Bi Es O Ball Negwaray warnáyán pa métagay nézgár o bélógén mardomán chambaién ges bandag o dayagay hayráti káré bongéj kotagat. Warnáyáni kerrá hobb o wáhag báz at bale zarrá sost atant, pameshká tarrag o chandah kanagá atant.
Yakk nérmóché ke man delmánag atán dokkáná band bekanán o borawán lógá sobáreg bekanán, hamé wahdá Bi Es Oay chandahi thóli raset. Warnáyán wati gapp jatant. Áyáni erádah at ke sálé yakk o do kamgosháday lógá nók bekanant. É redá awali ges ke áyán bandagi at, Bánoki námén nézgárén o béchokkén janózáméayg at.
Man wánagay zamánagá Bi Es Oá bitagán. Ni á jósh o jazbag pasht nakaptag bale gón Bi Es Oá hamdardi angatá hast ent. Pameshká man warná jódhokén chandahé dátant o paré kárá delbaddhi ham dátant. Chandahay geragá rand wahdé á cha dokkáná dar atkant, mani bachakkuá cha man jost kot.
“Abbá! Chandah chié?”
“Chandah….?” Man chandah dayagá tayár atán bale paré jostá tayár naatán pameshká nazánt ke ché bogoshán.
“Chandah hamesh ent ke eshy kanagá atant.”
Gwandhuá hecch nagosht. Bass mani némagá chárety. Man zánt ke sarpad bayagá naent pameshká gapp démá bort o gosht:
“Pa yakk káréá mardománi kerrá rawag o zarray lóthagá chandah goshant. Sarpad bay?”. Man “sarpad bay?” anchén wadhéá gosht ke sarpad bitag, nabitag, ni é gappá chamedá halás bekant.
“Man hamá róchi chandah kot, genday abbá?”
“Kadi?” Man bechkandet. Man zánt ke angat chandahá nazánt.
“Hamá róchi, aiday róchá. Maná mardomán gappadhé zarr dát.”
“Hááán…” man kandet. “Á chandah nabitagant, aidi bitagant. Chandah angat dege chizzé. Chandah har wahdá gerag bit, aidi éoká aiday róchá rasit.”
Ched o pad man sar kechént. Dar pa dar tarrag o chandahay lóthag grán ent bale panch shash sáli gwandhuéá chandahay mánáay sarpad kanag ched o gránter ent. Kammé hayál kanagá rand josty kot, “Abbá! May lóg hameshán bastag?”
Man kandet. Gón é jostá áiá maná bucchéay mál nakot.
“Ennán yár! May lóg man wati zarráni sará bastag.”
Kammokéá rand padá josty kot.
“Abbá, Bánoki kay ent?”
“Taw Bánokiá nazánay?” man gón hayráni kandet. “Bánoki hamé zálaku ent ke lóg pa lóg tarrit o bákalénk bahá kant. Taw har sabáh áiay kerrá bákalénk geray waray, angat námáy nazánay?”
“Eshiay nám Bákalénki naent?”
“Ennán Bákalénki wa shomá kotag. Eshiay nám Bánoki ent.”
“Bánoki. Bákalénki…” áiá gón wat gosht o padá jost kot, “Bákalénkiá zánán lóg nést?”
“Jandhén kalógaré hasty, kapagi ent.”
Mani gwané gappá áiay kódekén démá gamwárié tálán but.
“Abbá, agan bákalénki may lógá byayt, tawy gallénay?”
“Hááán.. Bezán tará bákalénkay lálech ent! May lógá ke bit, tará moptá bákalénk dant.” Man borwán borz bortant.
Á kammé pashal but. Kandáná doén dasty moshtjangiay wadhá mosht kotant. Man ham jawábá anchó kot. É may kalánkolu jangay dábé at. Áiá wati mosht mani némagá shánt o man watá dawr dayagay wadhá kot.
“Adhay… Adhay! Begeret, mardá márá jat.”
“Man jangá zabr án.” Áiá bájbarén thahké jat.
Á awaliá wánagá at. Wánagjáhy cha mani dokkáná nazzik at pameshká chotthiá rand har wahdá dokkáná atk o nesht o padá sobáregá má hamráhiá lógá shotén. Man thémb cháret o gosht.
“Ni berén lógá. Taw shodig naay?
“Ennán!” áiá malláni wadhá delband démá dar áort.
“Haw wájah, taw sabáhi bákalénk o poráthá choptag pameshká sahiá naay!” man áiay láp keli kot o á kandáná dokolkóch but.
Chizzé róchá rand molláyáni thóliay dokkáná atk. Á pa métagay gel o heshtay masitay pakká kanagá chandah kanagá atant. Hamé wahdá ke molláyán chandah gept o dar atkant, mani gwandhu dokkáná potert. Á hayrán hayráná áyán cháragá at. Inchok drájrissh áiá beh yajjáh nadistagat.
“É mollá atant?”
“Haw.”
“Eshán tazbi zort?” chokká áyáni dastay tazbi distagatant.
“Ennán.” Man bechkandet. Payri áiá dokkáná pa baháyá dratkagén tazbi zortant o laybá lagget. Man gosht ke eshán ér kan. Laybu naant, tazbi ant. Mollái chizz ant. O anni molláyáni dastá tazbiay gendagá á payrigén gappay tránagá kaptagat.
“Godhá eshán ché zort?”
“Eshán hecch nazort. É chandahay geragá atkagatant.”
Chandahay námay eshkonagá áiá pa galé jost kot, “Abbá, é ón bákalénkiay lógá bandant?”
Nágomán