Máh mani bonjáh ent hayáláni
Róch tai wáb ent lahmokén kotthá
Byá mani dábáni pári máhén
Byá mani kádháni sarén sartáj
Man abétk án o neshtagán tahná
Neshtag o ambuén delá jédhán
Golgol ant bázén ars mani chammán
Cha delá ómán ant mani sarréch
Neshtag o hiskárán shapi pásán
Del goshay botkag duriay ásán
Mán porán polpéth tránag delborrén
Chó poránigá bretkag o zardén
Andará ásé rók o jambur ent
Má mosáper o ráh may dur ent
Wassh nabant darmolki maná hálaw
Narmókén bóp o shishomén manjaw
Mashkati hátun o molén mehrok
Thithalén kádh o mehrawán rattig
Man goshay chizzé gár kotag hákán
Man wati pajjár ón babá dátag
Hawr satar gwárant, nód satar shanzant
Démay ádénk ent pahk kant danzán
Ambar o mesk o luluán dranzán
Cha delá chón tai tránagon kenzant
Chón tai jigigá shamóshán man
Nograhén band o sohray thásiná
Gardená áski, pónzá káthárén
Shakkalén trán o kermezén lonthán
Bénagén rakkán tai dapá dorjén
Rólahén rangá tai anárkáni
Didagán nilbómén zeri rangén
Jannati bálád, gón don o buán
Sénagá nóknáhén baheshténá
Báragén sréná tai kelépéná
Panjagán lahm o tráshtagén báskán
Lankoki bandán chó shepárénán
Zánsarán kussh o pokkién pádán
Dhakkomén mudáni tai shaydá
Zámorén bikkáni ganók án man
Byá mani majruhén delá ér kap
Sayl bekan thappán may nawasshénán
Day tasallá o marz sará dasté
Nend maná gwázén gón dege sahté
Bé tará zenday lóth mani chórah
Bé tará didók ant mani bérók
Bé tará wasshi ón janózám ant
Bé tará shakkal zagr o bétám ant
Taw mani gawgái kasániay
Taw mani zendbakshén jawáni ay
Taw mani piriay asá dáray
Taw mani áziz ay, kas o yár ay
Bé tará jawr ant máy dapay wasshi
May delon ward o mobdahán kasshi(t)
Byá mani mawjén háterá wassh kan
Byá maná dastá ger, bebar gón wat
Sarbatag Shóházá tai dashtá
Kesht wati arwáh man Negwardémá
Máh mani bonjáh ent hayáláni
Róch tai wáb ent lahmokén kotthá
Byá mani dábáni pári máhén
Byá mani kádháni sarén sartáj
Golám Hosayn Shóház