Kalkashán gón wati nódarbarán tayábay lambá saylá at, bale áiá wati hamráh yalah dátagatant o éoká gardagá at. Chammy kapt say kasánén jenekkuán ke tayábay lambá kochk chenag o pandólá kanagá atant, layb o gwázi kanáná rawán atant o náhodá o yaddáráni kerrá máhig pach gragay wástá óshtán atant.
Gón hamé gwandhuáni gendagá Kalkashán wati hayáláni johlánkén zerá ér kapt.
Hánol o Hattali Mahdarwaray sará kandagá atant o Kalkashán goshagá at, “Taw hamé ke tayábá káay, é wadhén kochk chenay, eshán chón kanay, ganók?”
Cha Mádarwará pésar Hánolá passaw dát, “Eshán kamáit o gwará kant, haw na?”
Hahaha. Har sayén kandagá laggetant o Mahdarwará zahr kot, wati pandólay kochk kasshet o dawr dádant o hámóshiá rahádag but. Hattali Mahdarwaray poshtá rawán but o cháp janagá lagget o názénagy bendát kot, “Ládhay ládhay ládhay, marchi máh moján geptag, márá tayábá taháriá geptag.”
Hahaha. Hánol o Kalkashán tacháná shotant, áiay démá mán tarretant o Mahdarwaray dast gept o gosht, “Jenekk! Taw chó chéá zahr kanay, má wa maskará kanagá atén. Wassh bu, adhay sharrang! Má ham báz kochk chetag.”
Rózarday wahd at. Róchay zardiá zeray sará mán shántagat o zerá dege jalwahé áortagat. Gwátay shikkagá tayábay zébái géshter kotagat. Gwát anchó kasshagá at ke dazgoháráni sarig o mud gwátá bál atant. Kalkashán gón wati dazgohárán chó zeri morgá tayábay lambá gón wati pachén bánzolán layb o gwázi kanán at, cha donyáay drostén gamán bésamá.
Mahdarwará gón ládhoki gosht: “Shomay dazgohár nabán, yalah dayét maná. Shomá rad dayét modám maná.”
Bale áyán yalah nadát o hamráh butant. Mahdarwará Hattaliárá gosht, “Mani sará názénk majan, tai námay sará ham sawt hast ent. “Hattali lál gón jenekkán kayt ent, kandhig o hár o jawakkán kayt ent”. Gón hamé gálán padá wat kandety o wasshán but.
“Hahaha.” Hattaliá ham kandet o gosht, “Maná bale é gapp wassh bit, natawrit.”
Mahdarwará gón hamé gappá á télánk dat o zerá dawr dát. Kalkashán o Hánolá ham Mahdarwaray dast gept o zerá dawr kot. Yakké domiá áp per réchagá laggetant, kandagá atant.
Anágahá Kalkashánay démá ápay trinzok lagget o á godhet. Cha wati hayálán dar atk o áiá cháret ke mani hamráhay tawár ent. “Taw edá sengay sará éoká neshtag o ché jédhagá ay? Ódá má drost kadigén ent ke aks kasshegá én o chón wassh ent. Nun wa dar kapagay wahd ent o taw chó sengay botá edá neshtagay.
Kalkasháná gón wati zhandén tawárá o proshtagén labzán passaw dát, “Hecch, bass wati dazgoháráni tránagá kaptán. Dazgohár ham zendagiay zendagén bahré atant.”
Áliah Sháh