Confusion

Mani hayálay eskeriná báz póldhar ant, pach ant
Aks bon gerant o labz mór bant o per rechant

Yakk póldharéá wáb anchó botkagant ke mánáay wadhá naant

Yakk póldharéá ágahiay rang rózhná naant
Latá o Háedah o Náku Payzokay jetá jetáén sáz o sawt yabbará
Per ant saray playerá

Yakk póldharéá molki gapp o masalah ant
Syási kár o kessah ant
Enkelábi jédhah ant
Moridá marchi bist o panch pedáiay shahidi hál mannetag
Lahtén róch ent hál nést Kambaray
Zámorán dán Bárakáná pawji ápréshan ent
Domi némagá cha ryásati rasándará
“Chawdari Hemákat”ay tawár kayt
Bejjalet méshán angata, bahár kayt
Molk marchán émen ent

Gón shayr o gál o goshtenán ke póldharéá Kázi ent
Na mardomán cha deljam ent
Nay watá cha rázi ent
Ke báriá manárá bell watárá ón namóketag
Gón bémadháhén kandagán
Gón kócharáén konnatán
Wáh kapót, wáh tai málay, wáh tará
É dánchópén nawbatárá chópagi ent har wadhá

Yakk póldharé ke sanjéay rehámán chér tarretag
Yakk bárié agán shotag, goshant dobar natarretag
É zendagiay mólom ent pa watá zahiri ent
Ke péch wárt chó máréá
Zumméay wadhá dajit

Yakk póldharé watárá lóthit róché rangéá rajit

Yakk póldharéá éoká Bolaydah ent
Haybatánay Hóthal ent, akséá
Mawáliáni jannat ent.
Zabarrag ent, chelimm o cháh o sohbat ent
Hawáldár Piru ent
Hasan Kalandar ent, Habib Chánu ent,
Aziz Thakkar ent
Á bégahá kojám cherágay baddwáé laggetag
Ke anga pa watá nayayt
Á damkán pad kojá wati babátagant
Á sáhatáni morgán táb dát sar kojá wati
Layb laybá, maskará, drohá shotant yabbará o pasht kaptag éoki

Yakk póldharéá raptagén o sestagén tawámén sangatáni yát
Anchó ér ant purah gránén jenteré delay sará

Yakk póldharé erotic ent
Cháragay wadhá naent o kassá pésh dáragay wadhá naent
Mohabbatáni chádh ón chó károbári aydhá
Didagáni démá mermeránk bant o per gwazant
Bojant o áp bant chó tákchaháni mómbattián
Baré baré sweetyay bashánagá wa ázmán sará kapit
Do payk Jóni Wákaray, yakk kandhomé
Twelve point eight dhálará kapit
Yakk tránagé chó wáeraszadén prógráméá affected ent
Dará narawt rejected ent
É zendagi wati tahá
Baré baré goshay baláhén azhdiáéay hadhakkahi dap ent
Fucked-up ent

Tawámén jédhagáni péch, péch bant par rechant
Mani Hayálay eskeriná báz póldharé ant, pach ant

Ali Ján Dád