Tonnigén keshké ay, na shepádén cherágé ay
Gón didagán natránay, che paymén cherágé ay
Sóhán kant seláhán pa taw gwát har shapá
Tahnáén métagéay ganókén cherágé ay
Chóke gerók shahmay o chó zémerá bojay
Bandigén shántolé ay ke bálén cherágé ay
Har maiyatén darigá tai bramsh sraptagant
Gwátáni hamzobán ay, malangén cherágé ay
Didagzebahrén mósomá sanj butagay
Enjirén sháhadháni shodikén cherágé ay
Tai sáhegá madrapshant mani dard chón kanant
Pormehrén didagé ay, tabibén cherágé ay
Nun gellaháni danz rodán ant tai sáhegá
Dódáni kwahnén halká nawáén cherágé ay
Har pás bálán man tará arwáhay máneshá
May gwastagén shapáni taw wábén cherágé ay
Hóshámé bar kanán ent Monir didagán mani
Rozhnáén nur ay taw tanakkén cherágé ay
Monir Mómen
(Yakk Bechilé Ázmán)