Shirgwárén máhá cha kóhay kandhagá wati jadhakkókén dém dará kot o bechkandáná golzeminá cháragá lagget. Shirchakén máhekán har némagá sheng but. Syáh o tahárén chágerdá bráhé zort. Jambaray shaytánén potthahé mizzán mizzáná kenzán but o shot o máhay rozhnáén démy andém kot. Har némagá taháriá mán shánt. Máhá é gapp wassh nabut o goshádiá cha potthahay poshtá sarokky kot.
Máh o potthahay é delsáchén layb dán sahtoké barjáh mant bale zittán potthah saléwalé but o ázmánay práhián gár but. Máhá sártén ginné kasshet.
Sirkagay sará neshtagén Mahmjáná ham sártén ginné kasshet. Áiay wadáráni gránén sáhat halás bitant. Hurparén Nurján loddháná pédág at.
Mahmjáná ke á dit, tacháná démáy shot o ambázy kot. Doén yakké domigay ambázán bé trekk o tawár óshtátant. Doénáni del drikk drikká atant. Á pa anchén káréá sar geptagatant ke charáiay hayálá ham deláni drikkag téz bant.
Áyán charé mehrdozhmenén dhéhá dir rawagay paysalah kotagat. Doénán zánt ke edá áyáni wáhagáni dotákuén kesháray sabzag drógé. Áyáni mehráy ráz daningah páshk nabitagat bale páshk bayagay tors harwahdá hastat. Mahmján o Nurjáná sharr zánt ke é rázay páshk bayag áyáni margay jár bit. Belly áyán gonáhé nakotagat, mehr o dósti kotagat bale é mehr ke áyán kotagat, eshiay drostén bázár dozhmen at, chiá ke Nurján Zegrié at o Mahmján Nomázié. Nurján sérén kawdá o zemindáréay jenekk at o Mahmján kawdáay dhegáráni sará kár kánókén bazgaréay bachakk.
Áyáni nyámá din, zát o zoryát o zarray kóhén diwál mekk atant bale áyán é dráhén diwál próshtant o eshkay kuchagá ér kaptant o hamé chizz mahlukay tabá naat. Mardománi nezzá é mazanén gonáhé at, cha dini o kawmi dód o rabédagán sartábi at o Mahmján o Nurjáná sharr yád at ke shash sál pésar do hamé wadhén mehray shaydáyáni mardomán, áyáná gón taparán dhakki kot o kosht.
Ni Nurján o Mahmjánay démá do ráh atant, cha wati mehrá dazbardár bayag yá charé halká dar áyag. Mazanén chár o biccháréá rand áyáni ámiday sang wati mehray némagá jahl but o áyán dar áyag o dege némagé rawagay paysalah kot.
Mahmjáná Nurjánay mahdróshomén gónápay némagá cháret o padá máhay némagá chamm shánk dátant ke dém pa wati menzelá jonzán at o Nurjánay chamm kammé dir shirchakén máhekániá micchalén kahiráni némagá sakk atant ke wati górwandhén thálesh jahl jatag o óshtátagatant.
Doén bé trekk o tawár wadh wadhén hayálán sar o chér atant ke anágahá thithién morgéay tawárá paddrahéntant.
Mahmjáná gosht: “Nurján! Ni borén… Ni borén ke márá róchay thekk kanagá pésar charé ábandá dar áyagi ent.”
Doén rah geptant. Áyán daningah chár panch gám jatagat ke tiráni tawárá bétawárén chágerd jaksént o Mahmján o Nurján sar léthet o kaptant.
Damánokéá rand cha kaléréay poshtá mardomé dar atk o hónán micchalén Mahmján o Nurjánay kerrá atk o óshtát. Topangy angat dastá at.
Doén thappig nazzik pa nazzik kaptag o nakkok janagá atant. Mahmjánay baddhay kallig trakketagat o retkagén áp gón áyáni zagrén hónán hawár atant. Topangién mardakár óshtátagat o áyán cháragá at. Sahkandanén Nurjánay chamm óshtátagén marday sará kaptant.
“Abbá á á…”, charáiay hóná golgolén dapá abbáay labz hónán micchaláná dar atk o óshtátagén mardy paddrahént. Pa hónigén petéá é yakk sahkandanén jenekkéay dapá dar atkagén hamá labz at ke áiay tahá hazár dard o armán, hazár gelag o jost mán at.
Mardá wati chamm nazz kotant bale abbáay padgwánk áiay kóhén delay talárén diwálán zhámbalénagá at. Áiá wati chamm pach kotant o zeminay sará kaptagén Mahmján o Nurjánay némagá cháret. Mehray doén shaydá wat mán wat goláesh dege donyáéay sapará, dege menzeléay shóházá dar atkagatant.
Kammé óshtagá rand mardá dastay topang baddhá kot o poshty mán dát. Dir, thithién morgéay tawár pédág at o ázmáná éokén máh gón moluri, dem pa wati menzelá kenzán at.
Nágomán