Byá kojá ay! Mani sechkánén hayálay ótág
Chamm kadi bant tai armánién diday mahram
Ars o ólomb bit pa man é zahiráni hatam
Man pa chóshi shapi pásán gón ragámán pédhin*
Róchásáni o rólah chó mani angarén zerd
Man chó bésár o ganóká gón hayálán jédhin*
Shay Moridé man naon Makkahay darbanday kapót
Jám Dorrok man naon, drin maná hál nadant
Mast o shaydá on chó Mastá bale tai mahzab o nashk
Háni o Sammi o Sanginay wadhá yát naant
Taw mani dóshién wáb ay ke shamoshtag marchi
Yá goshay raptagén zenday taw mani hamráh ay
Yáke mehray hamá gál ay ke delá kayt o nayayt
Chó saminay golén zémel mán donán bégwáh ay
Shapcherág ay ke shapán shahm bedant, gár bebit
Chó gerók ay ke nazánán mán kojám bandá ent
Hamá nók ay ke dará ent, wadi but nakant
Yá hamá bám ke bé jambar o hawrá chér ent
Taw chó molláay yakin ay ke nazant wat chón ent
Yáke háwanday wadár ay ke kadi pilaw bit
Yáke bot jódh kanókay taw goshay raptagén yál,
Yáke chó áshekay ars ay ke delá bit o rechit
Byá kojá ay! Mani ázordén nasibay ógwásh
Chamm kadi bant tai armánién diday mahram
Ars bant chamm chó mán shántagén sáheg mán sará
Lahdh bit del chó gamay gwátgerén ásé mán jahán
Hecch nazánán ke kojá ent mani menzel, mani ráh
Gár o gomsár án man emrózay taláráni zehán
Kad pa kaypán é gamámáchén delá sahdhénán
Kad amollán man pa tai tangawén dróshom bezarán
Pa homárchammién kádháni shepárén bikán
Pa kehéblehrién sháráni abirén gwátán
Byá kojá ay! Mani sechkánén hayálay ótág
Byá kojá ay! Mani ázordén nasibay ógwásh
Chamm kadi bant tai armánién diday mahram
Atá Shád
*Pédhán
*Jédhán