Wahdé hankénay hamá kóh o borzagáni naksh o negár, sabáháni meskén samin, némsabz o jambarién ázmán, shapáni lahm lahmá kasshókén kawsh, delá hazár armán o ométáni jaháné singárit, hamódá hamá tahl o kocchalén yátán ke kapán godhá chárén némagán delpróshiay jambar mán shánant.
Mátén golzeminay bu o bos, kawr o chammagáni tachókén áp, drachkáni wasshén sáheg o tákáni zébái maná hamáyáni yátán perrénant ke man áyáni chárag o didárá talwasagá án. Anchó gomán bit é nedárag o yátán mani ruh taháragáni mayár kotag. Man anchén béwasén morgé án ke bimnákén dhabbéá band kanag butag…ke á, wahdé wati hamráhán ázmánay démá bálá gendit godhá wati béwasiay sará bazhn wárt.
É ranj o gamáni panjagá ke mani ahd bastag, é wasshi o shádeháni zebahri naent balkén mani é gamay sawab mani ruhay tahá neshtagén hamá jazbag ent ke maná wábay sáchagay hély dátag. É jazbag mani hamok jazbagay bonzeh ent ke áiá maná chó zerá johl o sháhegán kotag, yakk anchén zeré ke á syáhén moján geptag. Ódá nayke daré gendag bit o nayke wasshén nedáragé.
É mani domi zend at parchá ke ensán hamok sál yakk nókén zendé pa wat shóházit. Agan áiay zend badal mabit godhá áiay zend yakk ketábéay anchén tákéay wadhá bit ke ódá zébái, wasshi, gam, nedárag hecch gendag nabit, éoká yakk gimortagén ruhé ke na sorag zánt o nayke jazbagáni márag.
É hamá sálay gapp ent ke mósom bahárgáh at. Bágáni tahá zébáén polláni washbu tálán at o sabz sabzén hodákáhán gón sambahéntagén zemin ke anchó gomán bayagá at goshay zemin wati chér o andarén rázán ázmánay démá páshk kanagá ent. É nedáragáni hámóshi anché hámóshié ke mardomá wábáni dege jahánéá bárt o sar kant. Hamá jahán ke ódá ensánay ruh ham chó gárén morgéá bit o rawt darchkéay sará nendit wati gwastá yát kant.
Hamá mósom ke mardom wati delay chammán gón donyáyá chárag lóthit, hamá zéd ke mardomá chárén némagay rázáni kolohá dant o yakk anchén máreshté bakshit ke é máresht o zéd hardo áiay zenday mánáyá badal kanant o áiá dege jáhé sar kanant ke ódá polláni gwádhag srapant, sabáhay nód lahm lahmá shanzant.
Morg o shátoláni mestág ke delá hamdeláni áyagay ehwálá dayant. Gwastay yát chó drachkáni sáhegá gwazant o mardomá anchén chágerdéá télánk dayant ke ódá mardom wati chammán ádénké kant o áyáni démá óshtit.
Asmá Morád