Ay Hodá!
Ay monsepén parwardegár!
Ay hastiay sázay soráni rázdár!
Marchi káhwárén é góspondá pahel kan, ay hodá!
Ay hodá!
Gón tará zári o peryát ent mani
Gón tará dazbandi o arz ent mani
Yakk o do jost ant maná passaw beday
Ay hodá!
Chizzoké róch ent may bázárá ajabrangén sepáhig atkagant
Mát o shirmech, pir o warná koshtagant
Koshtagant o brahnagá dawr dátagant
O dege chandé mayárjallén mazár
Dém pa bénámén dayáré bortagant
(Kay bezánt á zendag ant ke mortagant)
Ás dátantesh dráhén bázáray ges
Koddhok o kargin o pishband o gedán
Lóg o bán
Mál o maddhi drost gón wat bortagant báróthián
Tahná man gón panch o shash herr o jadhá pasht kaptagán
Jáh pa jáh, menzel pa menzel sar janán
Hecch nagendán mehrwánén mardomé
Jonzetag bázár koll
Ay hodá!
Ay monsepén parwardegár!
Ay mehrabán!
Ay hodá!
Man hoshk o hayrán án ke bárén ché kanán
Ke hamé dhanni sepáhig nun mani shóházá lóg o métag ant
Borzá ázmáná trepant jangi goráb
Golzeminá thénk o thóp
Ay hodá!
Ay hastiay sázay soráni rázdár!
Parwardegár!
Yakk o do jostay maná mókal beday
Man kojám kaympá seláhbandén sepáh hél dátagant?
Man kojám bázár o bas bon dátagant?
Man kojám Jarnélay ges bambé jatag?
Man kojám milwájahay chokk dozzetag
Man kojám rélay therayk léthéntagant?
Man kojám baynk lotthetag?
Kár may chi ent?
Wati wáhonday omray bandagi
Á ke harchi hokm kan, má hamá paymá kanén
Oo tai bandah hapiz o alamán
Ay hodá shogr ent man ensáné naán!!
Mobárek Kázi