Áiá wati sapar jat o atk lógá sar but. Sohbigén at ke shotagat, ni bégáh at o áiá hecch nawártagat.
Ódá pa waragá béde ápá dege hecch nést at. Asalá á choshén jáh o jáwaré naat ke mardom waragi bebit. Ódá mardom waragay hecch soddá naat.
Áiay mátá paráiá warag ér kotagat. Wahdé áiá dam bálá kot godhá mátá tawár kot. “Mani chokk, Háni! Byá é lógá, waragán garm kanán, sobáreg kan ke taw shodig ay.”
“Ennán ammán! Man shodig naán. Ni róch ham shotag. Anni nawarán ke waragay wahd haráb bit.” Áiá passaw dát o wati sary lógay démá érén sarjáhá tekah dát.
“Mani chokk! Tai chamm parchá chó sohr tarretagant? Taw hamé ke wati wánagjáhá diwáná raway o káay tai chamm chó gogguay chammán gwát gerant.” Mátá gón delwáragi gosht.
“Máti! Wánagjáhá may sar sajjahén róchá jahl ent o má nebeshtah kanén pameshká may chamm sohr tarrant.” Chokká pa washtabi passaw dát. Padá josty kot, “É Sammi koj ent? Maná ché grádit o dant?”
“May hamsáheg Golnesáay jenekk sohbi nám dokkánay geptagy, o rawánká shotag. Mát bárén kayá hál dátag, bipiá geptag, tostag o kaptag. Kassá nagoshtag ke rakkit. Sammi man dém dát ke háláy begipt.” Mátá gón bazzagén gálewáréá passaw dát.
“Hán! Mási Golnesá ham sharrén rittacharzé. Rawánkay rawagá zánán ché bit? Harkasi hakk ent ke ráji rawánkán gón bebit. Marchi á ent, bándá má én.” Chokká wati pád prencháná gosht.
“Man o Golnesá garib én o gón má choshén kár nabit, márá torsit.” Mátá chamm dhanná shánk dátant o gosht.
“Máti! Shomay torsé naent, wassará shomárá torsit. Haw! Shomá mayárig naet, shomárá torsit ke shomay del nezór ent, bale chokkán wa bellet ke wati hakkay…” Áiá gapp anagat dapá at.
“Taw atkagay? Godhá mási Golnesáay jenekk??”
Sábedah Barkat