(Lommah Karimahay yátá)
Má Dasambarjatén ahdéá neshtagén
Pammá sálay sará Janwari ón nayayt
Yár báwar nabit mehrá sarréchén mátén pari ón nayayt
Má Dasambarjatag!
Tank o bélezzatén damkéá neshtagén
Jédhagá én tará
Taw chó bémósomá kwahnén donyáéá nókén jangé thahént
Mótki bázáréá
Dardi kóhé sorént
Bótkant morgáni ram
Patthagá ant tará zardén tákáni chamm
Lóthagá ant tará ahday kohsárén gam
Má Dasambarjatag sarpad én ke dobar kass wátarr nakant
Kay bemannit bale
Yár báwar nakant
Má Dasambarjatén ahdéá neshtagén
Sawt sheng ant bale sáz o áwáz nést
Rang o bu, dard o andóhag ant
Mortagén halwat ant sheng ant bázáréá
Mahramén dast nést mehri ambáz nést
Mólománi bahár
Yár karrái ent
Yakk anágah ke dognyáay chamm enserant
Durá shóré rodit
Gellahén chamméá
Shapjatén páséá kassé kukkár kant
Kassé áwáz dant
Sháhray gréwásk o tonnigén chammay tahá
Nendagi at tará
Kandagi at tará
Mehrwanákén pari
Zémeláni sari
Gwádhagén delbari
Taw anágah cha diwáná pád atkagay
Tahzadén nawbatay gránén bárigéá
Chincho zittá o arzáná pád atkagay
Má perémay tahá
Hórk o háligén donyáay démay tahá
Angatá neshtagén
Anga mán gisshetagén
Má Dasambarjatag
Ásto asto edá
Nillén daryáyá áládh o billay rawáni shamósht
Máhekáná wati máhekáni shamósht
Bandén darwázagán
Kwahnagén sáhegán
Dardi tahsendén áh ant pa béwársei
Kaptagant mán dagán
Tákréchay abétkén negáh ant pach ant
Mahramén kohsari
Taw nun márá bogosh
É tahárén zerá
Kahr ámách o delsóchén é mósomá
Kay zahiré bozurit o ásá bekant
Yát o giré bozurit o ásá bekant
Goláb Golzár