Á kamásh cha dhegárá say lach máshay ronag o kósagáni sar chenagá rand, dhaggarén kahiray chérá pa dam kanagá tachk at. Garmági némróchán harwahdá ke áiá cha kárá dam bort, sásáragá hamé pirén bale sáhegdárén kahiray chérá atk o nesht.
É ni áiay ádat at. Chó dhaggarén kahiray jenday rótagán é ádatay rótag anchó johl shotagatant ke kamáshá dege hecch kahiray chér wassh nabut. Édege kamáshán á baré baré kalág zort ke é kahir yakk róché tai jendá chér tarrénit bale áiay passaw modám hamesh at ke kwahnén hamráháni yalah kanag grán ent.
Áiay del pa wábá rawagi at ke bétawárén chágerdá pádbramshé góshány kapt. Chakky jat o chárety. Áiay chokkáni mátá sobáreg gón at o pédág at. Hordokén Regetty ham gón at. Á gón nomásagay gendagá gal but. Áiay neshár marchi wati mát o petay cháragá kawrá ádastay bázárá shotagat. Jenekku ke nók shirá pach at, bortagaty gón bale Regett hamedá at.
“Bachah! Taw mátá nashotay gón?” Kamáshá cha nomásagá jost kot bale nomásagá pésh zálá passaw dát.
“Shiréná wa gosht ke borén bale eshiá gosht agan pirbá gón ent, man káyán gón.”
Kamáshá thahk diáná nomásag baddhá kot o péshánigy chokket. Charé gappá kamáshay del wassh but ke áiay nomásag mátá gésh gón áiá lecchetag. Hamé sahtá kahiray sará neshtagén kapóté kukuá lagget. Gwandhuay delgósh hamángor shot.
“Pirbá!” áiá gón kamáshá gosht.
“Hán, mani chokk!”
“Pirbá! Maná kapóté beday.”
“Kapóté? Chóny kanay?” Kamáshá kandet.
“Lógá barány gón. Belly hamódá kuku kant.”
“Chó gerag nabant, mani chokk! Bál kanant. Man randá dámay sará pa taw yakké gerán kárán gón. Anni man dam bortag. Shodig án, nagan warán. Sharr ent?” kamáshá gosht o sákemén nomásagá mannet bale góshy angat kapótay kukuán atant.
Nomásagay gappán kamásh wati yakkén bacchay tránagá perrént ke Dabaiá kárá at. Áiá ham kasániá kapótay kuku dóst bitant. Regett rang o dánagá petay dárén sar at o gapp o ádaty ham hamáiayg atant. Bacchá do sál o ném at ke waláetán at. Á wahdi ke á shot Regett nóki cha shirá pach at o jenekku nesháray lápá at.
“Haw, déry kot,” Kamáshay dapá béerádahi dar atk. Pirzál ke bárén che hayálán at, godhet o wati marday némagá rók róká cháragá lagget.
“Kayá dér kot? Man?”
“Na, na. Taw na. Regett jánay petá. Áiá ham kapótáni kuku dóst bant,” kamáshá gosht o pirzálay krechkén démá abétkiéá mán shánt. Doénán pa dósti wati nomásagay némagá cháret ke kapótay kukuán delgósh at. Kamáshá gón garr garrén tawáréá kukkár kot.
“Kukuku, kukuku.”
O nomásag o pirzál hardo áiay sará kandagá laggetant.
Rózardá wahdé kamáshá laché káh baddhá at o dém pa lógá rawán at, kapóti chonkié ham gón aty. Dámá hecch morg nageptagat bale dhagarrén kahiray chérá hamé chonki zokorretagat ke cha wati koduá kaptagat.
“Gón hoshkén dastán rawagá sharter ent ke eshiá bebarán gón,” kamáshá delá gosht o chonki zort gón. Á daningah cha lógá kammé dir at ke Regett pa gal o omét kandán o krishtán, tachán o setthoká janán, áiay démá atk.
“Pirbá! É chepeloké.” Regettá chonki dast geráná pa gal o hayráni gosht.
“Haw, mani chokk! É tai wadhéné.” Kamáshá bechkandet.
“É kuku kant?”
“Ennán, daningah kasán ent.”
“Taw nagosht tai wadhéné? Man bárén gapp zánán. É chetawr kuku nazánt?” Regett hayrán at.
“Tará panch sál ent. Eshiá balkén panch róch nabit.” Kamáshá kandet.
Hordokén Regettay sar per nabut ke wahdé áiay omr panch sál ent o kapótay chonkiay omr panch róch ent godhá á chón yakk ant? Bale áiá é chistánay sará géshén wahdzawáli nakot o gón piroká gosht:
“Pirbá! Eshiá man kuku goshán gón.”
Regettá chonki wati dapay nazziká áort o kapótay wadhá kukuá lagget.
“Toh náme Hodá, toh máshallá!” Kamáshá wati nomásag tokk jat. Áiay chamm naatant, kárch atant. Yakk randé dhegáray nangár dayagay wahdá áiá nangáray tawsipá delá bass hamé gosht ke nangáré naent goshay zahmé gohárgáidag. O hamá damáná nangáray kamér prosht. Áiá nomásag padá tokk jat.
Magrabtahárá bárén cha kojángor jambarán sar kasshet o zittán ázmánesh pochet. Áyán shám kotag o neshtagatant ke trampán ér dát.
“Sharr but man másh halléntant. Agan na hawrá áyáni kár barábar kotagat,” kamáshá gón zálá gosht o áiay kotthá neshtagén nomásagá goshay gappé tránag kot.
“Pirbá!”
“Hán.”
“Anni ammá hawray sará ent?”
“Na adhay, á wati ammáay lógá ent.” Kamáshá kandet.
“Ammáyá bogosh dhanná dar mayá. Hawr ent.”
Kamáshá chamm nazz kotant o anchó gapp jat goshay neshár áiay tawárá eshkonagá ent.
“Shirén! Regett goshit dhanná dar mayá, hawr ent.”
“Bogosh nonnoká ham dar áyagá mayl.”
“Goshit nonnoká ham dar áyagá mayl.”
Regettay chamm lógay démá dratkagén dhabbá shotant ke áiay tahá chonki band at.
“Pirbá!”
“Hán mani chokk!”
“Chonkiá ammá hast?”
“Haw.” Kamáshá padá kandet.
“Anni kojá ent?”
“Dhaggarén kahiray koduá ent.”
“Áiá ham bogosh dhanná dar mayá.”
Kamáshá é kolah ham sar kot.
“Pirbá! Chonkiá pirbá hast?”
“Haw adhay,” kamáshá gosht o pirzálá kandet.
“Anni kojá ent? Dhaggarén kahiray koduá ent?”
“Ennán. Esh ent.” Pirzálá kandáná kamáshay némagá eshárah kot o Regett hayrán but.
“Haw, pirbá? Chonkiay pirbá taw ay?”
Kamáshá kandet. “Na adhay, man naán. Man tai pirbá án. Chonkiay pirbá dhaggarén kahiray koduá ent.”
“Pirbá! Taw shapá mani wástá kessah káray. Chonkiay pirbá kessah kárit?”
Kamáshá padá wati kandag dásht nakot.
“Haw adhay, chonkiay pirbá anchén kessah kárit ke manesh ham nazánán.”
“Haw?” Regett hayrán but.
“Ache ché.” Kamáshá goshay Regettay hayrán kanag wassh but. Regettá gón nábáwari wati pirokárá cháret. Áiá harwahdá édege gwandhuáni kerrá gorret ke mani pirbá cha shomaygán géshter kessah zánt. Bale ni é gappá á nagég kot ke chonkiay pirbá cha áiaygá ham géshter kessah zánt. Áiá kammé hayál kot o padá chonkiay némagá cháráná jost kot: “Pirbá! Chonki bándá kuku kant, genday?”
“Hawwww,” kamáshá drájén hawé jat.
Dhanná hawr trond bayán at. Regettá dán sahtoké hawray tawár gósh dásht o padá goshay chortéá kapt.
“Pirbá,” áiá ánághá gosht, “ni man zánán, chonki chiá kuku nakant.”
“Haw?” Kamáshá watá zór hayrán kot.
“Haw, eshiá wati pirbáay kessaháni wástá zahir kant. Pirbá! Chonkiá kessahé bejan o beday.”
Kamáshá pirzálay némagá cháret o padá hardokán kandet. Ázmáná jambará ham thahk dát.
Nágomán