Hardén ke Balóchestáná wátarr rawagay bábatá jédhán godhá delay tahá yakk ajabén dardé chest bit. É dardá man labzáni póshák gwará dát nakanán. Asalá man wahdé Palastinay darpadarén mardomán áháni zeminá wátarr rawagá dist godhá man jédhet ke esháni zemin ke pésará chó nabitag, ni ke é wátarr rawant godhá ódá hecch pasht nakaptag. É hecch nagendant, drostáni lóg o métag proshtagant. Zeminay jáwar matth bitagant. Hamóda mani delá josté pád atk ke é mardom ódá rawant ché kanant?
Godhá áháni sawás man wati pádán kotant bezán ke watárá áháni jágahá kot o gomán kot ke man Balóchestáná rawagá án. Yakk anchén sarzeminé ke cha abrami zébáián sarchakár ent bale jangay ámách ent, jangá á zemin tabáh kotag.
Balóchestán pa man modám yaddhawlá bitag. Bale padá ham zeminay girán del modám sochit. É gir lógéay yá yakk métagéay naant. Mani mehr, é gir o tránag gón Balóchestánay hamok seng o dhóká bandók ant ke ni dozhmenay palitén dastán sotkagant. Bale zemin wa zemin ent, chó ke Balóchiá goshant “Wáay watan, hoshkén dár”.
Hardén ke Balóchestánay bábatá jédhán, har sahtá mani arwáh merit. Wahdé hawray washbu mani tangahén zemin o háká rajit, godhá goshay man dobar zendag bán. Mani zeminay hamok seng ke róchay báládá sótkagant, may bondaptaray sháhed ant. Hamok dhók may gahgiriay kessahá kárit.
Maná hamá wahd yát káyant ke man wati zeminay kawrán gón wati dastán pa chank áp wártag. Á ápay tahá man modam watwájahi o ázátiay shirkenén tám chashtag. Balóchestánay drachk gón wati sabz o bazén sháhán tahná sáheg nadayant, é may wastá árámjáh ant, may ótág ant.
Gón zeminay háká yakk pormehrén syádié hast ent. May hákay hamok danz gahgiri o zemindóstiay sawtán alhán kant. Óday hoshkén gwát may sestagén pir o kamásháni halwatán napar kant. Golzeminay gwát ke drachkáni tákán sorénit godhá yakk sázé goshán ér rechit. Á sázay tahá gwandhuáni thahk o kandag hawár ant ke yakk wahdé á gwandhuáni laybjáh bitagant. Hamé zemin ke dobar zendag bayagay wáhagá dárit, may gahgiray chédag ent.
Balóchestánay ázmán ke cha shahray rozhnáiáni gobárá pahk ent, óday estál anchó trepant o nazzik káyant goshay agan dastá beshaháray godhá dastay delá hankén kanant. Óday sohb gón wat rangáni ambár kárant o ázmánay péshánigá chó henniá rajant. É zébáiay sázag yakk ezmkáréay gománá ham dhann ent.
Darmolkiá Balóchestánay yát hazánag jódh bant. Hamok yát may pajjáray thokkorán nazzárit. É wáhesht ke má wati dhéhá begendén, wati háká dast bejanén, wati zeminá ambáz bekanén, béoppárén tágatéay rangá ent ke márá zeminá dobar wátarr kanag o pa bándátá johd kanagá majbur kant.
Belly ke may zemin badal bitag, tabáh bitag bale zeminá gón mehr mojjati ent. Kóháni dhawlá tamard, zeray dhawlá johl o ázmány dhawlá práh o sháhegán ent. É nakshahay tahá jódh bitagén yakk jáhay wátarri naent balkén hamá jáhay wátarray gapp ent ke ódá may gamjatén deláni hankén sabzit, ke ódá may arwáh ázát bant. Óday hamok shay belly yakk hoshkén dáré bebit bale may delá á chó mehrwánén mátéay kotthá ent.
Jamál Balóch