(1)
É tahárén shap mani bináén darday hambaló
Parchá bandit bánzolán
É keshk o dar gimortagén
Pa shahmi trampé, pa chedhekkái bolórén thokkoré
Cha ázmánay sabzokén daryáyá ádém raptagant
Byá mani bináén darday hambaló
Byá maná chó sengoké
Dastá kan, ápá dawr day
Balkén rodit bramshé, o shahmé rók bit
Taw éok ay, man éok án
O éok ent é wahd chó wayránagay
Tahnáén yakk macchi boné
(2)
Delá wa báz lóthetag
Wati zamánagay shapárá chamm per kanán bale
Wati tahá ke sar jatag
Hazár keshk kabr atant
Hazár randá gón watá
Man dhik wárt o kaptagán
Padá gón dastmóshián
Watárá dist man
Tai rang o zébay dargahá
Tará gón halwatá atán
“É shishagán bozur o
Kammén nur mán bekan beday”
(3)
Kasánokén chedhekkahé nabut
Cha jengolá sobakter ent
Wáb wahdé bál kant
Ta didagán samá nabit
Na cherág chakk janant
Na sarjahá cha halwaté rodit
Kasánokén chedhekkahé nabut
Man jédhagá atán
Morg drachkáni ke armán ant
Paché bál kanant
Hórkén chammáni koduáni darán band kanán
Sar janán waptagén damkáni tahá
Shap wati mahparán pécháná mani démá gwazit
(4)
É tahári zeré
Chamm goshay ráchen ant
Poll o estinén cháder tai
Drapshagá ent mani
Béwatén éokiay zerá
Chóke ácháréá
Byá mani didagán
Sháray lambá beband
O bebar gón watá
Yá zeray sénagá
Chó cherágá bebal
Máhay paymá becham
(5)
Por harid ent
Mani gyábánay kapótáná bogosh
Balkén nu sotkagén sénag
Ón nehádé kárant
Balkén bon geptagén peryát ón
Kárá byáant
Mani gyábánay kapótáná bogosh
Jannat o bágén koduán
Wati chammáni tahá chér dayet
(6)
Hamsapar, é taw ay
Yá tai óstay shap ent
Chó tahárén zerá
Chawl jant didagán
Sheng ent har némagá
Chóke gyábánéá
Hamsapar, byá darigán bopósh
Dán machárán kassá
Hamsapar, byá mani didagán dág day
Dán magendán watá
(7)
Chó péchdárén damkéay nasibá shap
Ke táb wárt o gár bit wati tahá
Agan é ázmán ágah ent
Godhá bogosh ke bramshé, trampé dém day
Del o negáh chórah ant
Hamé damáná thithié tawár kant
Chó ásay drachk o ápay róshnáiá
Mani tahá rodit
Rechit, proshit o gár bit
Man bramshé án, man trampé án
Tawáré án, o ásé án
Bale shap ent
O péchdárén damké har padag
Ke ér rawt taháriá
Monir Mómen