Á róchi man káréay niyatá cha lógá dar atkán o padá béhál bitán ke kár ché at. Chó maná yát at ke allami káré at bale ché at? Hóshá hecch kár nakot.
Zi ham gón man anchosh but. Ádénkay démá saray randagá atán. Man dist ke mid kammé dráj ant. Delá gosht rawán sará tháp kanán. Hamé niyatá cha lógá dar atkán o ráhay némá béhál bitán ke che kárá rawagá án. Óshtátán, hayál kot bale gir nayatk. Kammé óshtagá rand béraw kot o padá lógá atkán o gón lógay poteragá tránagá kaptán ke maná hajjámay gwará rawagi at.
Chó báz bará bitag ke man gwandhén káré cha delá bortag bale chó beh nabitag ke mazanén káréay wástá cha lógá dar byáyán o némráhá béhál bebán. Man hayrán atán ke anágah chón shamoshtán. Kammé péshter dán chawká maná kár yát at o chawk chó dir naat. Chagaléay ráh at. Chawká óshtátagén sepáhigá ham man chamedá gendagá atán.
Man dán damánoké óshtátán o chawkay némagá cháret. Padá mani delá atk ke zi man béraw kot o saray thápay kár yát atk. Begenday anni ham padá chawkay rawagá béhál bitagén kár yát byayt. Begenday káray tránag hamodá kaptag.
Chónáyá choshén hayál o wahmay tahá báz park nést o man wahmién mardomé naán bale marchi shamoshtagén kár anchéné at ke man sad mill poshtá rawagá ham tayár atán. Pameshká pad tarretán o dém pa chawká rahádag bitán.
Kammokéá rand man chawká óshtátagatán bale kár angat gár at. Ingor ángor cháret ke balkén mardomé, gádhié, dokkáni námé gendán, káray tránagá kapán bale hecch. Mani chammán chárén némag tawwáp kotant bale yáddásht angat shozhdawá at.
Ni mani delá hamé bimmá sar chest kot ke chó mabit maná girámá gwar jatag. Agan na wassará wat mardomay hósh chón rawt. Béhál harkas bit bale na ke chó. Ni chón kanán?
Padá maná hayál atk balkén lógay rawagá kár yát byayt. Yakk baré gosht rawán lógá. Padá man hayál kot lógá rawagay badalá chamedá pawné kanán. Lógay mardom maná sharr kalág zirant bale parwáh nést ke shamoshtagén kár cha kandag o kalágán démáter ent.
Bale wahdé man lógá pawn kot, óday passaway eshkonagá hoshk o hayrán bitán. Lógay mardomán ham wati kár béhál kotagat.
Ni maná torsé chér kapt. Man drahagá laggetán. É che mehnaté ke téwagén lógy mán patátag? Mani sará chakkar wárt o man yakk kerré neshtán.
Man dán dérán hamedá nesht o jédhet bale nazánt ke chón bekanán. Sar hecch kárá naat. Kash o gwará mardománi rawwá at bale mani kár anchéné at ke dege mardom pa komakká tawár per kanag ham nabant. Áher man nendagá dam bort. Pirénáni wadhá dast kóndhán kotant o pád atkán. Hamé wahdá sangaté atk o raset. Na salám na jódhi. Rasagá goshty, “Yár, baré baré mardom ajabén gapchalán kapit. Mani hóshá bechár. Cha lógá káréá dar atkagán bale ni pahk béhál án ke kár ché ent.”
Man rók róká áiay némagá cháret. Maná shakk but ke é mani hálá sahig ent, pameshká pa kalág ziragá chó goshagá ent. Man gón mojetagén murké gosht, “Bell wati maskaráyán. Man wat paréshán án.”
“Drégatén maskaráé bitén bale man rást goshagá án. Mani hósh kalámá geptag, gár ent. Man …” Áiá gapp násarjamá yalah dát.
Man áiay larzókén lonth o delwáragén chammáni némagá cháret o hayál kot… Yá wa é rást goshagá ent yá baláhén adákáré!
Man bechkandet. Mani bechkandagay sará áiá ham pashalén bechkandé jat o bazzag bazzagá maná cháragá lagget. Wahdé man wati kessah áortant, á hayrán but. Dasty mani dastay sará jat o thahky dát.
Kandáná áiá dast yakk némagé shahárt. Man chakk jat, kammé passend dege pajjáróké óshtátagat ke baré rah gept, baré óshtát. Baré sary kechént o hayály kot o padá rah gept. Má kammoké áiay tamáshah cháret o padá tawár kot. Áiá márá dist, chammy rozhná bitant, tacháná atk o bé jost o porsá wati kessahy bongéj kot… Á ham may bójigá sawár at. Áiay hóshá ham jawáb dátagat.
Padá man har yakké dhikk dát, káray shamóshagay zangá janagá at. Téwagén shahr hamé hawpá mán patátagat. Harkasá wati kár béhál kotagat o ni sarbatag at. Kár drostáni béhál at bale yakk hayálé drostáni delá yakk at. Harkasi gománá drostáni béhál bitagén kár yakk at.
Chó ke shahray drostén mardomán yakkén kár cha delá bortagat, pameshká é omét hast at ke agan yakk mardomé ham shamoshtagén kárá tránag bekant, drostáni janjál kotthit. Hamé ométá tézpahm o hóshmandáni majlesé thahénag but ke benendant o pa káray tránag kanagá hayál bekanant. Mahlukárá ham goshag but ke harkas wati was o wáká wati pahm o hóshá kár bebandit.
Bale é dráhén tach o ták ápay sará rastagén keshk bitant. Kár angat gár at. Káray béháliay sará har yakkéay lonth lónján atant bale kassi dast naraset. Padá yakk nawbaté anchén ham atk ke har wahdá lontháni lónjániay sawabá kamm kammá mardomán kandag béhál kot o gapp gappay sará grétesh.
Yakk róché ajabén gappé but. Mani sar anchén jáhé kapt ke óday mardom hecch paréshán o nagég naatant. Á zenday kárán anchó goláésh atant goshay áyán wati kár tránag kotag yá cha jawpá béhál nakotag. Man chameshán yakkéá jost kot, “Shomá zánán wati kár tránag kotag ke chó gal et?”
Áiá bechkandáná jawáb dát, “Ennán.”
Padá dasty mani kópagá ér kot o góshá halwaty kot, “Agan baláhén káré bitén kassá béhál nakotagat!”
Nágomán