“Agan máh kammo nazzikterá byayt godhá ché bit?”
Maysejay wánagá rand man passaw dát ke daryáay gwarm kammo master bant o billay áp Joddhiay ráhá band kant.
Áiá kandag wálá jennoké dém dát, man hecch nagosht. Man zánt chizzé dém bedayán, jawábá padá chizzé kayt o jenekk gón mayseján maná wánagá naylit.
Asalá man nazánt ke é jenekk kay ent o parchá maná maysej kant. Man é zánagay johd ham nakot o áiá ham wati pajjár beh záher nakot. Áiá géshter máhay bábatá jost kot, goshay máhy sakk dóst but pameshká man áiay nám ham wati mobáelá “Máh” nebeshtah kotagat.
Yakk randé hamé Máhá maná maysej kot:
“Tará máh dóst bit?
Man gosht, “Ennán.”
Goshit chiá?
Man gosht, “Máhá báyad ent zeminay badalá róchay tawwáb bokotén.”
Padá goshty, “Chiá zánán?”
Yakk baré man gosht ke goshány róchay rozhnáiá zurit bale padá man hecch nagosht ke é gappá kapit kalákáni kalák gapp kant pameshká marchi man eshiay maysejáni báz jawáb nadát ke maná wati ketábay kár dastá atant. Mani ketáb estáláni bábatá patth o pólé at o é jenekká modám máhay bábatá gapp jatagat. Máh yakké at o estál báz atant.
Man chincho métagá sapar kot, chincho mósomzánt o náhodáyán gón gend o nend kot bale ketábay kár angat báz pasht kaptagat. Man har métagá ke shotán nethwarkay rasagay shartá áiay maysej atk, “Máhay sará ballok o gwánzagay kessahay pozhdar chi ent? Zeminay máh agan báz buténant chón shawk butén.”
Yakk róché man gosht, “Man wati ketábay kárán dazgatth án, tai maysej jawáb nabant.
Goshit, “Wati ketábay námá bekan Estál shapádá gardant.”
Man gosht, “É wa Monir Mómenay ketábay nám ent.
Goshit, “Godhá ‘Táray zamin par’ bekany.”
Padá kandag wálá jennoké démy dát.
Hamá shapi ham man neshtag o wati ketábay kárán dazgatth atán ke maysej atk, “Máhá parchá dóst nadáray?”
Man hecch nagosht, mobáel hámósh kot o ér kot. Maná bázén káré démá at. Chinkas estál gón at, Tirband, Sammák, Shapkassh, Pawr, Sohayl, Bám, Zál, Gáh, Násh. Padá chincho Násh atant, yakk o doá beger dán hapt o hasht Náshá. Man gón estálán dochár atán. Shap polán at. Yakk bajá mani segréth ham halás butant o kár ham thokkoré but. Tachk bayagá rand man delá jédhet, nun kampózengay kár bendát kanagi ent. Sartákay wástá ham mardomé cháragi ent. Padá porup ham lóthit. Anga báz kár hast. Hamé sáhatá maysejé atk, “Agán máh o estál hór bebant ché bit?”
Erpán Aslam