk béneshánén dardé. Bale kojám? Áiá hecch nazánt. Wahdé wati gamy dar gétk nakot, godhá Aslamay bárawá hayál kanagá lagget bale sarzáherá Aslamay kerrá ham hecchay kammi naat.
“Aslam! Tai gam ché ent? Taw parchá sharábay gádhiá sawár ay?”
“Mani gam? Mani gam esh ent ke mani kash o gwará sharrangén jenekk mocch ent. Man lóthán ke yakkéay sará áshek bebán. Mani delá béke áiá dege kassi hayál mayayt. Áiay sará ganók bebán bale gón man nabit,” Aslamá gosht o Sabzalá wati bénámén gam dast kapt.
“Mani ham anchén jédhahé bale…” Sabzalá gosht bale Aslam géshe wati kessahá naat.
“Agan jenekké gón man nazzik bayán bit, man delá goshán é jenekk anni wa sharr ent bale bárén démá chón bit. Begenday mani lógá bayagá rand cha man o sharterén bachakké dósty bit o gón man béwapái kant yá nájódhié gipty o pa man janjál bit o mani mehr kamm kant. Hamé paymén waswásáni tahá mán gisshán o é paysalahá kot nakanán ke gón é jenekká dósti bekanán yá na.” Aslamá wati gapp tawám kot.
“Man tai gamá sarpad bitán, Aslam!” Sabzalá sar sorént. “Mani ham anchén kessahé bale mani janjál esh ent ke maná cha jenekkán torsit. Man delá goshán agan jenekkéay kerrá wati dóstiá záher bekanán, á bárén ché goshit. Chó mabit ke maná eshkbázén, yalahcharrén bachakké sarpad bebit o mani mehray kadrá makant. É wadhén gapp delá kárán o hemmat nabit ke gón jenekkéá wati dóstiá záher bekanán. Anchó, anchó, yakk wahdé kayt ke á jenekk delprósh bit o dege bachakkéay némagá rawt. Man hayrán án ke ádege bachakkán é hemmat chón bit ke gón jenekkéá goshant: taw maná dóst bay.”
“É wa hayr moshkolé naent,” Aslamá darráént. “Jenekkay kerrá dóstiay záher kanag gránén káré naent. Mani hayálá gránterén kár esh ent ke man jenekkay sará ganók o shaydá bayag lóthán bale nabán. Mani sar hamé gappá dar narawt ke Shay Morid pa Hániá chón ganók bitag. Inchok sakki o sóri áiay démá atkag, á parchá nabajjetag. Á chón saddek bitag ke Háni béwapái nakant. Man parchá Moriday wadhá eshk kot nakanán?”
Aslam kammé bétawár but. Padá goshty:
“Mani hayálá mehray dawrá laddhetag.”
“Na, chó naent.” Sabzalá cha wati némánén bolórá gotthé gept. “Mehray dawr nashotag. Báhóth o Ján Bibi chón ant pa yakké domigá! Mazár o Zarátun. Pendhol o Zobayd… Dráh may hamsaru ant. Pa yakké domigá chón shaydá ant!”
“Má chón bekanén yár?” Aslamá áiay gappay tahá dawr kot. “Goshant ke á warnái warnáié naent ke bé eshká bogwazit. Má chón bekanén ke wati warnáiá warnái kot bekanén?”
“Sir bekanén, chón ent? Padá gón janán eshk kanén.” Sabzal ném del o ném maskará at.
“É wa nakli eshké bit.”
“Dege wadhé kanén. Cha Báhóth, Mazár, Pendhol o chamé bachakkán jost kanén ke shomá chetawr eshk kotag? Márá ham sar o sój bekanet.” Sabzal angat maskaráay chádhá at. Aslamá bechkandet bale hecch nagosht. Saymi paykesh anchó bétawári o jédhag hallént. Wahdé cháromi payk kayl bitant, Aslamá sakk dir cháráná darráént.
“Sabzal! Ódá bechár, dir hamódá ke zemin o ázmán dhokkant.”
“Hummm, gendagá án.”
“May chammán zemin o ázmán dhokketagant bale chó naent. É na hór bitagant, na bant.”
“Haw bale taw ché goshag lóthay?”
“Man hamé goshag lóthán ke Morid o Háni, Laylá o Majnun, Rómiaw o Julieth inchok nazzik nabitagant chó ke máesh gendén.”
“Bale Aslam! Áyán pa yakké domigá har sakki o sóri saggetag.”
“May chammán haw bale begenday é gapp rad ent. Anchó ke anni may chamm rad waragá ant o zemin o ázmáná hór gendagá ant.”
“Na yár! Chó naent. Eshk mardomán yaddel o yajján kant. Zemin o ázmán deli dóst naant. É chó hamá bémehrén mard o janá ant ke mardománi chammán hór ant bale áyáni del karnáni diriá ant. Domi némagá Morid o Háni belly jedá bitagant bale áyáni del hór bitagant.” Sabzalá gón jazm gosht o Aslam goshay cha wati pésari gappá bajjet.
“Yár! Má kadi hamé paym bén? Márá kadi eshk bit? Á róch kadi kayt ke má ham kaséay wadárá shapán róch o róchán shap kanén? Á róch kadi kayt ke má ham kaséay zámorén bikkáni sártén sáhegay háterá sakkiáni sóchákén lewárá saggén? Á róch kadi kayt?” Aslamay tawár larzgá at.
Áiá wati hórkén gelásá sharáb thallát o bé ápá goláthagá lagget. Sabzalá á nadásht. Áiay del ham anchén jost gón watá kanagá at o passaw hecch néstat. Áiá ham wati gelás cha zagrén sharábá kayl kot o yatteng kot… o damánéá pad bótal halletagat.
Aslamá bótal dastá kot o chammáni nazziká áort goshay bótalay tahá hirtén chizzé cháragá at.
“Bé sharábá bótal hecch kárá nayayt.” Áiá bótal mán borret ke kóhahay boná shot o kapt o thokkor thokkor but. “O bé eshká warnái békár ent. Sabzal! Byá wati é békárén warnáiá é békárén bótalay wadhá kurráén, thokkor thokkor kanén.”
“Chetawr?” Sabzal hayrán but.
“Byá dawr kanén chedá.” Á tattaráná pád atk bale Sabzal cha wati jáhá nasoret.
“Sabzal! Chiá hayál kanay? Man delá saddek án ke may warnái pa mopt rawt. Má beh eshk kot nakanén o béeshkén warnái chó sharábay hórkén bótalá ent ke béke próshagá dege hecch kárá nayayt. Byá Sabzal! Hamá jaháná rawén ke ódá na gam hast na wasshi. Na warnái hast na eshk. Byá rawén hamódá ke wájah Hodáay hankén ent. O charáiá jost kanén ke taw may kesmatá parchá hórkén bótal nebeshtah kotag?”
Aslamá Sabzalay dastá gept, zhappet o pád kot. Hardo bé gapp o habará, tattaráná shot o kóhay kalánthagá óshtátant. Sabzal goshay Aslamay gappán sehr kotagat.
Hamé sahtá zhappagá chizzé áyáni sará gwast. Hardokán borzá cháret. Do kóhjeng yakké domigay dombá bál atant. Baré ingor cherriesh jat baré ángor. Begenday á hakk o del medhagá atant yá begenday sáchánén mósomá mast kotagatant.
“Oo Hodá! Taw márá hórkén bótal dát o má eshiá thokkor thokkor kanagá én.” Aslamá gón lellén zobáná darráént bale Sabzalay delgósh gón morgán at.
“Sabzal!” Aslamá á thóhént.
“Hán,” Sabzal godhet.
“Byá ni dawr kanén.”
“Kammé bejall yár! É jengolán chárén. Bárén kay gésh bit?” Sabzalá é dém o á dém cherri janókén morgáni némagá cháret.
“Sóch eshán.” Aslam zahr gept.
“Na yár! Meragá wa má hamá wadhá merén. Esháni tamáshahá wa bechárén.”
Sabzalá gapp dapá at ke hawray trampé áiay lonthán lagget. Áiá lonthán zobán per mosht. Nókápay tám cha sharábaygá washter at.
Kóhjeng yakké domigay poshtá bál kanáná dege némagé shot o gár bitant. Dir geróká jat o granday sobakkén tawáré atk. Jambar gwáragay wadhá atant. Cha dirá kapótéay kukuay tawár góshán kapt. Sabzalay chamm hamódá shotant ke ódá ázmán o zemin yakké domigá ambázán gerán atant.
Anágahá Sabzalá darráént: “Aslam!”
“Hán,” Aslamá loddháná gosht. Á hamé wadárá at ke kadi Sabzal dawr kanagá jádhi bit.
“Má watkoshi kanagá én?”
“Watkoshi?” Aslamá thahk dát. “Na yár! Watkoshi zendagén kanant, má wa pésará mortagén.”
“Chón?”
“Á zendá ke mehr o eshk mabit margay darwar ent.”
“Bale Aslam! É wasshén kawsh, é nód o sáchán, grand o gerók, drachk o dár, kapótáni kuku o mósománi masti… Má é drostán yalah diagá én. Márá pareshán zahir nakant?” Sabzal goshay bajjetagat.
Aslamá borzá lónjánén jambaráni némagá cháret. Kóhay chapp o chágerdá gón kawshá loddhókén drachkáni némagá chamm shánk dátant. Démy gón kawshá kot o chamm nazz kotant bale hecchy nagosht.
Bárén chinchok damán anchó gwast. Sabzalá Aslamay dastá gept. Aslam godhet o áiay némagá chárety. Doénán dán sahtokéá yakké domigay chammáni tahá cháret o padá Sabzalá Aslam zort o shot o wati péshi jáhá neshtant.
“Aslam! Zend wassh ent. Chó yalah dayag nabit. Turi eshk bit yá nabit,” Sabzalá gosht.
Aslam chó botá bétawár at.
“Eshtáp makan, Aslam! Zendagi bit, yakk róché mehr o eshk ham bit. Agan mabit ham, tai é gapp rad ent ke bé sharábá bótal békár ent. Hórkén bótal báz kárá kayt. Hórkén bótalá má áp mán kot kanén ke zenday bonyád ent. Bénagy mán kot kanén ke támáni bádsháh ent. O sapáén rógen ham mán koty kanén ke máshbatthay sará sakk wassh ent.”
Máshbatth o sapáén rógenay eshoknagá Aslamá bechkandet. É áiay delpasondén warák at.
Kóhay washkawshén thollá áyán dán dérá nesht o gapp o rapp jat o kandet. Ni hórkén bótal paráyán kárámadén chizzé jódh bitagat.
Nágomán