Mehr yakk ráhé man shóházy kanán
Mehr yakk ráhé o yakk rahbandé
Mehray shóház kanók
Gár nabant mocchián
Sheng o shángén é jaháná bándá
Mehr yakjágah kant
Mehr dárant dráhén sahdár
Bale Ádamay mehr
Gón aglá hór ent!
Agl o mehr hór bebant
Godhá donyá chéé
Dorsén donyáyá bedárant balkén
Mehr sháhéméá chón jágah kant?
Mehrá hecch kacch o kesásé nést ent
Sáh drapshit gón mehrá
Ke á mehray nám ent
O rodit aks
Ke má jány goshén
Ján chéé?
Hamé mehray aks ent!
O wahdé mehr mabit?
Sáh nabit
Ján nabit
Zend nabit
Aks nabit
Agán gendit godhá
Mehray aksá padá mehray chammé!
Mehray chammáni becháret róká
Mehray chammáni becháret róká
Rók gendag bit hamá wahdá ke
Bekapit aksá
O bebit mehray aks
Sharr becháret hamá chammay róká
Mehr yakk ráhé mán shóházy kanán
Mehr yakk ráhé o yakk rahbandé
Man pa mehrá medhán, mehr émenié
Man pa mehrá merán, mehr émenié
Mehr yakk ráhé o yakk rahbandé
Kay ent é ráhá mani hamráh bit?
Kay ent é ráhá maná hamráh kant?
Kay maná mehray jaháná sar kant?
Kay ent ke mehray jaháná mani hamkópag bit?
Byá pa mehrá medhén, mehr émenié
Byá pa mehrá merén, mehr émenié
Á kojám ráj ent ke mehray ráj ent
Tá kadén mehray jaháná sar bén
Bale má allamiá ódá rasén
Bale balkén dérán
Mehr yakk ráhé man shóházy kanán
Mehr yakk ráhé má shóházy kanén
Má bezán dorsén ráj!
Allamiá allamiá
Hán Sáber
Janwari 1978, Karáchi