Gádhiay wadárá áiay chamm band nabitant o goshty: “Máti! Gádhi kadi kayt?”
Chokkay sar mátay kóndhá at, gréty: “Sáhay badal! Damánoké ópár kassh, Jangián gádhiay áragá shotag.”
“Jangiáná bogosh dér makan.”
Gwandhuá chamm band kotant. Gréwag o peryátán hamsáhegén Dorri tachán tacháná atk o disty Shayhak hónén ent, sary mátay kóndhá ent o chammy band ant.
Peryáty kot: “Ché bitagy?”
“Dhanná laybá bitag, bémátán tir jatag,” mátá cha delay sóká passaw dát.
“Abbodhay bábi! Tiry kojá wártagant?”
Mátay chappén bagalá masterén chokk neshtagat, darráénty: “Charrahiay tiré bitag bale shogr ent ke cha dirá laggetagy, paméshká mazanén thappy per nést bale delbandá beger dán péshánigá shórawán geptag.”
Shayhaká chamm pach kotant: “Máti! Gádhi atk? Maná dáktará nabaret?”
“Abbá! Delá bedár, gádhi pédág ent.”
Kasánokén Shayhak Ján mártósag at, hiskárety: “Ammán! Jangiáná bogosh dér makan, mani thapp sochagá ant.”
Shayhakay gohár paráiay dardáni árám kanagá Alláhay kalámá wánagá at. Chizzé tákay wánagá pad nazzikká atk o áiay démá chuppy kot.
Shayhaká grét: “Maná gwát makan, sagget nakanán.”
“Ennán lálá! Man suraté want, begenday zitt cha dardán árám bebay.”
Gón shakkién chammé goshty: “Záná maná dáktará nabaret?”
“Walok! Boraw hálé beger ke parchá Jangián inchok dér kanagá ent?” mátá kashá neshtagén chokk parmát.
Walok gón arsigén chamm o dardigén delé tachán tacháná shot. Chizzé gámá pad disty Jangiáná bejliay kambahé geptag o dáshtag o gréwagá ent, porsety: “Hayr ent? Borén mazandaggá gádhié chárén ke lálá sakk béwár ent.”
Jangiáná brát goláésh kot o goshty: “Darwázagay dapá bechár, dozz o dhong angat neshtagant. Maná hecch wadhá rawagay ráh dayagá naant.”
Walok dém pa hamá darwázagá shot bale hamé damáná shash kassá mán tarrént “Ay, chóthsar! Wati lógá boraw.”
Gréty: “Shomá mani brát jatag. Man cha shomá hecch nalóthán. Maná bass bellet ke dhanná rawán o gádhié chárán.”
“Taw záná sarpad nabay? Agan taw zyádahén habar kot, é topangáni tirán tai dapá chandhén.”
Yakkéá sitirié áiay sará dásht o gosht: “Boraw selgat! Sholokk ke halás bit, wati brátá dáktará bar. Bellé anni.”
“Dáná wahdá áiay jend bébaláh…”
Drostán wati topang áiay némagá tachk kotant bale Jangián hamé damáná atk o sar but o brátay démá óshtát: “Majanet, má rawén.”
Jangiáná á kasshánróp kot. Padá har doén brát gón nákámén delé gréwáná lógá atkant. Mátá chó morgá parparroki janókén Shayhak baddhá kot o pád atk: “Jangián! Taw gádhi kojá óshtáréntag?”
Shayhaká gón proshtagén gálwáré gosht: “Ammán! Maná árám árámá bar. Thapp kodant.”
Mátá áiay dast chokket o gosht: “Abbá! Alláh bádsháhé! Jangiáná gádhi ham áortag, bass anni rawén.”
Gohárá ham goshád goshádá Korán ér kot ke ni má dáktará rawén bale Jangián mátay chammán cháragá at o gréwagi at.
Mátá gón drahókén lonthé gosht: “Jangián! Delá dawr maday, Hodá bádsháhé.”
Jangián pádán démá nabort. Goshádiá Shayhakay sary chokket: “Ammán! Rawagay ráh nést.”
Padá Jangiáná grét: “Dhongán goshtag, ‘dánke sholokk halás nabit, kass cha damká dhann dar atk nakant.’”
É randi, Shayhaká gón némsáhén jáné gosht: “Ammán! Man sagget nakanán.”
Mát ganókián gept, ópárá jwáb dát, chokky delay poshtá dásht o tachká damkay darwázagay némagá shot.
“Shomá záná sarpad nabet? Má yakk baré goshtag, dánke sholokk halás nabit, kass dhanná shot nakant.”
Mátá grét: “Márá bellet, é mani sohray chudhig ent, bezirety. Man pa sakkiay wahdán wati gotthá bastag bale ni ched o masterén sakki maná nagipt.”
Yakkéá thahké jat o hamé chudhig kissagá kot o goshty: “Bale may habará begeret o lógá borawet.”
Bécháragén mát sarigay ham hóshá naat, gréwagá at: “Man shomárá wati gór o kapanay chudhig ham dát, ni wa márá bellet.”
“Ay makkár o drógbandén zálaku! Agan taw zukkag kot, shomárá, drostán ragbár kanén.”
Bésób bitant o dém pa lógá wátarresh kot. Mátá Shayhak lógay lápá wápént o sar wati kóndhá kot.
Sahtokéá rand, Shayhaká chamm pach kotant bale é randi hecchy nagosht. Arsy anárkán shalán bitant o bass.
Adáréá pad ráh pach bitant. Jangiáná tachán tacháná cha mazandaggá gádhié gept o áort.
Mátá goshád goshádá Shayhak baddhá kot o gosht: “Shayhak! Delá bedár, Hodá hayr kant. Gádhi ham atkag, ni má damánokéá pad dáktaray gwará sar bén, tai thappán darmán kant.”
Ni Shayhakay, cha shalókén arsán tarr bitagén anárk hoshk tarretagatant bale chammy angat pach atant. Goshay záná gón mátá gappá at: “Máti! Maná dáktará mabaret ke thapp sakk dardá ant.”
Nesár Ahmad